ជាតិ
អតីតមន្ត្រីបក្សប្រឆាំង ត្រូវបានអនុញ្ញាតឲ្យជួបអ្នកជាប់ឃុំ លើកលែងតែលោក មាជ សុវណ្ណារ៉ា ![លោក អ៊ូ ច័ន្ទរ័ត្ន អតីតតំណាងរាស្ត្រគណបក្សសង្គ្រោះជាតិ។ រូពពីគេហទំព័ររបស់គណបក្សសង្គ្រោះជាតិ](https://image.thmeythmey.com/pictures/2018/04/04/chanroth.jpg)
លោក អ៊ូ ច័ន្ទរ័ត្ន អតីតតំណាងរាស្ត្រគណបក្សសង្គ្រោះជាតិ។ រូពពីគេហទំព័ររបស់គណបក្សសង្គ្រោះជាតិ
×![]()
បន្ទាប់ពីស្នើសុំម្តងជាពីរដង អគ្គនាយកដ្ឋានពន្ធនាគារ បានយល់ព្រមឲ្យលោក អ៊ូ ច័ន្ទរ័ត្ន អតីតតំណាងរាស្ត្រ គណបក្សសង្គ្រោះជាតិ ចូលជួបលោក អ៊ុំ សំអាន អតីតតំណាងរាស្ត្រដូចគ្នា រួមទាំងសកម្មជនជាង១0នាក់ផ្សេងទៀត ដែលកំពុងជាប់ឃុំក្នុងពន្ធនាគារ។ លោក អ៊ូ ច័ន្ទរ័ត្ន ប្រាប់ថា លោក និងអតីតមន្ត្រីបក្សប្រឆាំង២នាក់ទៀត នឹងចូលទៅជួបអ្នកជាប់ឃុំទាំងនោះ ក្នុងពន្ធនាគារព្រៃស នៅព្រឹកថ្ងៃទី៥ ខែមេសា ឆ្នាំ២0១៨។
លោក អ៊ូ ច័ន្ទរ័ត្ន បានប្រាប់សារព័ត៌មានថ្មីៗ តាមទូរសព្ទយ៉ាងដូច្នេះថា៖«យើង អរគុណអគ្គនាយកដ្ឋានពន្ធនាគារ ដែលយោគយល់ និងអនុញ្ញាតឲ្យបានចូលសួរសុខទុក្ខពួកគាត់។ យើង នឹករលឹកពួកគេ ក្នុងនាមជាសហការី ដែលធ្លាប់ធ្វើការជាមួយគ្នា»។
យ៉ាងណាក៏ដោយ អគ្គនាយកដ្ឋានពន្ធនាគារ មិនអនុញ្ញាតឲ្យលោក អ៊ូ ច័ន្ទរ័ត្ន ជួបលោក មាជ សុវណ្ណារ៉ា អតីតមន្រ្តីជាន់ខ្ពស់គណបក្សសង្គ្រោះជាតិ នោះទេ។ តាមរយៈលិខិត ដែលផ្ញើជូនលោក អ៊ូ ច័ន្ទរ័ត្ន អគ្គនាយកដ្ឋានពន្ធនាគារ បានលើកហេតុផលថា លោក មាជ សុវណ្ណារ៉ា បានប្រព្រឹត្តបទល្មើស ដែលផ្ទុយពីបទបញ្ជាផ្ទៃក្នុងរបស់ពន្ធនាគារ។
កាលពីប៉ុន្មានថ្ងៃមុន មានព័ត៌មានលេចឮថា លោក មាជ សុវណ្ណារ៉ា បានលួចប្រើប្រាស់ទូរសព្ទក្នុងពន្ធនាគារ។ សូម្បីតែសម្តេចនាយករដ្ឋមន្ត្រី ហ៊ុន សែន ក៏ប្រតិកម្មនឹងរឿងនេះដែរ រហូតដល់ព្រមានដកមេពន្ធគារចេញពីតំណែង បើគ្រប់គ្រងមិនបានល្អ។
គួររម្លឹកថា កាលពីអំឡុង ខែតុលា ឆ្នាំ២០១៦ លោក អ៊ុំ សំអាន ត្រូវបានតុលាការ កាត់ទោសជាប់ពន្ធនាគារ ២ឆ្នាំ ៦ខែ និងពិន័យជាប្រាក់៤លានរៀល ពីបទ«ញុះញង់នាំឲ្យមានការរើសអើង និងប្រព្រឹត្តបទឧក្រិដ្ឋជាអាទិ៍» ទាក់ទងនឹងការរិះគន់ពីបញ្ហាព្រំដែន។
រីឯ លោក មាជ សុវណ្ណារ៉ា រួមទាំងសកម្មជនបក្សប្រឆាំងជាង១០នាក់ទៀត ត្រូវបានកាត់ទោសឲ្យជាប់ពន្ធគារ ពី៧ឆ្នាំ ទៅ២០ឆ្នាំ។ តុលាការ បានចោទពួកគេថា បានចូលរួម និងដឹកនាំធ្វើកុបកម្មប្រឆាំងអាជ្ញាធរសាធារណៈ នៅក្បែរទីលានប្រជាធិបតេយ្យ កាលពីខែកក្កដា ឆ្នាំ២០១៤៕
© រក្សាសិទ្ធិដោយ thmeythmey.com