ជាតិ
×![]()
ដោយ: ថ្មីៗ
កម្ពុជា នឹងធ្វើជាម្ចាស់ផ្ទះ ក្នុងការរៀបកិច្ចប្រជុំសភាតំបន់អាស៊ី លើកទី៨ ក្រោមប្រធាន «ការជំរុញសន្តិភាព ការផ្សះផ្សា និងការសន្ទនាក្នុងតំបន់អាស៊ី» នៅថ្ងៃទី៧ ខែធ្នូ ឆ្នាំ២០១៥ ។ មហាសន្និបាតនេះ នឹងប្រព្រឹត្តទៅរយៈពេល៦ថ្ងៃ គឺចាប់ពីថ្ងៃទី ៧ ដល់ថ្ងៃទី១២ ខែធ្នូ ឆ្នាំ២០១៥ នៅសណ្ឋាគារសុខាភ្នំពេញ ដោយមានប្រធាន ឬថ្នាក់ដឹកនាំជាន់ខ្ពស់នៃរដ្ឋសភា ព្រឹទ្ធសភា ពីបណ្តាប្រទេសជាសមាជិកសភាតំបន់អាស៊ី យ៉ាងតិចំនួន២៣ប្រទេសចូលរួម ជាមួយនឹងវត្តមានគណៈប្រតិភូបណ្តាប្រទេសជាអ្នកសង្កេតការណ៍ អង្គការដៃគូរបស់សភាតំបន់អាស៊ី ជាច្រើនទៀត។ តើអ្វីជាសភាតំបន់អាស៊ី?
សភាតំបន់អាស៊ី មានឈ្មោះជាភាសាអង់គ្លេសថា «Asian Parliamentary Assembly» និងហៅកាត់ថា APA ត្រូវបានបង្កើតឡើងនៅក្នុងឆ្នាំ២០០៦ ។ ការពិត APA បានប្តូរមកពី សមាគមសភាអាស៊ី ដើម្បីសន្តិភាព ហៅកាត់ថា AAPP ។ សភាប្រទេសកម្ពុជា ជាសមាជិកស្ថាបនិកAAPP ដែលបានប្រសូតឡើងនៅឆ្នាំ១៩៩៩ ។ AAPP ជាស្ថាប័នមួយ ដែលបានប្រមូលផ្តុំសំឡេង អ្នកតំណាងប្រជាពលរដ្ឋ នៅក្នុងតំបន់អាស៊ី ឲ្យរួបរួមគ្នាជាធ្លុងតែមួយ ក្នុងគោលដៅស្វែងរកសុខសន្តិភាព និងការផ្សះផ្សាប្រជាជាតិទាំងឡាយនៅក្នុងតំបន់អាស៊ីនេះ ឲ្យក្លាយជាមហាគ្រួសារតែមួយ ទទួលបានសុខសន្តិភាព និងការអភិវឌ្ឍស្មើៗគ្នាដោយចីរភាព។ ដោយបន្តបេសកកម្មពី AAPP សភាតំបន់អាស៊ីAPA បានពង្រីកទាំងទំហំ និងភារកិច្ចរបស់ខ្លួនជាលំដាប់ ដែលរហូតដល់ពេលនេះ APA មានសមាជិកចំនួន៤២ប្រទេស មានអ្នកសង្កេតការណ៍ចំនួន១៦ប្រទេស និងអង្គការជាដៃគូចំនួន១០ ។
ដោយឈរលើគោលបំណងនៃការជំរុញនូវសុខសន្តិភាព និងសមាហរណកម្មសម្រាប់ប្រជាជាតិនៅក្នុងតំបន់អាស៊ី APA បានកំណត់ឲ្យមានជំនួបកំពូលជាមហាសន្និបាតនៃថ្នាក់ដឹកនាំសភា នៃបណ្តាប្រទេសដែលជាសមាជិក និងកិច្ចប្រជុំ គណៈកម្មាធិការនានា ជាទៀងទាត់ប្រចាំឆ្នាំ ដើម្បីប្រមូលនូវឆន្ទៈរួម ដំណោះស្រាយរួម យុទ្ធសាស្ត្ររួម ដាក់ជូនដល់អ្នកអនុវត្តច្បាប់ គឺរដ្ឋាភិបាលនៃប្រទេសនីមួយៗនៃរដ្ឋ ជាសមាជិក APA ដើម្បីធានាឲ្យបាននូវសុខសន្តិភាពសម្រាប់ប្រជាពលរដ្ឋនៅក្នុងតំបន់ ក៏ដូចជាពិភពលោក។
