បទយកការណ៍ / បទសម្ភាសន៍
លោក វ៉េង មុនី មានមហិច្ឆតាបង្កើតស្ថាប័នស្រាវជ្រាវជំនួញអនឡាញនៅកម្ពុជា
× ភ្នំពេញ៖ លោក វ៉េង មុនី គឺជានិស្សិតអាហារូបករណ៍របស់សហភាពអឺរ៉ុប លើជំនាញគ្រប់គ្រងជំនួញតាមOnline (i-business management) នៅសាកលវិទ្យាល័យ Warwick ចក្រភពអង់គ្លេស។ បុរសវ័យ២២ឆ្នាំ រូបនេះ មានមហិច្ឆតា ស្ពាយជំនាញដ៏កម្រនេះមកកម្ពុជា ដើម្បីបង្កើតស្ថាប័នស្រាវជ្រាវជំនួញតាមអ៊ីនធឺណិត(អនឡាញ) សម្រាប់ជួយដល់និស្សិតផ្សេងទៀត ឲ្យទទួលបានការសិក្សាផង និងធ្វើការងារផង។
ខណៈបណ្តាញសង្គមនៅកម្ពុជាកំពុងមានការរីកចម្រើន លោក វ៉េង មុនី មានបំណង យកចំណេះ និងជំនាញ ជំនួញតាមអ៊ីនធឺណិត(អនឡាញ) ពីចក្រភពអង់គ្លេស ដើម្បីបង្កើតស្ថាប័នស្រាវជ្រាវមួយជាប្រយោជន៍ដល់និស្សិតខ្មែរក្នុងការសិក្សា និងធ្វើការងារ។ «ខ្ញុំនឹងយកជំនាញពាណិជ្ជកម្មតាមអ៊ីនធឺណិតពីចក្រភពអង់គ្លេស ដើម្បីបង្កើតស្ថាប័នស្រាវជ្រាវជំនួញតាមOnline ពីព្រោះ បច្ចុប្បន្ន នៅកម្ពុជាមានរីកចម្រើនផ្នែក Social Media ហើយខ្ញុំជឿថា ប៉ុន្មានឆ្នាំខាងមុខទៀត ជំនួញតាមអនឡាញនឹងមានរីករាលដាលខ្លាំង»។ នេះជាការបញ្ជាក់យ៉ាងម៉ឺងម៉ាត់ របស់លោក វ៉េង មុនី និស្សិតអាហារូបករណ៍ Erasmus+ ដែលនឹងទៅសិក្សាថ្នាក់អនុបណ្ឌិតជំនាញ i-Business management នៅចក្រភពអង់គ្លេស។
កំពុងចូលរួមក្នុងពិធីជូនដំណើរជ័យលាភីអាហារូបករណ៍សហភាពអឺរ៉ុប នៅការិយាល័យសហភាពអឺរ៉ុបប្រចាំនៅកម្ពុជា កាលពីល្ងាចថ្ងៃទី១៩ កក្កដា ឆ្នាំ២០១៦ យុវជនពាក់អាវធំ និងពាក់វ៉ែនតារូបនេះ បានពន្យល់ថា i-business management គឺជាមុខវិជ្ជាមួយ ដែលគេសិក្សាលើការធ្វើពាណិជ្ជកម្មតាមអ៊ីនធឺណិត ដូចជា ការលក់ទំនិញលើអនឡាញ និងសេវាកម្មផ្សេងៗតាមប្រព័ន្ធអ៊ីនធឺណិត។ បន្ទាប់ពីបញ្ចប់អនុបណ្ឌិតនៅចក្រភពអង់គ្លេស លោក វ៉េង មុនី នឹងវិលត្រឡប់មកកម្ពុជា ដោយប៉ងធ្វើការងារនៅក្រសួងព័ត៌មានមួយរយៈពេល និងគ្រោងរៀបចំបង្កើត(Technology Center) ដែលមានការគាំទ្រពីរដ្ឋាភិបាល ដើម្បីឲ្យនិស្សិតបានសិក្សាស្រាវជ្រាវ និងធ្វើការងារនៅទីនេះផង។ លោកពន្យល់បន្ថែមទៀតថា មជ្ឈមណ្ឌលស្រាវជ្រាវបច្ចេកវិទ្យានេះ គឺនឹងធ្វើការងារលើការស្រាវជ្រាវអំពីការធ្វើពាណិជ្ជកម្មតាមប្រព័ន្ធអ៊ីនធឺណិត ដែលលោករំពឹងថា អាជីវកម្មតាមអនឡាញនៅកម្ពុជា នឹងមានការរីកចម្រើននៅប៉ុន្មានឆ្នាំខាងមុខទៀត។
