ជាតិ
សេដ្ឋកិច្ច
អង្គការមួយរបស់ម៉ាឡេស៊ីគ្រោងវិនិយោគលើកម្ចីឥតការប្រាក់នៅកម្ពុជា រូបភាពពី៖ទំព័រហ្វេសប៊ុក CMDF
× អង្គការមួយរបស់ប្រទេសម៉ាឡេស៊ី គ្រោងបើកការវិនិយោគ លើការផ្តល់ឥណទានឥតការប្រាក់ក្នុងប្រទេសកម្ពុជា។ ស្ថាប័នអង្គការឥស្លាមមួយនេះ បានជ្រើសរើសអង្គការមូលនិធិអភិវឌ្ឍន៍មូស្លិមកម្ពុជា (CMDF) របស់លោក អូស្មាន ហាស្សាន់ ជាដៃគូ ដើម្បីអនុវត្តន៍លើគម្រោងឥណទានជាលក្ខណៈឥស្លាមមួយនេះ។
កាលពីថ្ងៃទី២២ កក្កដាកន្លងទៅ ថ្នាក់ដឹកនាំ CMDF បានចុះអនុស្សរណយោគយល់ជាមួយអង្គការ Amanah IKhtiar របស់ប្រទេសម៉ាឡេស៊ី ដើម្បីរៀបចំដំណើរការបើកគ្រឹះស្ថានមីក្រូហិរញ្ញវត្ថុស្តង់ដាឥស្លាមនៅកម្ពុជា។ ស្ថាប័នហិរញ្ញវត្ថុនេះ គ្រោងផ្តល់កម្ចីឥណទានខ្នាតតូច នៅតាមសហគមន៍ ដោយពុំមានគិតការប្រាក់។
លោក សុះ មុះសិន អនុប្រធាន CMDF បានឲ្យដឹងថា ដំណាក់កាលដំបូងស្ថាប័នទាំង២ បានចុះអនុស្សរណ ហើយនឹងឈានដល់ការចុះកិច្ចព្រមព្រៀងគ្នាជាផ្លូវការនាពេលខាងមុខ។ លោក សុះ មុះសិន មិនបានបញ្ជាក់ពីពេលវេលាជាក់លាក់ចំពោះការបើកដំណើរស្ថាប័នហិរញ្ញវត្ថុ ដែលសហការជាមួយប្រទេសម៉ាឡេស៊ីនេះទេ ដោយលោកបញ្ជាក់ថា មូលនិធិរបស់លោក គ្រោងបញ្ជូនបុគ្គលិកទៅទទួលការបណ្តុះបណ្តាលរយៈពេល៣ខែនៅម៉ាឡេស៊ី។
លោកបន្តថា៖«...ជាការសាកល្បង យើងចង់ធ្វើក្នុងតំបន់ភ្នំពេញនេះសិន។ យើងមិនអាចចាប់ផ្តើមធំទៅតែម្តងនោះទេ គឺពីតូចទៅ។ យើងផ្តល់អតិភាពទៅលើមុខរបរស្ត្រី ចំណែកប្តី យើងមិនសូវឲ្យអតិភាពទេ។ ស្ត្រីជាមេគ្រួសារ ដែលមានជំហ និងមានឆន្ទះខ្ពស់ ក្នុងការចង់បើកមុខរបររកស៊ីអ្វីមួយ...»។
នៅថ្ងៃទី២៦ កក្កដានេះ ក្រុមការងាររបស់អង្គការគ្រឹះស្ថានហិរញ្ញវត្ថុ Amanah IKhtiar កំពុងបន្តធ្វើបទបង្ហាញដល់ក្រុមការងាររបស់ CMDF ជុំវិញដំណើរការបើកគ្រឹះស្ថានហិរញ្ញវត្ថុដូចគ្នានៅម៉ាឡេស៊ី។ និស្សិតដែលមានជំនាញផ្នែកធនាគារ និងហិរញ្ញវត្ថុ ឫនិស្សិតដែលមានបំណងធ្វើការលើការងារនេះ អាចទាក់ទងទៅមូលនិធិ ដើម្បីដាក់ពាក្យសុំទទួលការបណ្តុះបណ្តាលនៅប្រទេសម៉ាឡេស៊ីនាពេលខាងមុខ។ នេះជាការបញ្ជាក់របស់លោក សុះ មុះសិន។