ក្នុងរយៈពេល១៦ឆ្នាំ ដែលកម្ពុជាបានចូលរួមជាស្ថាបនិក AAPP មក សភាកម្ពុជាធ្លាប់បានទទួលធ្វើជាម្ចាស់ផ្ទះរៀបចំកិច្ចប្រជុំ APA បានជាច្រើនលើកមកហើយ ក្នុងនោះបានទទួលធ្វើជាម្ចាស់ផ្ទះមហាសន្និបាតលើកទី២ របស់AAPP នៅក្នុងឆ្នាំ២០០១ ដើម្បីជំរុញដំណើរការសមាហរណកម្ម APA និងកិច្ចប្រជុំអនុគណៈកម្មាធិការស្តីពី «ការកាត់បន្ថយភាពក្រីក្រក្នុងតំបន់អាស៊ី» នៅឆ្នាំ២០០៩ ។
រហូតមកដល់ពេលនេះ APA បានរៀបចំមហាសន្និបាតចំនួន៧លើក ព្រមទាំងរៀបចំកិច្ចប្រជុំគណៈកម្មការជាច្រើនលើក។ ក្រៅពីព្រះរាជាណាចក្រកម្ពុជា ប្រទេសជាសមាជិកផ្សេងទៀត រួមមានសាធារណរដ្ឋអ៊ីស្លាមអ៊ឺរ៉ង ឥណ្ឌូនេស៊ី ស៊ីរី និងប្រទេសប៉ាគីស្ថាន សុទ្ធតែធ្លាប់បានទទួលរៀបចំមហាសន្និបាតប្រចាំឆ្នាំរបស់ APA ។
ប្រធានបទសំខាន់ៗ ត្រូវបានលើកយកមកពិភាក្សានៅក្នុងជំនួបប្រចាំឆ្នាំទាំងនោះ។ «សាមគ្គីភាពក្នុងតំបន់អាស៊ីដើម្បីសន្តិភាព និងយុត្តិធម៌» ជាប្រធានបទនៃមហាសន្និបាតលើកទី១ របស់APA ដែលបានប្រារព្ធធ្វើនៅប្រទេសអ៊ីរ៉ង់ ក្នុងឆ្នាំ២០០៦ ។ «តួនាទីសភាតំបន់អាស៊ី ក្នុងការពង្រឹងលទ្ធិប្រជាធិបតេយ្យ ឆ្ពោះទៅរកវិបុលភាព សន្តិភាព និងយុត្តិធម៌ នៅក្នុងតំបន់» ជាប្រធានបទនៃមហាសន្និបាតលើកទី៤ ដែលប្រទេសឥណ្ឌូនេស៊ី ជាម្ចាស់ផ្ទះ នៅឆ្នាំ២០០៩ ។ ចំណែកនៅឆ្នាំ២០១៤ កន្លងទៅនេះ មហាសន្និបាតលើកទី៧ របស់ APA ដែលប្រទេសប៉ាគីស្ថានទទួលធ្វើជាម្ចាស់ផ្ទះ បានពិភាក្សាលើប្រធានបទ «កិច្ចស្វះស្វែងរួមគ្នាដើម្បីសម្រេចបាននូវសភាអាស៊ី ក្នុងសតវត្សអាស៊ី»។
សូមបញ្ជាក់ថា បណ្តាប្រទេសទាំងអស់ ដែលជាសមាជិកAPA បានឯកភាពគ្នា ធ្វើការសិក្សាដើម្បីរកមធ្យោបាយមួយ ធ្វើជាផែនទីបង្ហាញផ្លូវក្នុងការផ្លាស់ប្តូរ APA ទៅជា សភាអាស៊ី (AP) នៅពេលអនាគត៕
Tag:
APA
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
