កីឡាជាតិ
ជាតិ
ភ្នំពេញក្រោនមិនបន្តកិច្ចសន្យាជាមួយ កុក បូរីស ក្រោយរួមរស់ជាមួយគ្នា៥ឆ្នាំ
× ក្លិបភ្នំពេញក្រោនបានសម្រេចមិនបន្តកិច្ចសន្យាជាមួយកីឡាករខ្មែរ-បារាំង កុក បូរីស សម្រាប់រដូវកាលថ្មីឆ្នាំ២០១៨។ កុក បូរីស បានមករួមរស់ជាមួយភ្នំពេញក្រោនតាំងពីឆ្នាំ២០១២ ដោយបានជួយឲ្យក្រុមនេះលើកពានក្របខណ្ឌលីគកំពូលកម្ពុជា២លើក។
«លាហើយភ្នំពេញក្រោន»។ ជាសាររបស់កីឡាករខ្មែរ-បារាំង កុក បូរីស សរសេរលើទំព័រហ្វេសប៊ុកផ្លូវការដោយភ្ជាប់ជាមួយរូប ថតអនុស្សាវរីយ៍លើកពាន អ្នកគាំទ្រ និងអតីតកីឡាករភ្នំពេញក្រោនជាច្រើនសន្លឹក។ ក្នុងន័យនេះ កុក បូរីស ចង់បញ្ជាក់ថា រូបគេគ្មានវត្តមានក្នុងក្រុមភ្នំពេញក្រោនសម្រាប់រដូវកាលឆ្នាំ២០១៨ ឡើយ។
ទន្ទឹមនឹងការសុំអធ្យាស្រ័យពីសំណាក់អ្នកគាំទ្រក្រុមភ្នំពេញក្រោន កុក បូរីស បានលើកឡើងថា ការចាកចេញនេះមិនមែនជាការសម្រេចរបស់គេនោះទេ គឺជាការសម្រេចរបស់ថ្នាក់ដឹកនាំក្លិបភ្នំពេញក្រោន។ បូរីស បានបញ្ជាក់ថា៖«អ្នកចាត់ការទូទៅក្លិបភ្នំពេញក្រោនថ្មីបាននិយាយថា ពួកគេមិនត្រូវការខ្ញុំសម្រាប់រដូវកាលក្រោយនោះទេ ដូច្នេះយើងត្រូវធ្វើតាមការសម្រេចនេះ»។
ខ្សែការពារខ្មែរ-បារាំងរូបនេះ បានយកឱកាសនេះរំលឹកអនុស្សាវរីយ៍ជាមួយអតីតមិត្តរួមក្រុមជម្រើសជាតិ អតីតកីឡាករ និងកីឡាករភ្នំពេញក្រោន។ កីឡាករដែល បូរីស នឹកដល់ទាំងនោះរួមមាន គួច សុគម្ភៈ, ឃីម បូរី, ស៊ូ យ៉ាទី, ហុង ផេង, សុះ ស៊ូហាណា, ឡេង មករា, គួច ដានី, ធារី ចន្ថាប៊ីន, អ៊ុក សុទ្ធី, កែវ សុខផេង, វ៉ា សុខថន និងកីឡាករបរទេសជាច្រើនរូបទៀត។
កុក បូរីស បានចំណាយពេលរួមរស់ជាមួយក្រុមភ្នំពេញចាប់ពីឆ្នាំ២០១២ដល់ឆ្នាំ២០១៧។ រូបគេបានជួយឲ្យក្រុមភ្នំពេញក្រោនលើកពានក្របខណ្ឌលីគកំពូលកម្ពុជាពីររដូវកាលជាប់គ្នា គឺនៅឆ្នាំ២០១៤ និង២០១៥។ បូរីស មិនត្រឹមតែជាខ្សែការពារឆ្នើមរបស់ភ្នំពេញក្រោននោះទេ ថែមទាំងជាសមាជិកដ៏ល្អក្នុងក្រុមជម្រើសជាតិកម្ពុជាអំឡុងឆ្នាំ២០១៥ ទៀតផង៕
Tag:
បាល់ទាត់
ភ្នំពេញក្រោន
កុក បូរីស
© រក្សាសិទ្ធិដោយ thmeythmey.com