កញ្ញា មិន ចិន្តា ខំរៀនព្រោះចង់ក្លាយជាគំរូ និងក្ដីសង្ឃឹមសម្រាប់ជនពិការ

ជាតិ

កញ្ញា មិន ចិន្តា ខំរៀនព្រោះចង់ក្លាយជាគំរូ និងក្ដីសង្ឃឹមសម្រាប់ជនពិការ

30, Dec 2017 , 7:59 am

រូបភាព

ដោយ: ថ្មីៗ

កញ្ញា មិន ចិន្ដា ជាយុវតីមួយរូបដែលមានបញ្ហាខ្សោយគំហើញ ប៉ុន្តែនាងបានតស៊ូរៀនសូត្ររហូតបញ្ចប់ថ្នាក់បរិញ្ញាបត្រផ្នែកចិត្តវិទ្យា ក្នុងឆ្នាំ២០១៦ ។ បច្ចុប្បន្ននាងកំពុងបម្រើការងារនៅក្រសួងសង្គមកិច្ច អតីតយុទ្ធជន និងយុវនីតិសម្បទា និងកំពុងរៀនបំប៉នភាសាអង់គ្លេស ដើម្បីប្រឡងអាហារូបករណ៍ទៅសិក្សានៅក្រៅប្រទេស។ កញ្ញា មិន ចិន្តា អះអាងថា នាងខំប្រឹងរៀនព្រោះចង់ឲ្យខ្លួនក្លាយជាគំរូ និងជាក្តីសង្ឃឹមសម្រាប់ជនពិការដទៃទៀត។

កញ្ញា មិន ចិន្ដា ជាយុវតីមួយរូបដែលមានបញ្ហាខ្សោយគំហើញ(មើលឃើញព្រាលៗ)ដែលបានតស៊ូរៀនសូត្រ រហូតបញ្ចប់ថ្នាក់បរិញ្ញាបត្រផ្នែកចិត្តវិទ្យា ក្នុងឆ្នាំ២០១៦ ។ មានវ័យ២៧ឆ្នាំ កញ្ញា ចិន្តា បានរំពឹងឡើងវិញថា នៅក្នុងអំឡុងពេលសិក្សា ចាប់តាំងពីឆ្នាំទី១មក នាងបានព្យាយាមបញ្ជ្រាបខ្លួនឯងទៅក្នុងសង្គម តាមរយៈការងារស្ម័គ្រចិត្តនៅតាមអង្គការក្រៅរដ្ឋាភិបាល ដូចជានៅអង្គការ VSO និងអង្គការCDMD ក្នុងនាមអ្នកស្វែងរកមតិគាំទ្រ ដើម្បីឱ្យអាជ្ញាធរដាក់បញ្ចូលផ្នែកពិការភាពទៅក្នុងផែនការអភិវឌ្ឍន៍ភូមិឃុំ។ នាងក៏ធ្លាប់ស្ម័គ្រចិត្ត នៅក្នុងអង្គការ HI ជាជំនួយការផ្នែកបច្ចេកទេសផងដែរ។

តាមយុវតីដដែល ការងារភាគច្រើនដែលខ្លួនបានធ្វើ គឺការបកប្រែភាសាបរទេស ទាក់ទងនឹងការស្រាវជ្រាវផ្នែកចិត្តសាស្ត្រ ទៅលើការគាំទ្រផ្នែកចិត្តសាស្ត្រ និងការលើកទឹកចិត្ត។ ការស្ម័គ្រចិត្តដូច្នេះ ត្រូវបានកញ្ញា មិន ចិន្តា ពន្យល់ថា នាងចង់បង្ហាញឲ្យសង្គមបានឃើញ ទោះបីខ្លួនមានបញ្ហាភ្នែកក៏ដោយ ប៉ុន្តែនាងមានសមត្ថភាពដូចមនុស្សធម្មតាដែរ។ កញ្ញា មិន ចិន្តា បញ្ជាក់ដូច្នេះ៖«ចាប់ផ្ដើមឈានជើងចូលសាកលវិទ្យាល័យ ខ្ញុំព្យាយាមបញ្ជ្រាបខ្លួនចូលទៅក្នុងសង្គម ដើម្បីឱ្យគេបានដឹងបានឮថា ស្ត្រីជនពិការក៏អាចរៀនបានច្រើន និងមានសមត្ថភាពធ្វើការ ដូចគេឯងដែរ»។

