ខ្មែរក្រហម
ជាតិ
គ្មានករណីសង្ស័យណាមួយទាក់ទងនឹងការស្លាប់របស់លោក អៀង សារី ឡើយ
× សហព្រះរាជអាជ្ញានៃសាលាក្តីខ្មែរក្រហមបានចេញសេចក្តីប្រកាសព័ត៌មាននៅថ្ងៃទី២ ខែមេសា ឆ្នាំ២០១៣ នេះ ដើម្បីបញ្ជាក់អំពីការបញ្ចប់កាស៊ើបអង្កេតរបស់ខ្លួនមូលហេតុនៃមរណភាពរបស់ លោក អៀង សារី។ សហព្រះរាជអាជ្ញាបានធ្វើសេចក្តីសន្និដ្ឋានថា មរណភាពរបស់លោក អៀង សារី កាលពីថ្ងៃទី១៤ ខែមីនា ឆ្នាំ២០១៣ នៅក្នុងមន្ទីរពេទ្យមិត្តភាពខ្មែរ-សូវៀត គឺដោយសារមូលហេតុធម្មជាតិ។
សេចក្ដីសន្និដ្ឋានចុងក្រោយ ស្តីពីមូលហេតុមរណភាពរបស់លោក អៀង សារី គឺបានបញ្ជាក់ថា គាត់ស្លាប់ដោយសារមូលហេតុធម្មជាតិ នាម៉ោង ៨:៤៥នាទីព្រឹក នៅថ្ងៃទី១៤ ខែមីនា ឆ្នាំ២០១៣ ដែលបណ្តាលមកពីជំងឺស្ទះសរសៃឈាមបេះដូង ដែលមិនអាចធ្វើឲ្យប្រសើរឡើងវិញបាន និងបណ្ដាលមកពីការស្ពៀតសរសៃឈាមចិញ្ចឹមបេះដូងដែលមានជាយូរមកហើយ តាំងពីមុនការចាប់ខ្លួន និងការជាប់ឃុំឃាំងនៅសាលាក្តីមកម្ល៉េះ។
ការរកឃើញនេះត្រូវបានបញ្ជាក់អះអាងដោយ របាយការណ៍វេជ្ជសាស្ត្រចុងក្រោយ និងលិខិតបញ្ជាក់មរណភាពដែលបានចេញដោយក្រុមគ្រូពេទ្យព្យាបាល លោក អៀង សារីបណ្តាឯកសារនានាដែលជាប្រវត្តិវេជ្ជសាស្ត្រជាយូរមកហើយ ចម្លើយរបស់ក្រុមគ្រូពេទ្យនិងបុគ្គលិកពេទ្យដទៃទៀតដែលមានវត្តមាននៅពេលមរណភាពរបស់គាត់ និងចម្លើយរបស់កូនស្រីលោក អៀង សារី។
មិនមានកាលៈទេសៈដ៏គួរឲ្យសង្ស័យណាមួយ ដែលទាក់ទងនឹងមរណភាពរបស់លោក អៀង សារី ត្រូវបានរកឃើញ នៅពេលធ្វើការស៊ើបអង្កេតនោះទេ។
យោងតាមសេចក្តីប្រកាសព័ត៌មាន ដោយសារមានភ័ស្តុតាងច្បាស់លាស់ និងភាពស៊ីសង្វាក់គ្នាចំពោះមូលហេតុនៃមរណភាពនេះ ការវះកាត់សាកសពលោក អៀង សារី ដើម្បីធ្វើការពិនិត្យ គឺពុំចាំបាច់ឡើយ ហើយការធ្វើពិសោធន៍ដើម្បីរកជាតិពុលក្នុងឈាមរបស់គាត់ដោយសហព្រះរាជអាជ្ញា ក៏ពុំចាំបាច់ដែរ។
បន្ថែមពីលើនេះ ក្រុមគ្រួសាររបស់ អៀង សារី និងអតីតក្រុមមេធាវីការពារក្តីរបស់គាត់ បានបង្ហាញសំណើរបស់ខ្លួនថា ពួកគាត់មិនមានបំណងអនុវត្តការវះកាត់សាកសពដើម្បីពិនិត្យ ឬត្រូវការរបាយការណ៍ជាតិពុលឡើយ។
អនុលោមតាមវិធាន ៣២ ស្ទួន នៃវិធានផ្ទៃក្នុង របាយការណ៍ទាំងស្រុងនៃប្រវត្តិនៃរបាយការណ៍សុខភាពរបស់លោក អៀង សារី ត្រូវបានចាត់ថ្នាក់ជាឯកសារសំងាត់បំផុត ហើយមិនអាចបង្ហាញជាសាធារណៈបានឡើយ៕
© រក្សាសិទ្ធិដោយ thmeythmey.com