នៅពេលខាងមុខឆាប់ៗនេះ លោក វ៉េង មុនី នឹងឡើងយន្តហោះ ដើម្បីទៅបន្តការសិក្សានៅ បស្ចឹមប្រទេស។ ប៉ុន្តែមុននឹងចាកចេញពីមាតុភូមិ មុនី មិនកំណាញ់ឡើយ ក្នុងការចែករំលែកបទពិសោធន៍ ប្រឡងអាហារូបករណ៍ដល់និស្សិតដទៃទៀត។ មុនី បានប្រាប់សារព័ត៌មានថ្មីៗថា ដំបូង លោករារែកចិត្តក្នុងការប្រឡងយកអាហារូបករណ៍បរទេសដែរ ពីព្រោះលោកយល់ថា មាននិស្សិតពូកែៗជាងលោកច្រើន តែការគិតបែបនេះ គឺជាការគិតខុសឆ្គង។ ក្រោយមក លោកសម្រេចចិត្តប្រឡង ដើម្បីសាកសមត្ថភាពរបស់លោក។ ការខិតខំប្រឹងប្រែង និងការគិតវិជ្ជមាន គឺបានធ្វើឲ្យលោកទទួលបានអាហារូបករណ៍ដូចបំណងមែន ហើយនេះជាលើកទីមួយ ដែលលោកប្រឡងអាហារូបករណ៍ ហើយក៏ទទួលបានអាហារូបករណ៍ទៅសិក្សានៅសាកលវិទ្យាល័យ Warwick ចក្រភពអង់គ្លេស។
លោក មុនី គឺជាអតីតនិស្សិតព័ត៌មានវិទ្យា នៅសាកលវិទ្យាល័យភូមិន្ទភ្នំពេញ(RUPP) និងអក្សរសាស្ត្រអង់គ្លេស នៅវិទ្យាស្ថានភាសាបរទេស(IFL)។ ជាកូនទី២ក្នុងចំណោមបងប្អូន៣នាក់ ដែលកើតនៅភ្នំពេញ យុវជន វ៉េង មុនីបានប្រាប់ពីរបៀបដាក់អាហារូបករណ៍យ៉ាងដូច្នេះ៖«ទីមួយ យើងត្រូវមានបទពិសោធន៍ការងារទាំងក្រៅម៉ោង ឬពេញម៉ោង ស្ម័គ្រចិត្ត ឬយកប្រាក់ខែរយៈពេល២ឆ្នាំ តែបើយើងធ្វើការងារត្រូវជំនាញទៀតនោះ យើងនឹងមានឱកាសច្រើនទទួលអាហារូបករណ៍។ ទីពីរ គឺភាសាអង់គ្លេស ព្រោះយើងសិក្សាជាភាសាអង់គ្លេស (ILតូចបំផុត៦.៥) ទីបី បើយើងសុំអាហារូបករណ៍នៅសាលាល្អ គេយក GPA ខ្ពស់ ទីបួន ខ្ញុំត្រូវសរសេរCV និង Personal Statement ឲ្យបានល្អបំផុត»។
លោកបានបន្ថែមទៀតថា ៖«និស្សិតជាច្រើនភ័យខ្លាចក្នុងដាក់អាហារូបករណ៍ តែកុំខ្លាច ត្រូវគិតថា ទោះបីប្រឡងធ្លាក់ ក៏មិនខាតបង់អ្វីនោះទេ តែផ្ទុយទៅវិញ យើងបានដឹងពីសមត្ថភាពរបស់ខ្លួនឯង និងមានបទពិសោធ ហើយលើកក្រោយយើងខំបន្តទៀត យើងនឹងអាចប្រឡងជាប់ជាមិនខាន»៕
Tag:
វ៉េង មុនី
និស្សិតអាហារូបករណ៍
© រក្សាសិទ្ធិដោយ thmeythmey.com