ជាតិ
សង្គមជាតិ
កិច្ចប្រជុំAPA សម្រេចបាននូវលទ្ធផលធំៗចំនួន៤
× កិច្ចប្រជុំសភាតំបន់អាស៊ីុំលើកទី៨ ដែលកម្ពុជាធ្វើជាម្ចាស់ផ្ទះអស់រយៈពេល ៥ថ្ងៃមកនេះ បានបង្កើតសេចក្តីថ្លែងការណ៍រួមមួយ ហៅថា សេចក្តីថ្លែងការណ៍ក្រុងភ្នំពេញ។ សេចក្តីថ្លែងនោះ បានបង្ហាញពីខ្លឹមសារៈសំខាន់ៗចំនួន ៤ ដែលកើតចេញពីមហាសន្និបាត។
សេចក្តីថ្លែងការណ៍ក្រុងភ្នំពេញ បានកើតចេញពីកិច្ចប្រជុំសភាតំបន់អាស៊ី (APA) ដែលប្រារព្ធឡើងអស់រយៈពេល ៥ថ្ងៃ ចាប់ពីថ្ងៃទី ៧ ដល់ ១១ ខែធ្នូនេះ។ ខ្លឹមសារសំខាន់ៗចំនួន ៤ ដែលបានសម្រេចនៅក្នុងសេចក្តីថ្លែងការណ៍ រួមមាន ទីមួយ, ទទួលស្គាល់ថា ប្រជាជនអាស៊ី គឺជាប្រជាជន ដែលបានបង្កើតនូវអារ្យធម៌ដ៏ត្រចះត្រចង់ រួមទាំងទស្សនវិទ្យា មនោគមវិទ្យា សាសនា វប្បធម៌ សិល្បៈ។ លើសពីនេះទៀត ប្រជាជននៃទ្វីបអាស៊ី ក៏បានសម្រេចនូវជោគជ័យដ៏ធំធេង ផ្នែកវិទ្យាសាស្រ្ត និងបច្ចេកវិទ្យា ដើម្បីបំពេញតម្រូវការរបស់សង្គម។
ទីពីរ, រួមគ្នាប្តេជ្ញាថា មិនត្រូវព្រងើយកន្តើយចំពោះគំនិតជ្រុលនិយម ដែលអាចបណ្តាលឲ្យមានអំពើហិង្សា និងអំពើភេវរកម្ម មកលើប្រជាជាតិអាស៊ីទាំងមូល។ គំនិតជ្រុលនិយមនេះ ដាច់ខាតមិនត្រូវបានអនុញ្ញាតឲ្យលាយឡំជាមួយ អារ្យធម៌ វប្បធម៌ សាសនា របស់ប្រជាជាតិអាស៊ីឡើយ។
ទីបី, ការខិតខំប្រឹងប្រែង និងការប្តេជ្ញារបស់តំណាងសភាទាំង ២២ប្រទេស បាននាំមកនូវផលប្រយោជន៍ដល់សង្គមនៃប្រទេសនីមួយៗ។ ដោយផ្អែកលើស្មារតីនៃច្បាប់ សភាតំបន់អាស៊ី មិនត្រឹមតែតំណាងឲ្យប្រជាជនអាស៊ី និងឃ្លាំមើលការអនុវត្តរបស់រដ្ឋាភិបាលអាស៊ីប៉ុណ្ណោះទេ តែថែមទាំងមានតួនាទីក្នុងការអនុម័តច្បាប់ និងការលើកកម្ពស់វប្បធម៌សន្ទនា ការផ្សះផ្សា ដើម្បីនាំមកនូវសន្តិភាពទៀតផង។
និងទីបួន, បង្ហាញនូវការប្តូផ្តាច់ និងឆន្ទៈរួម៖
- រួមគ្នាបញ្ឈប់ការប្រើប្រាស់អំពើហិង្សា កម្លាំងប្រដាប់អាវុធ និងសង្គ្រាម ក្នុងការដោះស្រាយបញ្ហា។
- លើកកម្ពស់ នូវគោលការណ៍សន្តិសហវិជ្ជមាន និងការចរចា ក្នុងការដោះស្រាយរាល់បញ្ហា។
- រួមគ្នាប្រឆាំងនឹងអំពើភេវរកម្មគ្រប់ទម្រង់។
- នាំគ្នាអនុវត្តឲ្យបាននូវគោលដៅអភិវឌ្ឍន៍ របស់អង្គការសហប្រជាតិ ដែលហៅកាត់ថា (SDGs)
- ប្រកាន់យកគោលការណ៍នៃច្បាប់អន្តរជាតិទាំងឡាយ ដូចជា ធម្មនុញ្ញនៃអង្គការសហប្រជាតិ លិខិតូបការណ៍ និងអនុសញ្ញាផ្សេងៗ ក្នុងការដោះស្រាយជម្លោះអន្តរជាតិ។
- ចាប់ដៃគ្នាដើម្បីលើកកម្ពស់សន្តិភាព ការផ្សះផ្សា និងការសន្ទនាក្នុងតំបន់អាស៊ី រួមទាំងពង្រឹងលទ្ធិប្រជាធិបតេយ្យ និងនីតិរដ្ឋផងដែរ។
សូមរម្លឹកថា កិច្ចប្រជុំសភាតំបន់អាស៊ីលើកទី៨ នេះ បានចាប់ផ្តើមនៅថ្ងៃទី៧ ខែធ្នូ និងបានបញ្ចប់ទៅវិញ នៅម៉ោង ៥កន្លះរសៀល ថ្ងៃទី១១ ខែធ្នូ ឆ្នាំ២០១៥ ដោយរៀបចំឡើងនៅសណ្ឋាគារសុខាភ្នំពេញ។ លោក ហេង សំរិន ប្រធានរដ្ឋសភាកម្ពុជាត្រូវបានតែងតាំងជាប្រធាននៃមហាសន្និបាតនេះ ដោយមានតំណាងសភាចំនួន ២១ប្រទេស បានមកកម្ពុជា ដើម្បីចូលរួមប្រជុំ៕
© រក្សាសិទ្ធិដោយ thmeythmey.com