រដ្ឋលេខាធិការក្រសួងធម្មការ និងសាសនា លោក សុះ មុះសិន បន្ថែមថា មូលនិធិរបស់លោក ជាអ្នករៀបចំនីតិវិធីផ្លូវច្បាប់ ដើម្បីដំណើរការបើកគ្រឹះស្ថានមីក្រូហិរញ្ញវត្ថុ Amanah នៅកម្ពុជា។ លោកបញ្ជាក់ថា វាគឺជាស្ថាប័នហិរញ្ញវត្ថុបែបមនុស្សធម៌ ដោយមិនមែនជាធនាគារឡើយ និងមិនស្វែងរកប្រាក់ចំណេញនោះដែរ។ ទាក់ទងនឹងលក្ខខណ្ឌលើគម្រោងឥណទាននេះ លោក មុះសិនបញ្ជាក់ថា កំពុងសិ្ថតក្រោមការសិក្សានៅឡើយ ព្រោះថាការអនុវត្តអាស្រ័យលើភាពជាក់ស្តែងនៃប្រទេសនីមួយៗ។
គ្រឹះស្ថានមីក្រូហិរញ្ញវត្ថុ Amanah IKhtiar នឹងចាប់ផ្តើមលើគម្រោងផ្តល់ឥណទានឥតការប្រាក់ដល់ប្រជាពលរដ្ឋក្រីក្រចាប់ពី ៥០០០ រីងហ្គិត (ម៉ាឡេស៊ី) ឫស្មើនឹង ១២០០ដុល្លារ ទៅ ១០០០០ រីងហ្គិត ឫស្មើនឹង ២៥០០ដុល្លារ។ ទិសដៅចំបង គឺផ្តោតលើសហគមន៍ឥស្លាមក្រីក្រនៅប្រទេសកម្ពុជា។ លោក មុះសិន មានសុទិដ្ឋិនិយមខ្ពស់ចំពោះគម្រោងនេះ ព្រោះវាមានប្រយោជន៍ច្រើនដល់ប្រជាពលរដ្ឋខ្មែរ ជាពិសេសបងប្អូនមូស្លិម ដែលកន្លងមកពួកគាត់ពិបាកចំពោះកម្ចីធម្មតានៅតាមគ្រឹះស្ថានហិរញ្ញវត្ថុ ឫធនាគារ ដែលមានការប្រាក់ និងផ្ទុយពីច្បាប់សាសនា។
គ្រឹះស្ថានមីក្រូហិរញ្ញវត្ថុ Amanah IKhtiar មានអាយុកាល២៩ឆ្នាំមកហើយ។ ស្ថាប័នមីក្រូបែបឥស្លាម និងធំជាងគេក្នុងប្រទេសម៉ាឡេស៊ីមួយនេះ ទទួលបានជោគជ័យខ្លាំងនៅក្នុងសហគមន៍ក្នុងប្រទេសម៉ាឡេស៊ី និងប្រទេសមួយចំនួនមានបង់ក្លាដេសជាដើម។
នៅកម្ពុជា ការផ្តល់កម្ចីឥតការប្រាក់ និងបែបសាសនាឥស្លាមនេះ ធ្លាប់បានដំណើរការជាច្រើនឆ្នាំមកហើយដែរ។ លោក សុះ មុះសិន តាមអ្វីដែលលោកប៉ាន់ស្មាន មានអង្គការ និងសមាគមប្រមាណ៧ បាននិងកំពុងអនុវត្តន៍លើគោលការណ៍ដូចគ្នានេះ ក្នុងនោះមានអង្គការ Muslim Aid និងសមាគមគ្រូពេទ្យឥស្លាមកម្ពុជា។ល៕
Tag:
ឥណទានឥតការប្រាក់
សហគមន៍ឥស្លាម
© រក្សាសិទ្ធិដោយ thmeythmey.com