ជាតិ
នយោបាយជាតិ
CPP អាចជួបចរចាលើករណីឃុំខ្លួនមន្ត្រីCNRP បាន ក្រោយតុលាការសម្រេចសាលក្រមស្ថាពរ
× គណបក្សប្រជាជនកម្ពុជា បានបដិសេធការសុំជួបចរចារបស់គណបក្សសង្គ្រោះជាតិ ដែលសុំពិភាក្សារកដំណោះស្រាយលើបញ្ហាឃុំខ្លួនតំណាងរាស្ត្រ មន្ត្រីនិងសកម្មជន គណបក្សប្រឆាំង ជាច្រើនលើកជាសារមកហើយ ក្រោមហេតុផលថា មិនចង់ប៉ះពាល់លើនីតិវិធីរបស់តុលាការ។ តែការចរចារវាងគណបក្សទាំងពីរ នឹងអាចមានផ្លូវដោះស្រាយវិញបាន លុះត្រាតែតុលាការសម្រេចសាលក្រមស្ថាពរលើករណី មន្ត្រីគណបក្សប្រឆាំងទាំងនេះ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានបញ្ជាក់ថា មកដល់ពេលនេះគណបក្សលោក ផ្អាកការចរចាជាមួយគណបក្សសង្គ្រោះជាតិមួយរយៈពេលសិន ដោយសារតែមិនចង់និយាយពីបញ្ហាឃុំខ្លួនមន្ត្រីបក្សប្រឆាំង ដែលនាំឲ្យប៉ះពាល់ដល់នីតិវិធីតុលាការនោះឡើយ។ ប៉ុន្តែវាក៏មិនមែនមានន័យថា គណបក្សទាំងពីរគ្មានដំណោះស្រាយ លើបញ្ហាឃុំខ្លួន តំណាងរាស្ត្រ មន្ត្រីនិងសកម្មជន គណបក្សប្រឆាំងនេះដែរ។
ត្រង់ចំណុចនេះលោក សុខ ឥសាន អះអាងថា គណបក្សលោកនៅតែបើកផ្លូវចំហ ចរចាគ្នាជាមួយគណបក្សសង្គ្រោះជាតិ តាមរយៈវប្បធម៌សន្ទនាជានិច្ច ។ បើតាមលោក សុខ ឥសាន គណបក្សទាំងពីរ នឹងអាចជួបពិភាក្សាគ្នា រកដំណោះស្រាយតាមផ្លូវនយោបាយវិញបាន លុះត្រាតែតុលាការសម្រេចសាលក្រមស្ថាពរ លើករណីមន្ត្រីគណបក្សប្រឆាំងទាំងនេះសិន។
ចុះបើអាចជួបពិភាក្សាគ្នា ក្រោយតុលាការសម្រេចសាលក្រមមែននោះ តើលោកនាយករដ្ឋមន្ត្រី ហ៊ុន សែន នឹងស្នើទៅព្រះមហាក្សត្រ សុំអន្តរាគមន៍លើកលែងទោសមន្ត្រីបក្សប្រឆាំងដែរទេ? ឆ្លើយនឹងសំនួរសារព័ត៌មានថ្មីៗ ត្រង់ចំណុចនេះអ្នកនាំពាក្យគណបក្សប្រជាជនរូបនេះ បានបញ្ជាក់ដូច្នេះថា៖«ពិតហើយថា សម្ដេចនាយករដ្ឋមន្ត្រី ហ៊ុន សែន អាចស្នើព្រះមហាក្សត្រសុំលើកលែងទោសបានមែនក្រោយតុលាការប្រកាសសម្រេចសាលក្រម។ តែការស្នើសុំលើកលែងទោស ឬមិនស្នើសុំនោះ គឺអាស្រ័យលើការសម្រេចរបស់សម្ដេច ហ៊ុន សែន។ ខ្ញុំក៏មិនដឹងដែរ ។ តែកន្លងមកសម្ដេចធ្លាប់ស្នើសុំព្រះមហាក្សត្រលើកលែងទោសបុគ្គលមួយចំនួនម្ដង ជាពីរដងហើយ»។
គួរបញ្ជាក់ថា សមាជិកសភាគណបក្ស សម រង្ស៊ី លោក ហុង សុខហួរ ,មេឃុំគណបក្សសម រង្ស៊ី លោក ស៊ាង ចែត, តំណាងរាស្ត្រគណបក្សសង្គ្រោះជាតិលោក អ៊ុំ សំអាន, មន្ត្រីគណបក្សលោក មាជ សុវណ្ណារ៉ា និងសកម្មជនបក្សជាង១០រូបទៀត បានរងការចោទប្រកាន់ និងខ្លះទៀតត្រូវបានតុលាការសម្រេចសាលក្រម ហើយកំពុងឃុំខ្លួននៅពន្ធនាគារ ក្រោមបទចោទប្រកាន់ផ្សេងៗគ្នា។
ក្រោយមន្ត្រីបក្សខ្លួនរងការចោទប្រកាន់ ឃាត់ឃុំខ្លួនជាបន្តបន្ទាប់នេះ គណបក្សសង្គ្រោះជាតិ ចាត់ទុកការឃាត់ឃុំខ្លួនមន្ត្រីបក្សខ្លួន ជារឿងនយោបាយ។ គណបក្សសង្គ្រោះជាតិ បានស្នើសុំជួបចរចាជាមួយគណបក្សប្រជាជនជាច្រើនលើក ច្រើនសារដែរ តែត្រូវបានគណបក្សកាន់អំណាចបដិសេធ មិនជួបចរចាឡើយ ក្រោយសម្ដេច ហ៊ុន សែន ប្រកាសថា គ្មានការចរចាលើបញ្ហាឃាត់ឃុំខ្លួនអ្នកណាម្នាក់ ដែលនាំឲ្យប៉ះពាល់ដល់ដំណើរការបន្តនីតិវិធីរបស់តុលាការឡើយ។
ជុំវិញការឃុំខ្លួនមន្ត្រីបក្សសង្គ្រោះជាតិនេះ កន្លងមកប្រមុខរដ្ឋាភិបាល ធ្លាប់និយាយប្រយោលដោយមិនចំឈ្មោះថា លោកគ្មានសិទ្ធិអំណាចបញ្ជាលើប្រព័ន្ធតុលាការ ដែលកំពុងបន្តនីតិវិធីទេ លុះត្រាតែតុលាការសម្រេចសាលក្រមស្ថាពរ ទើបលោកនាយករដ្ឋមន្ត្រី អាចមានសិទ្ធិស្នើទៅព្រះមហាក្សត្រ សុំឡាយព្រះហស្ថលេខាលើកលែងទោសឲ្យបាន។ តែងាកមកករណីឯកឧត្តម សម រង្ស៊ី ដែលកំពុងគេចខ្លួននៅក្រៅប្រទេស ដោយសាររងបទចោទផ្ទួនៗ និងមានឈ្មោះជាទណ្ឌិតនេះវិញ ត្រូវបានសម្ដេច ហ៊ុន សែន ប្រកាសថា លោកនឹងកាត់ដៃស្ដាំចោលភ្លាម ប្រសិនជាសម្ដេច លើកដៃចុះហត្ថលេខា ស្នើសុំព្រះមហាក្សត្រលើកលែងទោសនោះ៕
© រក្សាសិទ្ធិដោយ thmeythmey.com