កូនគោលបន្ថែមសមាជិកប្រតិបត្តិថ្មី៥រូប និងដាក់ផែនការ៨ចំណុចសម្រាប់ឆ្នាំ២០១៨

កីឡាជាតិ

ជាតិ

កូនគោលបន្ថែមសមាជិកប្រតិបត្តិថ្មី៥រូប និងដាក់ផែនការ៨ចំណុចសម្រាប់ឆ្នាំ២០១៨

04, Apr 2018 , 9:26 am

រូបភាព

ដោយ:

សហព័ន្ធកីឡាវាយកូនគោលកម្ពុជា រៀបចំសន្និបាតបូកសរុបការងារប្រចាំឆ្នាំ២០១៧ និងដាក់ទិសដៅអនុវត្តន៍សម្រាប់ឆ្នាំ២០១៨ កាលពីថ្ងៃទី២ មេសា ឆ្នាំ២០១៨ នៅទីស្នាក់ការនៃគណៈកម្មាធិការជាតិអូឡាំពិកកម្ពុជា(NOCC)។ ក្នុងសន្និបាតនោះ សហព័ន្ធបានបង្ហាញសមាជិកប្រតិបត្តិថ្មីចំនួន៥រូប និងដាក់ផែនសកម្មភាព៨ចំណុច ដើម្បីអភិវឌ្ឍន៍វិស័យកីឡាវាយកូនគោលនៅកម្ពុជា។

ក្រោយសមាជិកប្រតិបត្តិ៣រូបរួមមានលោក នូ អេលីដែន លោក ពៅ ពេជ្រមេត្តា និងលោក ថោង សុខាំមុន្នី សុំលាឈប់ ដើម្បីយកពេលវេលាហ្វឹកហាត់ពង្រឹងសមត្ថភាពក្នុងក្រុមជម្រើសជាតិ។ សហព័ន្ធកីឡាវាយកូនគោលកម្ពុជា បានបន្ថែមសមាជិកថ្មី៥រូប ដើម្បីជំនួសតំណែងសមាជិកទាំងនេះ ក៏ដូចជាទ្រទ្រង់ដំណើរការអភិវឌ្ឍន៍វិស័យកីឡាវាយកូនគោលនៅកម្ពុជា។

ក្នុងនោះលោកឧត្តមសេនីយ៍ សៅ ច័ន្ទតារា និងលោក សុខ សុធីរ៉ា ត្រូវបានតែងតាំងជាអគ្គលេខាធិការរង រីឯលោក កែវ រស់ អគ្គហិរញ្ញឹក និងអ្នកស្រី តិម៉ា វិច្ឆកាល និងលោក សុខ វណ្ណា ជាសមាជិក ខណៈសមាជិកប្រតិបត្តិដែលសុំលាឈប់ទាំងបីមានតួនាទីជាសមាជិក។

«ដោយសារសមាជិកប្រតិបត្តិរបស់យើងចំនួន៣រូប ដែលជាកីឡាករជម្រើសជាតិ គាត់សុំសម្រាកពីការងារ ដើម្បីយកពេលហ្វឹកហាត់ពង្រឹងសមត្ថភាព សហព័ន្ធបានសម្រេចបន្ថែមសមាជិកថ្មី៥រូបមកជំនួស។ ការបន្ថែមនេះ វាធ្វើឲ្យយើងមានកម្លាំងកាន់តែច្រើនក្នុងការចូលរួមគាំទ្រ និងលើកស្ទួយវិស័យកីឡាកូនគោលរបស់យើង»។ នេះជាការលើកឡើងរបស់អគ្គលេខាធិការសហព័ន្ធ លោក ជា បូរ៉ា ពេលតំណាងសម្តេច ទៀ បាញ់ ប្រធានសហព័ន្ធ ក្នុងសន្និបាតបូកសរុបការងារឆ្នាំ២០១៧ និងទិសដៅសម្រាប់ឆ្នាំ២០១៨ កាលពីថ្ងៃទី២ មេសា ឆ្នាំ២០១៨ នៅទីស្នាក់ការ NOCC។

ទន្ទឹមនឹងនេះ លោក ជា បូរ៉ា ជំរុញឲ្យមន្ត្រីសហព័ន្ធ និងអ្នកពាក់ព័ន្ធទាំងអស់ ត្រូវបន្តអនុវត្តន៍ការងារក្នុងដែនសមត្ថកិច្ចរៀងៗខ្លួនក្នុងស្មារតីយកចិត្តទុកដាក់ជាមួយទំនួលខុសត្រូវខ្ពស់ ដើម្បីសម្រេចគោលដៅតាមផែនការយុទ្ធសាស្ត្រ៤ឆ្នាំរំកិលរបស់ NOCC។ ការជំរុញនេះ ដើម្បីបង្កើនគុណផលកីឡាវាយកូនគោលឲ្យឈានទៅរកកម្រិតខ្ពស់សម្រាប់ត្រៀមស៊ីហ្គេមឆ្នាំ២០២៣ដែលកម្ពុជាធ្វើជាម្ចាស់ផ្ទះ។

ដើម្បីជួយជំរុញដល់ការអភិវឌ្ឍន៍វិស័យកីឡាវាយកូនគោលឲ្យកាន់តែមានប្រសិទ្ធភាព សហព័ន្ធកីឡាវាយកូនគោលកម្ពុជាបានដាក់ចេញផែនការយុទ្ធសាស្ត្រចំនួន៨ចំណុចរួមមាន បើកសាលាបណ្តុះបណ្តាលកីឡាវាយកូនគោលសម្រាប់កុមារ និងយុវជន, ប្រមូលផ្តុំយុវជនថ្នាលដើម្បីការហ្វឹកហាត់, ប្រមូលផ្តុំកីឡាករកីឡាការិនីជម្រើសជាតិ, បញ្ជូនកីឡាករទៅហ្វឹកហាត់នៅបរទេស, ប្រកួតពានរង្វាន់ថ្នាក់ដឹកនាំ, ត្រៀមកីឡាករដើម្បីចូលរួមប្រកួតកីឡាជាតិ, ជ្រើសរើសគ្រូបង្វឹកកុមារ ថ្នាល និងយុវជន និងបណ្តុះបណ្តាលអាជ្ញាកណ្តាលចៅក្រម និងច្បាប់នៃកីឡាវាយកូនគោល។

សមាជិកប្រតិបត្តិរបស់សហព័ន្ធកីឡាវាយកូនគោលកម្ពុជាមាន១១រូបរួមមាន សម្តេច ទៀ បាញ់ ប្រធាន, លោក ឯក សុខចាន់ អនុប្រធាន, លោក ជា បូរ៉ា អគ្គលេខាធិការ, លោក ស៊ឹម ស៊ូយុង, លោកឧកញ៉ា ឆោម សំបូរ, លោក ម៉ុន សុខជា, លោក សៅ ច័ន្ទតារា និងលោក សុខ សុធីរ៉ា អគ្គលេខាធិការរង, លោក កែវ រស់ អគ្គហិរញ្ញឹក និងអ្នកស្រី តិម៉ា វិច្ឆកាល និងលោក សុខ វណ្ណា ជាសមាជិក៕