អន្តរជាតិ
អាស៊ាន នៅតែមិនទាន់កំណត់ពេលច្បាស់នៃការផ្តល់សមាជិកភាពផ្លូវការឲ្យទីម័រខាងកើត ![](https://image.thmeythmey.com/pictures/2017/08/07/timor.jpg)
×![]()
ការរំពឹងថា ទីម័រខាងកើត អាចទទួលបានសមាជិកភាពពេញលេញរបស់អាស៊ាននៅឆ្នាំ២០១៧នេះ ហាក់ដូចជាស្ថិតនៅក្នុងភាពស្រពិចស្រពិលខ្លាំង ។ នោះក៏ព្រោះតែ តាមរយៈសេចក្តីថ្លែងការណ៍អាស៊ានចុងក្រោយបង្អស់នេះ នៅតែមិនបញ្ជាក់ពីកាលបរិច្ឆេទជាក់លាក់សម្រាប់ការបញ្ចូលសមាជិកទី១១របស់ខ្លួនដដែល ។
រដ្ឋមន្ត្រីការបរទេសអាស៊ាន នៅថ្ងៃទី០៦ សីហា បានចេញសេចក្តីថ្លែងការណ៍រួមមួយ ក្រោយបញ្ចប់កិច្ចប្រជុំរដ្ឋមន្ត្រីការបរទេសលើកទី៥០ ។ សេចក្តីថ្លែងការណ៍ ដែលចេញផ្សាយឡើងជាមួយនឹងភាពចម្រូងចម្រាស់ជាច្រើននោះ ក៏បានបញ្ជាក់ដំណើរការនៃក្លាយទៅជាសមាជិកអាស៊ានរបស់ទីម័រខាងកើតផងដែរ ។
សេចក្តីថ្លែងការណ៍នោះ បញ្ជាក់យ៉ាងដូច្នេះថា៖ «យើង (អាស៊ាន) បានកត់សម្គាល់ពីបែបបទរបស់ទីម័រខាងកើតសម្រាប់ការទទួលបានសមាជិកភាពអាស៊ាន និងទន្ទឹងរង់ចាំកិច្ចពិភាក្សាជាបន្ត និងរបាយការណ៍ ដែលធ្វើឡើងដោយក្រុមការងារសម្របសម្រួលអាស៊ានដើម្បីពិនិត្យមើលពីលទ្ធផលដែលបានពីការសិក្សាជាឯករាជ្យនៃដំណើរការក្លាយជាសមាជិកអាស៊ានរបស់ទីម័រខាងកើតលើសសរស្តម្ភទាំងបីរបស់អាស៊ាន»។
សេចក្តីថ្លែងការណ៍ដដែលនោះ បានបន្តទៀតថា អាស៊ាន ស្វាគមន៍ចំពោះការចូលរួមរបស់ទីម័រខាងកើតនៅក្នុងសកម្មភាពពាក់ព័ន្ធផ្សេងទៀតក្នុងក្របខណ្ឌអាស៊ាន ។ នេះ ក៏មានន័យថា អាស៊ាន ត្រូវការពេលវេលាបន្ថែមទៀត ដើម្បីសិក្សាពីលទ្ធភាពរបស់ទីម័រខាងកើត មុនផ្តល់សមាជិកភាពរបស់អាស៊ានជាផ្លូវការ ។
សូមរម្លឹកផងដែរថា ទីម័រខាងកើត គឺជារដ្ឋក្មេងខ្ចីនៅអាស៊ីអាគ្នេយ៍មួយ ។ ទីម័រខាងកើត ទើបតែទទួលបានឯករាជ្យពេញលេញនៅឆ្នាំ២០០២ប៉ុណ្ណោះនោះទេ ។ រដ្ឋមួយនេះ បានដាក់សំណើសុំក្លាយជាសមាជិកអាស៊ានទី១១តាំងពីឆ្នាំ២០១១មកម្ល៉េះ ក៏ប៉ុន្តែ មកទល់ពេលនេះ អាស៊ាន នៅមិនទាន់មានភ្លើងខៀវក្នុងការពន្លឿនការផ្តល់ សមាជិកភាពដល់ទីម័រខាងកើតនៅឡើយនោះទេ។ រយៈពេលចុងក្រោយនេះ មានសមាជិកអាស៊ានមួយចំនួន ដែលរួមបញ្ចូលទាំងកម្ពុជាផងដែរនោះ បានបង្ហាញពីការគាំទ្រទីម័រខាងកើតដើម្បីទទួលបានសមាជិកភាពពេញលេញអាស៊ានផងដែរ ៕
Tag:
អាស៊ាន
ទីម័រខាងកើត
© រក្សាសិទ្ធិដោយ thmeythmey.com