អន្តរជាតិ
អាមេរិកប្ដេជ្ញាចិត្តសហការជាមួយកូរ៉េខាងជើងបង្កើតសន្តិភាពនៅឧបទ្វីបកូរ៉េ លោក Mike Pompeo (រូបភាព AFP)
× រដ្ឋមន្ត្រីការបរទេសអាមេរិក Mike ប៉ុមប៉េអូ នៅថ្ងៃទី៩ ខែឧសភា កំពុងស្ថិតនៅរដ្ឋធានីព្យុងយ៉ាងដើម្បីជជែកជាមួយមន្ត្រីកូរ៉េខាងជើងជុំវិញគម្រោងជំនួបរវាងប្រធានាធិបតី ដូណាល់ ត្រាំ និងមេដឹកនាំកំពូល គីម ជុងអ៊ុន ។ ក្នុងជំនួបជាមួយមន្ត្រីជាន់ខ្ពស់កូរ៉េខាងជើងលោក គីម យ៉ុងឈុល លោក ប៉ុមប៉េអូ បានប្រកាសជំហររបស់អាមេរិកក្នុងការធ្វើការជាមួយកូរ៉េខាងជើងសំដៅបង្កើតសន្តិភាពនៅឧបទ្វីបកូរ៉េ។
ជាសត្រូវស៊ីសាច់ហុតឈាមអស់ពេលជាច្រើនទសវត្សរ៍ អាមេរិក និងកូរ៉េខាងជើងស្រាប់តែប្រកាសជំហរធ្វើការជាមួយគ្នាដើម្បីសម្រេចឲ្យបានសន្តិភាពនៅឧបទ្វីបកូរ៉េ។ ការប្រកាសនេះធ្វើឡើងក្នុងជំនួបថ្ងៃទី៩ ខែឧសភា រវាងរដ្ឋមន្ត្រីការបរទេសអាមេរិក ម៉ៃ ប៉ុមប៉េអូ (Mike Pompeo) និងលោក គីម យ៉ុងឈុល (Kim Yong-chol) ប្រធានរណសិរ្សរួបរួមកូរ៉េ។ លោក ប៉ុមប៉េអូ ស្ថិតក្នុងដំណើរទស្សនកិច្ចលើកទីពីរនៅកូរ៉េខាងជើងដើម្បីរៀបចំជំនួបមេដឹកនាំប្រទេសទាំងពីរ។
ក្នុងការចរចាជាមួយមន្ត្រីជាន់ខ្ពស់កូរ៉េខាងជើង លោក ប៉ុមប៉េអូ និយាយថា អាមេរិក និងកូរ៉េខាងជើងធ្វើជាសត្រូវរាប់ទសវត្សរ៍មកហើយ ហើយអាមេរិកសង្ឃឹមក្នុងចិត្តថា អតីតបច្ចាមិត្តទាំងពីរអាចធ្វើការជាមួយគ្នាដើម្បីដោះស្រាយបញ្ហា លុបបំបាត់ការគំរាមកំហែងពិភពលោក។ ប្រមុខការទូតអាមេរិកក៏ចង់ធ្វើការជាមួយកូរ៉េខាងជើងដើម្បីផ្ដល់ឱកាសឲ្យប្រជាជនកូរ៉េខាងជើងផងដែរ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
តបការលើកឡើងរបស់មន្ត្រីអាមេរិក លោក គីម ដែលជាមនុស្សជំនិតរបស់មេដឹកនាំកូរ៉េខាងជើង គីម ជុងអ៊ុន ក៏បានបង្ហាញក្ដីរំពឹងថា អាមេរិកនឹងដើរនាទីធំក្នុងការបង្កើតសន្តិភាពនៅឧបទ្វីបកូរ៉េ។ ភ្លាមៗនោះ មន្ត្រីការទូតជាន់ខ្ពស់របស់អាមេរិកក៏ឆ្លើយវិញថា អាមេរិកប្ដេជ្ញាចិត្តក្នុងការសហការជាមួយកូរ៉េខាងជើងដើម្បីសម្រេចឲ្យបានគោលដៅសន្តិភាពនេះ។
លោក ប៉ុមប៉េអូ និងមន្ត្រីកូរ៉េខាងជើង នឹងបញ្ចប់របៀបវារៈសម្រាប់ជំនួបលោក ត្រាំ និងលោក គីម ដែលគ្រោងរៀបចំនៅដំណាច់ខែឧសភា ឬដើមខែមិថុនាខាងមុខ។ មេដឹកនាំអាមេរិក និងកូរ៉េខាងជើងនឹងជជែកពីការលុបបំបាត់នុយក្លេអ៊ែររបស់កូរ៉េខាងជើង ខណៈលោក គីម បានអះអាងហើយថា ក្រុងព្យុងយ៉ាងមានឆន្ទៈឥតងាករេក្នុងការដោះស្រាយបញ្ហានេះ ប៉ុន្តែចង់ធ្វើជាដំណាក់កាល។ រីឯអាមេរិកចង់ឲ្យការរំសាយនុយក្លេអ៊ែរនេះតែម្ដង ដែលមិនអាចបកក្រោយបាន៕
Tag:
អាមេរិក
កូរ៉េខាងជើង
Mike ប៉ុមប៉េអូ
© រក្សាសិទ្ធិដោយ thmeythmey.com