ជាតិ
ឃុំខ្លួនជនបរទេស១០នាក់ ពាក់ព័ន្ធនឹងសកម្មភាពរាំច្រៀងបែបអាសអាភាស រូបភាពពីអគ្គស្នងការដ្ឋាននគរបាលជាតិ
× ភ្នំពេញ៖ ជនបរទេសចំនួន១០នាក់ ត្រូវបានអាជ្ញាធរឃុំខ្លួននៅពន្ធនាគារខេត្តសៀមរាប ដោយសារតែសកម្មភាពនាំភ្ញៀវទេសចររាំច្រៀងបែបអាសអាភាស។ ជនជាប់ចោទទាំង១០នាក់ ត្រូវចោទពីបទ«រូបភាព និងសម្ភារអាសអាភាស តាមមាត្រា ៣៩ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។ នេះបើតាមលោកស្រី ដួង ថាវរី ស្នងការរងនគរបាលខេត្តសៀមរាប ដែលបានប្រាប់សារព័ត៌មានថ្មីៗតាមទូរសព្ទ នៅថ្ងៃទី២៩ ខែមករានេះ។
តាមស្នងការរងដដែល ក្នុងប្រតិបត្តិការនេះ អាជ្ញាធរប្រមូលបានភ្ញៀវទេសចរចំនួន៧៧នាក់ ក្នុងនោះស្រី៣៦នាក់ និងក្រុមអ្នករៀបចំចំនួន១០នាក់ ដែលជនសង្ស័យ និងដែលកំពុងច្រៀងរាំជារបៀបអាសអាភាស។ ប៉ុន្តែភ្ញៀវទេសចរទាំង៧៧នាក់ ត្រូវបានសមត្ថកិច្ចដោះលែងវិញ ក្រោយអប់រំរួច។ ស្នងការរងនគរបាលខេត្តដដែល បញ្ជាក់បន្តដូច្នេះ៖«ជនបរទេសទាំង ១០នាក់ដែលជាម្ចាស់ទីតាំងរាំច្រៀង ត្រូវបានបញ្ជូនទៅឃុំខ្លួននៅពន្ធនាគារខេត្ត ដែលស្ថិតក្នុងដំណាក់កាលស៊ើបអង្កេតរបស់ព្រះរាជអាជ្ញា»។
លោកស្រី ដួង ថាវរី ក៏បានឲ្យដឹងដែរថា កន្លងមកអាជ្ញាធរបានចុះធ្វើកិច្ចសន្យាម្ដងរួចមកហើយទាក់ទងនឹងការបិទទីតាំងរាំច្រៀងបែបអាសអាភាសនេះ ប៉ុន្តែសកម្មភាពសកម្មភាពនាំភ្ញៀវទេសចររាំច្រៀងបែបអាសអាភាសនេះ នៅតែបន្ត ទើបអាជ្ញាធរចុះបង្ក្រាបតាមច្បាប់។
ក្នុងចំណោមជនបរទេសទាំង១០នាក់ មានជនជាតិអង់គ្លេស៦ នាក់ ញ៉ូសេឡែនម្នាក់ កាណាដា២នាក់ និងម្នាក់ទៀតមិនបានបញ្ជាក់អត្តសញ្ញាណ។ ពួកគេត្រូវឃាត់ខ្លួន កាលពីថ្ងៃទី២៥ ខែមករា នៅទីតាំងមួយកន្លែង ក្នុងភូមិគ្រួស សង្កាត់ស្វាយដង្គំ ខេត្តសៀមរាប។
តាមមាត្រា៣៩ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ជនណាចែកចាយ លក់ ជួល ដាក់តាំង បញ្ចាំង ឬបង្ហាញនៅទីសាធារណៈនូវរូបភាព និងសម្ភារអាសអាភាស ត្រូវផ្តន្ទាទោសដាក់ពន្ធនាគារពី៧ថ្ងៃ ដល់១ខែ និងពិន័យជាប្រាក់ពី ១សែនរៀល ទៅ២សែនរៀល។ មាត្រាដដែលចែងទៀតថា ជនណាកាន់កាប់ ដឹកជញ្ជូន នាំចូល ឬនាំចេញរូបភាព ឬសម្ភារអាសអាភាស ក្នុងគោលដៅយកទៅប្រើប្រាស់ ក្នុងការប្រព្រឹត្តបទល្មើសខាងលើ ត្រូវផ្តន្ទាទោសដូចកថាខណ្ឌទី១ខាងលើដែរ។ ចំណែកឯជនណាផលិតរូបភាព និងសម្ភារអាសអាភាស ក្នុងគោលដៅយកទៅប្រើប្រាស់ នៅក្នុងាការប្រព្រឹត្តបទល្មើសណាមួយ ដូចកថាខណ្ឌទី១ និងទី២ ត្រូវផ្តន្ទាទោសដាក់ពន្ធនាគារពី១ខែ ដល់១ឆ្នាំ និងពិន័យជាប្រាក់ពី ២សែនរៀល ដល់២លានរៀល៕
Tag:
ជនបរទេស
អាសអាភាស
© រក្សាសិទ្ធិដោយ thmeythmey.com