ជាតិ
អតីតនិស្សិតខ្មែរពីជប៉ុន នឹងរៀបចំពិធី«លៀងសាយភោជន៍» ដើម្បីរៃអង្គាសថរិកាជួយដល់និស្សិតក្រីក្រ ![](https://image.thmeythmey.com/pictures/2017/12/14/141220171626front.jpg)
×![]()
សមាគមអតីតនិស្សិតខ្មែរពីប្រទេសជប៉ុន(JAC)នឹងរៀបចំកម្មវិធី«លៀងសាយភោជន៍ផ្តាច់ឆ្នាំចាស់២០១៧» ដើម្បីរៃអង្គាសថរិកា យកទៅជួយឧបត្ថម្ភដល់និស្សិតក្រីក្រកម្ពុជា ដែលមកពីបណ្ដាខេត្តមកសិក្សានៅភ្នំពេញ ។កម្មវិធីនេះនឹងប្រព្រឹត្តទៅ នាល្ងាចថ្ងៃសៅរ៍ ទី១៦ ខែធ្នូ ឆ្នាំ២០១៧ នៅភោជនីយដ្ឋាន ខេមា ឡាប៉ុស្ត៍(Khéma La Poste) រាជធានីភ្នំពេញ។
លោក វុទ្ធី មុនីរ័ត្ន ប្រធានសមាគមអតីតនិស្សិតខ្មែរពីប្រទេសជប៉ុន(JAC)បានប្រាប់សារព័ត៌មានថ្មីៗថា សមាគមនឹងរៀបចំកម្មវិធីនេះក្នុងគោលបំណង ដើម្បីបង្កើនចំណងមិត្តភាព ក៏ដូចជាបង្កើតនូវបណ្តាញទំនាក់ទំនងល្អ ជាមួយអតីតនិស្សិតខ្មែរ ដែលបានបញ្ចប់ការសិក្សាពីប្រទេសជប៉ុន និងធុរជនជប៉ុននៅកម្ពុជា។ ជាពិសេសកម្មវិធីនេះ ក៏មានគោលបំណង ប្រមូលប្រាក់ឧបត្ថម្ភពីបណ្តាក្រុមហ៊ុន និងសប្បុរសជននានា យកទៅជួយឧបត្ថម្ភដល់និស្សិតក្រីក្រមកពីបណ្ដាខេត្ត ដែលកំពុងបន្តការសិក្សានៅរាជធានីភ្នំពេញផងដែរ។
ប្រធានសមាគមរូបនេះមើលឃើញដូច្នេះថា៖« ការជួយឧបត្ថម្ភដល់មនុស្សដែលខិតខំតស៊ូរៀនសូត្រ តាមរយៈ ចំណេះ ជំនាញ ដែលពួកគេកំពុងតែសិក្សានៅឯសាកលវិទ្យាល័យនឹងធ្វើឲ្យពួកគេមានសមត្ថភាពគ្រប់គ្រាន់ អាចជួយខ្លួនឯង ក៏ដូចជាក្រុមគ្រួសារនាពេលអនាគត។ មួយវិញទៀត និស្សិតទាំងនោះ នឹងក្លាយជាជនគំរូនៅក្នុងសហគមន៍ជាពិសេស ពួកគេនឹងក្លាយខ្លួនជាធនធាន ដ៏ល្អសម្រាប់សង្គមជាតិ ផងដែរ»។
![](https://image.thmeythmey.com/pictures/2017/12/14/thumb2/1.jpg)
លោកសង្ឃឹមថា សាធារណជន និងអតីតនិស្សិតខ្មែរដែលធ្លាប់សិក្សានៅប្រទេសជប៉ុន នឹងចូលរួមគាំទ្រកម្មវិធីនេះ ដើម្បីជាចំណែកមួយជួយដល់និស្សិតក្រីក្រ ដែលកំពុងសិក្សានៅគ្រឹះស្ថានឧត្តមសិក្សា ក្នុងរាជធានីភ្នំពេញ។ កន្លងមកសមាគមបានផ្ដល់ជាអាហារូបករណ៍ដល់និស្សិត នៅវិទ្យាស្ថានជាតិបណ្តុះបណ្តាលបច្ចេកទេស និងសាលាកសិកម្មជាតិព្រែកលៀប។
គួរបញ្ជាក់ថា សមាគមអតីតនិស្សិតខ្មែរពីប្រទេសជប៉ុន(JAC) បានរៀបចំកម្មវិធី នេះជារៀងរាល់ឆ្នាំ ដើម្បីជួបជុំអតីតនិស្សិតខ្មែរដែលធ្លាប់ទៅសិក្សានៅប្រទេសជប៉ុន និងជនជាតិជប៉ុនដែលកំពុងស្នាក់នៅប្រទេសកម្ពុជា៕
© រក្សាសិទ្ធិដោយ thmeythmey.com