ខ្មែរក្រហម
ជាតិ
ន័រវេ និងស៊ុយអ៊ែតជាអ្នកផ្តល់ថវិកាសង្គ្រោះបុគ្គលិកជាតិនៅសាលាក្តីខ្មែរក្រហម ![](https://image.thmeythmey.com/pictures/2013/04/07/eccc.jpg)
×![]()
បុគ្គលិកជាតិចំនួន២៧០នាក់នៅសាលាក្តីខ្មែរក្រហមបានទទួលប្រាក់បៀវត្សរ៍៣ខែរបស់ពួកគេហើយកាលពីថ្ងៃសុក្រ និងថ្ងៃសៅរ៍នេះ។ នេះបើតាមការអះអាងរបស់អ្នកនាំពាក្យរបស់សាលាក្តីខ្មែរក្រហម លោកនេត ភក្ត្រាដែលបានប្រាប់គេហទំព័រថ្មីៗ នៅថ្ងៃអាទិត្យនេះ។
អ្នកនាំពាក្យដដែលបានបន្តថា ការិយាល័យរដ្ឋបាលនៃតុលាការពិសេសកូនកាត់នេះក៏បានធ្វើលិខិតអរគុណអង្គការសហប្រជាជាតិនិងប្រទេសដៃគូចំនួន២ គឺន័រវេ និងស៊ុយអ៊ែត ដែលបានផ្តល់ថវិកាជាមូលនិធិសង្គ្រោះបន្ទាន់ដល់បុគ្គលិកជាតិក្នុងសាលាក្តីខ្មែរក្រហម។ លោកនេត ភក្ត្រាបានបន្ថែមយ៉ាងដូច្នេះ៖«បុគ្គលិកជាតិទាំងអស់ក៏នឹងទទួលបានប្រាក់បៀវត្សរដល់ខែមេសានេះដែរ។ ហើយសម្រាប់ខែបន្តបន្ទាប់ទៀតនោះ រដ្ឋាភិបាល អង្គការសហប្រជាជាតិ និងប្រទេសផ្តល់ជំនួយកំពុងធ្វើការរួមគ្នាដើម្បីធ្វើយ៉ាងណាធានាថាមិនអោយមានបញ្ហាថវិកាទៀតនៅក្នុងឆ្នាំ២០១៣នេះ។ មានប្រទេសខ្លះបានគ្រោងប្រកាសផ្តល់ថវិកានៅពេលខាងមុខដែរ។ យើងនៅរងចាំមើល»។
នៅថ្ងៃស្អែកទី៨មេសានេះ សវនាការសំណុំរឿង០០២នឹងដំណើរបន្តជាធម្មតាពេញមួយសប្តាហ៍ដើម្បីស្តាប់សាក្សី និងអ្នកជំនាញ៕
© រក្សាសិទ្ធិដោយ thmeythmey.com