អន្តរជាតិ
គីម៖ រំសាយអាវុធកូរ៉េខាងជើងជោគជ័យផ្អែកទាំងស្រុងលើការបញ្ចប់អរិភាពរវាងអាមេរិកនិងកូរ៉េខាងជើងផ្ទាល់ ![](https://image.thmeythmey.com/pictures/2018/06/13/nuke.jpg)
×![]()
ក្នុងជំនួបប្រវត្តិសាស្ត្រត្រាំ-គីម នៅសិង្ហបុរី មេដឹកនាំកំពូលកូរ៉េខាងជើងប្រាប់មេដឹកនាំអាមេរិកថា ការរំសាយអាវុធនុយក្លេអ៊ែរកូរ៉េខាងជើងពឹងផ្អែកសំខាន់លើការបញ្ឈប់ការការសម្ងែងសាច់ដុំប្រឆាំងគ្នាទៀតរវាងអាមេរិក និងកូរ៉េខាងជើងផ្ទាល់។
លោក គីម ជុងអ៊ុន បានឯកភាពក្នុងជំនួបជាមួយលោក ដូណាល់ ត្រាំ ថា លោកមានឆន្ទៈពិតប្រាកដក្នុងការរំសាយអាវុធនុយក្លេអ៊ែរ។ ប៉ុន្តែលោកសង្កត់ធ្ងន់ថា ការរំសាយអាវុធនេះជោគជ័យឬអត់ពឹងផ្អែកទាំងស្រុងលើឥរិយាបថរបស់អាមេរិក និងកូរ៉េផ្ទាល់។ ទីភ្នាក់ងារព័ត៌មានកូរ៉េខាងជើង KCNA បានចេញផ្សាយនៅព្រឹកថ្ងៃពុធទី ១៣ ខែមិថុនានេះ។
តាមកាសែតរដ្ឋកូរ៉េខាងជើងដដែល លោក គីម ជឿជាក់ថា ការបញ្ឈប់រាល់សកម្មភាពបង្ហាញសាច់ដុំ ប្រឆាំងគ្នាទៅវិញទៅមកជាមូលដ្ឋានគ្រឹះសំខាន់បំផុតក្នុងការឈានទៅសម្រេចគោលដៅនេះ។
«លោក គីម ជុងអ៊ុន បាននិយាយថា ដើម្បីសម្រេចសន្តិភាព និងស្ថិរភាពនៅឧបទ្វីបកូរ៉េ និងសម្រេចបានការរំសាយអាវុធនុយក្លេអ៊ែរនោះ ភាគីទាំងពីរគួរប្តេជ្ញាចិត្តចៀសវាងឲ្យបានរាល់ការប្រឆាំងគ្នាទៅវិញទៅមក ដោយមិនមានការយល់ពីគ្នា»។ នេះជាការបញ្ជាក់របស់ទីភ្នាក់ងារព័ត៌មាន KCNA។
ក្រោយមានជំនួបលើកដំបូងនេះ គេសង្កេតឃើញមានសញ្ញាវិជ្ជមានច្រើនកើតឡើងក្នុងទំនាក់ទំនងទ្វេភាគីរវាងអាមេរិក និងកូរ៉េខាងជើងដែលធ្លាប់ជាសត្រូវស៊ីសាច់ហុតឈាមគ្នារាប់សតវត្សរ៍នោះ។ គេរំពឹងថា វានឹងលែងមានការផ្លាស់ប្តូរសម្តីគំរាមកំហែងគ្នា ឬផ្លាស់ប្តូរគ្រាប់មីស៊ីលទៀតហើយនៅពេលអនាគត។ ផ្ទុយទៅវិញវានឹងបន្តមានត្រឹមការផ្លាស់ប្តូរមតិយោបល់ និង ពាក្យសម្តីរវាងគ្នាប៉ុណ្ណោះ។
ក្នុងជំនួបម្សិលមិញនេះដែរ ទំនងជាបង្ហាញឆន្ទៈធានាសន្តិសុខកូរ៉េខាងជើង លោក ត្រាំ បានប្រកាសបញ្ឈប់សមយុទ្ធយោធាជាមួយសម្ព័ន្ធមិត្តកូរ៉េខាងត្បូង ដោយលើកហេតុផលថា សមយុទ្ធនេះចំណាយលុយច្រើន ហើយវាក៏ជាសកម្មភាពបង្ករឿងដូចគ្នា។
ក្រៅពីនេះ លោក ត្រាំ បានអញ្ជើញលោក គីម ទៅទស្សនកិច្ចនៅអាមេរិក ខណៈដែលលោក គីម ក៏បានអញ្ជើញលោក ត្រាំ ទៅក្រុងព្យុងយ៉ាងដូចគ្នាដែរក្នុងជំនួបនេះ។ មេដឹកនាំទាំងពីរសុទ្ធតែទទួលលិខិតអញ្ជើញនេះដោយរីករាយដូចគ្នា។
ដោយឡែក បើតាមសេចក្តីថ្លែងការណ៍សិង្ហបុរី ចំណុចសំខាន់បួនត្រូវបានគូភាគីកំណត់ទទួលយក។ក្នុងចំណោមនេះ មេដឹកនាំកូរ៉េខាងជើងបានប្តេជ្ញាចិត្តក្នុងការអនុវត្តសេចក្តីថ្លែងការណ៍រួមប៉ាន់មុនចុមដែលត្រូវបានបង្កើតរួមគ្នាជាមួយកូរ៉េខាងត្បូងកាលពីចុងខែមេសា។ វាមានគោលដៅបន្តជំរុញការរំសាយអាវុធនុយក្លេអ៊ែរផងដែរ។
Tag:
គីម ជុងអ៊ុន
នុយក្លេអ៊ែរ
កូរ៉េខាងជើង
ដូណាល់ ត្រាំ
© រក្សាសិទ្ធិដោយ thmeythmey.com