បច្ចុប្បន្ន ចិន្ដា ដែលជាកូនច្បង ក្នុងចំណោមបងប្អូន៤នាក់រូបនេះ កំពុងធ្វើការនៅក្រសួងសង្គមកិច្ចផ្នែកអគ្គលេខាធិការដ្ឋានសកម្មភាពជនពិការ និងបកប្រែឯកសារមួយចំនួនពីភាសាខ្មែរ ទៅភាសាអង់គ្លេស ដើម្បីផ្សាយលើគេហទំព័ររបស់ក្រសួងសង្គមកិច្ច និងជួយបកប្រែសម្រាប់ជនបរទេសដែលមិនចេះភាសាខ្មែរ។ ចិន្តា ក៏ទទួលបានអាហាររូបករណ៍សិក្សាភាសាអង់គ្លេស នៅមជ្ឈមណ្ឌលអូស្ត្រាលីដើម្បីការអប់រំ(ACE)ផង ដែលភាសាអង់គ្លេសនេះ សំខាន់ខ្លាំង ដើម្បីឲ្យចិន្តាតោងចាប់យកអាហាររូបករណ៍ថ្នាក់អនុបណ្ឌិតនៅប្រទេសអូស្ត្រាលី ផ្នែកពិការភាព។ ទោះមិនហ៊ានសង្ឃឹមនឹងអាចប្រឡងជាប់ តែយ៉ាងណា ចិន្តា នៅបោះបង់ នឹងប្តេជ្ញាប្រឹងរៀនភាសាឲ្យពូកែ។ ចិន្តា បញ្ជាក់ដូច្នេះ៖«ខ្ញុំអត់ហ៊ានសង្ឃឹមច្រើនថានឹងបានជាប់ទៅរៀននៅអូស្ត្រាលីទេ ព្រោះភាសាអង់គ្លេសរបស់ខ្ញុំពេលនេះ នៅមានកម្រិត។ តែទោះយ៉ាងណា ក៏ខ្ញុំខំប្រឹងដែរ ព្រោះវាជាបំណងប្រាថ្នារបស់ខ្ញុំ»។

ក្រៅពីចង់ទៅសិក្សាក្រៅប្រទេស ហើយយកចំណេះមកបម្រើប្រទេសកម្ពុជាវិញ ចិន្តាចង់ឲ្យខ្លួនឯង ក្លាយទៅគំរូ និងជាក្ដីសង្ឃឹមសម្រាប់ជនពិការដទៃទៀត តាមរយៈការខំប្រឹងរៀនសូត្រ រហូតបានជោគជ័យក្នុងកិច្ចការងារអ្វីមួយរបស់នាង។ សម្រាប់យុវតីដែលមានបញ្ហាគំហើញរូបនេះ ថាខ្លួនសោកស្តាយពន់ពេក នៅពេលបានដឹងថាជនពិការដទៃទៀត បានបោះបង់ចោលការសិក្សា ដោយហេតុផងផ្សេងៗ ហើយការមិនស្រវារកចំណេះវិជ្ជាជាប់ខ្លួននេះ នឹងធ្វើឲ្យពួកគេបាត់បង់ឱកាស នាពេលអនាគត។ នេះជាកាបន្ថែមរបស់ កញ្ញា មិន ចិន្តា ដែលបានធៀបខ្លួន ដែលរៀនបានបរិញ្ញាបត្រទៅហើយ នៅតែរងការរើសអើងដោលប្រយោល។ ចិន្តា បានបន្តដោយចោទសួរដូច្នេះថា ៖ ចុះទម្រាំអ្នកពិការដែលរៀនបានច្រើន នឹងទៅជាយ៉ាងណា? ដូច្នេះ«ខ្ញុំសំណូមពរដល់អ្នកដែលមិនឱ្យតម្លៃដល់ការសិក្សា ឱ្យខំប្រឹងប្រែងរៀនឡើងវិញ បើពុំនោះទេទៅថ្ងៃអនាគត គេនឹងស្ដាយក្រោយ។ ហើយពេលនោះ អ្វីៗហួសពេលទៅហើយ»៕