ភ្នំពេញ៖ បុគ្គលិកព្រលានយន្តហោះខេត្តសៀមរាប១៦១នាក់ តវ៉ាឲ្យមន្ទីរការងារខេត្តដាក់វិវាទរបស់ពួកគេ ជាវិវាទរួម ដើម្បីងាយស្រួលដោះស្រាយ។ ប៉ុន្តែប្រធានការិយាល័យដោះស្រាយវិវាទការងារខេត្តសៀមរាប អះអាងថា វិវាទនេះគឺមានតែដោះស្រាយតាមផ្លូវតុលាការ ដោយសារភាគីបុគ្គលិកមិនព្រមចូលចរចា។
នៅព្រឹកថ្ងៃទី២២ ខែមករា ឆ្នាំ២០២១នេះ បុគ្គលិកព្រលានយន្តហោះខេត្តសៀមរាប១៦១នាក់ បានតវ៉ាឲ្យមន្ទីរការងារខេត្តដាក់វិវាទរបស់ពួកគេ ជាវិវាទរួម។ វិវាទនេះ កើតឡើង ក្រោយពីក្រុមហ៊ុនព្រលានយន្តហោះ បានបញ្ឈប់និងប្ដូរតួនាទីរបស់ពួកគេ ដោយមិនបានបំពេញតាមលក្ខខណ្ឌនៃការជម្រុះបុគ្គលិកនៃច្បាប់ការងារ។
លោក រ៉ង រ៉ាវណ្ណ ប្រធានសហជីពព្រលានយន្តហោះខេត្តសៀមរាប និងជាប្រធានសហព័ន្ធសហជីពកម្មករវិស័យដឹកជញ្ជូនកម្ពុជា (CTWF) បញ្ជាក់ថា ការដាក់ជាវិវាទរួម គឺងាយស្រួលសម្រាប់បុគ្គលិកក្នុងការដោះស្រាយវិវាទព្រោះមានអ្នកតំណាងជួយដោះស្រាយ។
បុគ្គលិកព្រលានយន្តហោះសៀមរាបតវ៉ានៅមុខមន្ទីរការងារ។ (រូបពី៖ ទំព័រហ្វេសប៊ុករបស់ CTWF)
ក្នុងកិច្ចសម្ភាសន៍ជាមួយសារព័ត៌មានថ្មីៗ លោក រ៉ាវណ្ណ ថ្លែងថា៖«វិវាទរួម គឺខាងមន្ទីរបញ្ជូនសំណុំរឿងទៅក្រុមប្រឹក្សាអាជ្ញាកណ្ដាល ហើយភាគីបុគ្គលិកដែលជាអ្នកតំណាងឬសហជីព និងក្រុមហ៊ុននឹងចូលរួមចរចាដោះស្រាយគ្នា។ បើវិវាទបុគ្គលវិញ ប្រសិនចរចាគ្នាមិនត្រូវ ភាគីទាំងពីរ បុគ្គលិកនិងក្រុមហ៊ុនអាចបន្តបាន ដោយដាក់ពាក្យបណ្ដឹងទៅតុលាការ ហេតុនេះ ពួកគាត់មិនសូវយល់ពីច្បាប់គឺពិបាក»។
ជុំវិញវិវាទនេះ ប្រធានមន្ទីរការងារខេត្តសៀមរាប លោក ចិន្តា សុខុម ជំរុញឲ្យទៅសួរក្រសួងការងារ ដោយសារកន្លងមក ក្រុមបុគ្គិលកទាំងនោះ បានដាក់លិខិតទៅក្រសួង ដើម្បីសំកិច្ចអន្តរាគមន៍ ប៉ុន្តែក្រសួងបញ្ជូនឲ្យមន្ទីរដោះស្រាយវិញ ដោយចាត់ទុកជាវិវាទបុគ្គល។
