សាលាក្រុង៖ ការបិទផ្លូវ គឺដើម្បីរក្សាសន្តិសុខជូនពលរដ្ឋ

ជាតិ

សុវត្តិភាព ចរាចរណ៍

សាលាក្រុង៖ ការបិទផ្លូវ គឺដើម្បីរក្សាសន្តិសុខជូនពលរដ្ឋ

05, Sep 2016 , 9:33 am

រូបភាព

ដោយ: ថ្មីៗ

ការបិទកំណាត់ផ្លូវជាតិលេខ ២ នៅម្តុំទីស្នាក់ការគណបក្សសង្គ្រោះជាតិ តាំងពីព្រឹកព្រលឹម ថ្ងៃទី៥ ខែកញ្ញានេះ បានបង្កឲ្យមានការកកស្ទះចរាចរណ៍យ៉ាងខ្លាំងនៅចំណុចស្ពានអាកាសក្បាលថ្នល់ និងស្ពានព្រះមុនីវង្ស(ច្បារអំពៅ)។

ការបិទផ្លូវដោយគ្មានការជូនដំណឹងពីអាជ្ញាធររាជធានីភ្នំពេញនេះ គឺបន្ទាប់ពីគណបក្ស សង្គ្រោះជាតិ ប្រកាសដង្ហែញត្តិទៅដាក់នៅស្ថានទូតនៃប្រទេសមហាអំណាច ជាពិសេសប្រទេសដែលជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស។

លោក ឃួង ស្រេង អភិរងរាជធានីភ្នំពេញ បានបញ្ជាក់ប្រាប់សារព័ត៌មានថ្មីៗថា មូលហេតុនៃការបិទផ្លូវនេះ គឺដើម្បីថែរក្សាសន្តិសុខ ជូនប្រជាពលរដ្ឋ និងសណ្តាប់ធ្នាប់ របៀបរៀបរយសាធារណៈ។ លោក ឃួង ស្រេង បានបញ្ជាក់បន្តយ៉ាងនេះថា៖«ដ្បិតតែពួកគាត់ទៅធ្វើការយឺតមែន ប៉ុន្តែសុវត្ថិភាពរបស់គាត់ ត្រូវបានធានា»។

សូមបញ្ជាក់ថា នៅព្រឹកថ្ងៃចន្ទទី ៥ ខែកញ្ញា តំណាងរាស្ត្រគណបក្សសង្គ្រោះជាតិ នឹងយកញត្តិទៅដាក់នៅស្ថានទូតនៃប្រទេសមហាអំណាច ជាពិសេសប្រទេសដែលជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសថ្ងៃទី ២៣ ខែតុលា ឆ្នាំ១៩៩១ ។ លោក អេង ឆៃអ៊ាង ដែលបានថ្លែងប្រាប់អ្នកគាំទ្រខ្លួននៅស្នាក់ការគណបក្សនៅថ្ងៃទី ៤ ខែកញ្ញាថា ខ្លឹមសារនៃញត្តិនោះ គឺគណបក្សសង្គ្រោះជាតិចង់ប្រាប់ប្រទេសទាំងនោះថា រដ្ឋាភិបាលបច្ចុប្បន្នកំពុងរំលោភលើស្មារតីនៃកិច្ចព្រមព្រៀងទីក្រុងប៉ារីស រដ្ឋធម្មនុញ្ញ និងគោលការណ៍លទ្ធិប្រជាធិបតេយ្យ។ បើតាមលោក អេង ឆៃអ៊ាង គណបក្សសង្គ្រោះជាតិ ចង់ឲ្យប្រទេសទាំងនោះ ដាក់សម្ពាធមកលើរដ្ឋាភិបាលឲ្យគោរពកិច្ចព្រមព្រៀង និងធានាឲ្យការបោះឆ្នោតប្រព្រឹត្តទៅដោយសេរីត្រឹមត្រូវ និងយុត្តិធម៌ ជាពិសេសមេដឹកនាំទាំងពីររបស់គណបក្សសង្គ្រោះជាតិ អាចចូលរួមប្រកួតប្រជែងដោយស្មើភាពជាមួយបក្សកាន់អំណាច៕