ជាតិ
លោក ឱម យ៉ិនទៀង ជឿថា ពលរដ្ឋនឹងកាន់តែស្អាតស្អំ ក្នុងរយៈពេល ១០ឆ្នាំខាងមុខ
× ភ្នំពេញ៖ ប្រធានអង្គភាពប្រឆាំងអំពើពុករលួយ (ACU) លោក ឱម យ៉ិនទៀង ជឿជាក់យ៉ាងមុតមាំថា ពលរដ្ឋកម្ពុជាពីមួយជំនាន់ទៅមួយជំនាន់នឹងកាន់តែស្អាតស្អំរយៈពេល ១០ឆ្នាំខាងមុខ តាមរយៈការអប់រំស្តីពី ការប្រឆាំងអំពើពុករលួយក្នុងកម្មវិធីសិក្សាចាប់ពីកម្រិតបឋមសិក្សា រហូតដល់ថ្នាក់ឧត្តមសិក្សា នៅទូទាំងប្រទេស។
លោក ឱម យ៉ិនទៀង សង្ឃឹមថា គ្រូបង្គោលប្រឆាំងអំពើពុករលួយជាង ១០០ និងលោកគ្រូអ្នកគ្រូដទៃទៀត ដែលនឹងបណ្តុះបណ្តាលសិស្សានុសិស្សកម្រិតបឋមសិក្សាជាង ៩សែននាក់ ទូទាំងប្រទេសនោះ នឹងអាចជំរុញឲ្យសិស្សទាំងនោះក្លាយជាពលរដ្ឋស្អាតស្អំដែលប្រឆាំងអំពើពុករលួយ ស្របតាមគោលគំនិតរបស់ ACU និងក្រសួងអប់រំ ដែលមានគោលបំណងជំរុញការប្រឆាំងអំពើពុករលួយនៅក្នុងសង្គម។
ថ្លែងក្នុងពិធីបើកវគ្គបណ្តុះបណ្តាលគ្រូបង្គោលសម្រាប់ការអប់រំ ស្តីពីការប្រឆាំងអំពើពុករលួយ ក្នុងកម្មវិធីសិក្សាបឋមសិក្សាចំណេះទូទៅនៅព្រឹកនេះប្រធាន ACU រូបនេះ បានបញ្ជាក់ដូច្នេះថា៖«ខ្ញុំសង្ឃឹមជឿជាក់ថា ១០ឆ្នាំទៀត ក្មេងជំនាន់ក្រោយនឹងគិតខុសយើងលើបញ្ហានានា រឿងប្រជាធិបតេយ្យ សិទ្ធិមនុស្ស គឺវាមិនមានធាតុមួយខ្វះធាតុមួយទេលើបញ្ហានេះ។ រាល់ថ្ងៃនេះ យើងមានធាតុទាំងមែន តែវានៅមានទាប មានខ្ពស់ចឹង។ សិស្សទាំងអស់ក្លាយជាពលរដ្ឋមួយដែលថ្មីជាងយើង។ យើងអាចគិតថា គេអាចថ្មីជាងយើង អាចខុសពីយើងសព្វថ្ងៃច្រើនដែរ។ ហើយ លទ្ធផលអស់នោះ កើតចេញសកម្មភាពរបស់យើងទាំងអស់គ្នា នៅថ្ងៃនេះ»។
បើតាមលោក ឱម យ៉ិនទៀង វគ្គបណ្តុះបណ្តាលរួមគ្នារវាងអង្គភាព ACU និងក្រសួងអប់រំ យុវជន និងកីឡា រយៈពេល ២ថ្ងៃ ក្នុងឆ្នាំទី៣នេះ នឹងជួយឲ្យគ្រូបង្គោលយល់ច្បាស់ពីខ្លឹមសារ និងរបៀបបង្រៀនមេរៀនស្តីពី ការប្រឆាំងអំពើពុករលួយដែលត្រូវបានរៀបចំឡើងដោយភាពច្នៃប្រឌិត ស្របតាមឯកសារ ប្រឆាំងអំពើពុករលួយជាតិ និងអន្តរជាតិ ក្នុងកម្មវិធីសិក្សាកម្រិតបឋមសិក្សា (ថ្នាក់ទី៤ ៥ និងទី៦)។
សៀវភៅប្រឆាំងអំពើពុករលួយសម្រាប់កម្រិតបឋម សិក្សាចែកជា ១២មេរៀន ក្នុងនោះ រួមមាន មេរៀនទី១, អំពីភាពស្មោះត្រង់ ២, ការទទួលខុសត្រូវ, ៣ ការគោរព, ៤ សីលធម៌, ៥ ការយកចិត្តទុកដាក់, ៦ ការចែករំលែក, ៧ អំពីទំនុកចិត្ត, ៨ អំពីកិច្ចសហការ, ៩ អំពីសមភាព និងយុត្តិធម៌, ១០ អំពីសេរីភាព, ១១ អំពីព្រហ្មវិហារធម៌ និងមេរៀនទី១២ ការរួមគ្នាមិនប្រព្រឹត្តអំពើពុករលួយ។ លោកគ្រូអ្នកគ្រូបង្គោលទូទាំងប្រទេស នឹងបណ្តុះផ្នត់គំនិតសិស្សានុសិស្ស ឲ្យមានភាពស្មោះត្រង់ ការទទួលខុសត្រូវ គោរពខ្លួនឯង និងអ្នកដទៃ ។ ជាពិសេសក្រមសីលធម៌ សមភាព យុត្តិធម៌ ដើម្បីធានាតម្លៃកិត្តិយសពួកគេ គ្រួសារ និងសង្គមជាតិទាំងមូល។
ក្រោយពី ACU និង ក្រសួងអប់រំបានបញ្ជូលកម្មវិធីអប់រំប្រឆាំងអំពើពុករលួយក្នុងកម្រិតបឋមសិក្សា មធ្យមសិក្សាបឋមភូមិ និងទុតិយភូមិរួច នៅឆ្នាំបន្ទាប់ពួកគេនឹងបញ្ជូល ក្នុងកម្មវិធីកម្រិតថ្នាក់ឧត្តមសិក្សា ទូទាំងប្រទេសទៀតផង៕
© រក្សាសិទ្ធិដោយ thmeythmey.com