ចំណែក ប្រធានការិយាល័យដោះស្រាយវិវាទការងារខេត្តសៀមរាប លោក ផេង ឆេងលី អះអាងថា កាលពីថ្ងៃទី២២ ខែមករា ក្រុមបុគ្គលិទាំងនោះ បានបោះបង់សិទ្ធិចរចាហើយ ដោយដើរចេញមិនព្រមចរចា។ លោក បញ្ជាក់ថា៖«កាលថ្ងៃហ្នឹង ខ្ញុំមិនទាន់បានសាកសួរព័ត៌មានពួកគាត់ (បុគ្គលិកព្រលានយន្តហោះ) អីទេ មិនដឹងភាគីក្រុមហ៊ុនបញ្ឈប់ពួកគាត់បានអនុវត្តតាមច្បាប់ការងារមាត្រា៩៥ ដែលពិនិត្យលក្ខខណ្ឌលើបុគ្គលិកឬអត់ផង គាត់ក៏នាំគ្នាដើរចេញ។ គាត់មិនសហការ មិនចូលរួមដោះស្រាយផងហ្នឹង អ៊ឺចឹងបើគាត់មិនពេញចិត្ត ក្នុងការដោះស្រាយវិវាទរបស់មន្ទីរផង មានតែដោះស្រាយតាមតុលាការ...»។
បុគ្គលិកព្រលានយន្តហោះសៀមរាបតវ៉ានៅមុនមន្ទីរការងារនៅថ្ងៃទី២២ មករា ឆ្នាំ២០២១។ (រូបពី៖ ទំព័រហ្វេសប៊ុករបស់ CTWF)
កាលពីដើមខែធ្នូ ឆ្នាំ២០២០ បុគ្គលិកព្រលានយន្តហោះទាំង១៦១នាក់ ត្រូវបានក្រុមហ៊ុនបញ្ឈប់ការងារ១៣០នាក់ ហើយ៣១នាក់ទៀតគឺប្ដូរតួនាទី ក្រោមហេតុផលវិបត្តិកូវី-១៩។ នេះបើតាមការអះអាងរបស់លោក រ៉ង រ៉ាវណ្ណ ដោយបន្ថែមថា បុគ្គលិកទាំងអស់ដែលទាមទារនៅថ្ងៃនេះ ក៏ស្នើឲ្យក្រុមហ៊ុនទទួលពួកគេចូលបំពេញការងារវិញដែរ។
លោក បញ្ជាក់ថា៖«ក្រុមហ៊ុនបញ្ឈប់ក្រុមពួកខ្ញុំ មិនស្របតាមច្បាប់ការងារគឺមិនពិនិត្យលក្ខខណ្ខបុគ្គលិកណាដែលអតីតភាពការងារតិច បន្ទុកគ្រួសារតិច ជាដើម។ ក្រុមហ៊ុនចុចឈ្មោះបញ្ឈប់យកតែម្ដង ដែលភាគច្រើនជាសមាជិកសហជីពខ្ញុំ។ ប្រសិនចង់ជម្រុះបុគ្គលិក ត្រូវធ្វើតាមលក្ខខណ្ឌច្បាប់ បើពិនិត្យទៅសមស្រប ពួកគាត់ យល់ព្រម»។
ជុំវិញបញ្ហានេះ សារព័ត៌មានថ្មីៗ មិនអាចសុំការបកស្រាយពីលោក ផន ដា ប្រធានរដ្ឋបាលនៅព្រលានយន្តហោះបានឡើយ ដោយលោក ប្រាប់ថា លោក សុំច្បាប់សម្រាក នៅកន្លែងការងារ ហើយមិនទាន់ទទួលបានព័ត៌មានជុំវិញការតវ៉ារបស់បុគ្គលិកព្រលានយន្តហោះនេះឡើយ។
មេសហជីព លោក រ៉ង រ៉ាវណ្ណ អះអាងថា ប្រាក់អត្ថប្រយោជន៍ផ្សេងៗភាគីក្រុមហ៊ុនបានទូទាត់ឲ្យបុគ្គលិក ប៉ុន្តែទូទាត់មិនត្រូវតាមរូបមន្តនៃច្បាប់ការងារឡើយ។ លោក និយាយថា ប្រសិនបើគ្មានដំណោះស្រាយ ចំពោះការតវ៉ាស្នើឲ្យដាក់វិវាទទាំងនេះ ជាវិវាទរួមនោះទេក្រុមលោកនឹងដាក់លិខិតទៅក្រសួងការងាសុំការអន្តរាគមន៍បន្តទៀត៕