ប៉ូលិសកម្ពុជាជាង៥០០នាក់ នឹងទទួលបានការបំពាក់បំប៉នជំនាញពីវៀតណាម

ជាតិ

ប៉ូលិសកម្ពុជាជាង៥០០នាក់ នឹងទទួលបានការបំពាក់បំប៉នជំនាញពីវៀតណាម

30, Jan 2018 , 9:44 am

រូបភាព

ដោយ:

នគរបាលជាតិកម្ពុជាចំនួន ៥២០នាក់ នឹងទៅសិក្សាលើជំនាញចំនួននៅប្រទេសវៀតណាម។ ការសិក្សានេះ មានវគ្គរយៈពេលវែងកម្រិតមហាវិទ្យាល័យ និងកម្រិតមធ្យម នៅឆ្នាំ២០១៨នេះ ដោយស្ថិតនៅក្រោមការបណ្ដុះលបណ្ដាលរបស់ក្រសួងនគរបាលវៀតណាម។

បើតាមគេហទំព័រអគ្គស្នងការដ្ឋានគរបាលជាតិ នាយឧត្តមសេនីយ៍ គៀត ច័ន្ទថារិទ្ធ អ្នកនាំពាក្យនៃអគ្គស្នងការដ្ឋានគរបាលជាតិ បានផ្ដល់បទសម្ភាសដល់ក្រុមសារព័ត៌មាន ក្រោយចប់ពិធីចុះហត្ថលេខាផែនការសហប្រតិបត្តិការឆ្នាំ២០១៨ រវាងក្រសួងមហាផ្ទៃកម្ពុជា និងក្រសួងនគរបាលវៀតណាម កាលពីរសៀលថ្ងៃទី២៨ ខែមករា នៅទីស្តីការក្រសួងមហាផ្ទៃថា ក្រៅពីបណ្ដុះបណ្ដាលនគរបាលជាតិកម្ពុជា វៀតណាមនឹងជួយសម្ភារបច្ចេកទេសមួយចំនួន បូករួមទាំងជួយក្នុងការសាងសង់សាលសហសិក្សាមួយសម្រាប់សាលានគរបាលកម្ពុជាផងដែរ។

អ្នកនាំពាក្យនៃអគ្គស្នងការដ្ឋានគរបាលជាតិរូបនេះ បានលើកឡើងទៀតថា រដ្ឋមន្ត្រីក្រសួងនគរបាលវៀតណាម លោក តូ ឡាំ (TO LAM) បានសុំឲ្យអាជ្ញាធរកម្ពុជា អនុវត្តការផ្តល់លិខិតស្នាមស្របច្បាប់ ចំពោះជនអន្តោប្រវេសន៍វៀតណាមឲ្យបានឆាប់។

នៅក្នុងពិធីចុះហត្ថលេខាផែនការសហប្រតិបត្តិការឆ្នាំ២០១៨ រវាងកម្ពុជា-វៀតណាម ភាគីទាំងពីរបានពិភាក្សាផ្តោតទៅលើចំណុចសំខាន់ៗ ចំនួន៣គឺ ទី១ ការត្រួតពិនិត្យ វាយតម្លៃ អំពីសភាពការណ៍សន្តិសុខ និងកិច្ចសហប្រតិបត្តិការរក្សាសន្តិសុខ សណ្តាប់ធ្នាប់រវាងប្រទេសទាំងពីរ, ទី២-ការវាយតម្លៃអំពីកិច្ចសហប្រតិបត្តិការរវាងកងកម្លាំងនគរបាលទាំងពីររយៈពេល១ឆ្នាំកន្លងមក, និងទី៣ ការវាយតម្លៃអំពីការអនុវត្តផែនការឆ្នាំ២០១៧ ទាក់ទងទៅនឹងការបំពាក់បំប៉ន បណ្តុះបណ្តាលមន្ត្រី ពាក់ព័ន្ធ និងការផ្លាស់ប្តូរប្រតិភូ ការព្យាបាលជំងឺ និងពាក់ព័ន្ធដល់ការផ្តល់ជំនួយបច្ចេកទេស ព្រមទាំងពិភាក្សាគ្នាដើម្បីកំណត់ទិសដៅសំខាន់ៗនៃកិច្ចសហប្រតិបត្តិការឆ្នាំ២០១៨នេះ។

សូមរម្លឹកថា ក្នុងឆ្នាំ២០១៧ កម្ពុជា បានបញ្ជូនមន្ត្រីនគរបាល៤៩២នាក់ ទៅសិក្សានៅប្រទេសវៀតណាម៕