អន្តរជាតិ
អ៊ីតាលីរារាំងអឺរ៉ុបមិនឲ្យដាក់ទណ្ឌកម្មបន្ថែមលើរុស្ស៊ីក្នុងរឿងសង្គ្រាមស៊ីរី
× បារាំង និងអាល្លឺម៉ង់បានយកកិច្ចប្រជុំសហភាពអឺរ៉ុននៅព្រុចសែលដើម្បីជំរុញឲ្យប្រទេសសមាជិកអឺរ៉ុបរួមគ្នាបង្កើនទណ្ឌកម្មប្រឆាំងរុស្ស៊ី ក្រោមហេតុផលថា រុស្ស៊ីធ្វើឲ្យសង្គ្រាមស៊ីរីកាន់តែធ្ងន់ធ្ងរ។ ប៉ុន្តែអ៊ីតាលីដែលជាប្រទេសមានទំនាក់ទំនងពាណិជ្ជកម្មស្អិតល្មួតជាមួយក្រុងម៉ូស្គូ បានជំទាស់បំណងចង់ដាក់ទណ្ឌកម្មប្រឆាំងរុស្ស៊ីបន្ថែមនេះ។
គម្រោងការរបស់ក្រុងប៉ារីសនិងក្រុងប៊ែកឡាំងក្នុងការបន្ថែមទណ្ឌកម្ម ប្រឆាំងរុស្ស៊ីដើម្បីបង្ខំឲ្យរបបដឹកនាំនេះប្តូរជំហរក្នុងបញ្ហាសង្គ្រាមស៊ីរីត្រូវបានរាំងខ្ទប់ដោយរដ្ឋាភិបាលក្រុងរ៉ូមនៅថ្ងៃសុក្រទី ២១មិថុនាកន្លងទៅនេះ។អ៊ីតាលីបានបញ្ជាក់ថា ការដាក់ទណ្ឌកម្មបន្ថែមលើរុស្ស៊ីមិនជួយអ្វីទាំងអស់ ហើយវានឹងធ្វើឲ្យស្ថានការណ៍ធ្ងន់ធ្ងរជាងមុនថែមទៀត។
យោងតាមទីភ្នាក់ងារព័ត៌មាន AFP នាយករដ្ឋមន្ត្រីអ៊ីតាលីលោក Matteo Renzi បានថ្លែងប្រាប់អ្នកសារព័ត៌មានក្រោយជំនួយកំពូលអឺរ៉ុបនៅទីក្រុងព្រុចសែលថា៖«យើងគួរធ្វើអ្វីគ្រប់យ៉ាងដែលអាចធ្វើទៅបានដើម្បីបង្កើតនិងរក្សាសន្តិភាពនៅស៊ីរី ប៉ុន្តែវាជារឿងលំបាកបំផុតដែលយើងត្រូវស្រមៃថាវាគូរតែមានការដាក់ទណ្ឌកម្មបន្ថែមប្រឆាំងរុស្ស៊ីនោះ»។
មេដឹកនាំម្នាក់នេះបានពន្យល់ថា លោកមិនជឿជាក់ថា ការដាក់ទណ្ឌកម្មអាចបង្ខំឲ្យរុស្ស៊ីត្រឡប់ចូលតុចរចាដើម្បីដោះស្រាយបញ្ហាស៊ីរីឡើយ។ វាជារឿងគ្រោះថ្នាក់បំផុតដែរ ព្រោះជម្លោះនឹងកាន់តែធ្ងន់ធ្ងរនោះ។ ថ្វីបើមេដឹកនាំអ៊ីតាលីលើកឡើងដោយដូច្នេះក្តី គេវាយតម្លៃថា អ៊ីតាលីរារាំងការដាក់ទណ្ឌកម្មនេះដោយសារប្រទេសនេះមានទំនាក់ទំនងពាណិជ្ជកម្មធំជាមួយរុស្ស៊ី។ ដូច្នេះការដាក់ទណ្ឌកម្មប្រឆាំងដៃគូពាណិជ្ជកម្មដ៏ធំនេះ មិនមែនជាជម្រើសល្អសម្រាប់អ៊ីតាលីនោះឡើយ។
យ៉ាងណាក៏ដោយបារាំងនិងអាល្លឺម៉ង់ដែលជាមេដឹកនាំអឺរ៉ុបនោះ នៅតែបន្តថ្កោលទោសរុស្ស៊ី និងចោទប្រកាន់ថារុស្ស៊ីកំពុងប្រព្រឹត្តបទឧក្រិដ្ឋសង្គ្រាមដោយបានវាយប្រហារដោយគ្រាប់បែកលើមន្ទីរពេទ្យ និងក្បួនឡានដឹកស្បៀងនិងជំនួយមនុស្សធម៌ ក៏ដូចជាសម្លាប់មនុស្សអស់រាប់រយនាក់ផងដែរ។ ហើយប្រទេសទាំងពីរនេះចង់មានការដាក់គំនៀបលើរុស្ស៊ីតាមរយៈការដាក់ទណ្ឌកម្មបន្ថែមដើម្បីបង្ខំឲ្យរុស្ស៊ីបញ្ឈប់រាល់ការទម្លាក់គ្រាប់លើសមរភូមិចុងក្រោយក្រុង Aleppo ដែលជាទីតាំងក្រុមឧទ្ទាមនោះ។
កាលពីថ្ងៃពុធកន្លងទៅ លោកហ្វ្រង់ស្វ័រ ហូឡង់ និងលោកស្រី អែនជេឡា មឺហ្កែលអធិការបតីអាល្លឺម៉ង់បានព្រមានរុស្ស៊ីផងដែរក្នុងជំនួបជាមួយប្រធានាធិបតីរុស្ស៊ីលោក វ្ល៉ាឌីមៀ ពូទីន ថា ការបន្តដាក់ទណ្ឌកម្មនៅតែជាជម្រើសមួយរបស់សហភាពអឺរ៉ុប បើរុស្ស៊ីមិនអនុវត្តបទឈប់បាញ់ពេញលេញ និងមិនបោះបង់ឆន្ទៈកម្ទេចទីក្រុង Aleppo ទេនោះ។
កន្លងមកបារាំងបានព្យាយាមបង្ហាញតួនាទីរបស់ខ្លួនជាអ្នកជួយស្រោចស្រង់ជម្លោះស៊ីរីដែរ ហើយប្រទេសនេះបានដាក់ស្នើដំណោះស្រាយមួយនៅក្រុមប្រឹក្សាសន្តិសុខថែមទៀត។ ប៉ុន្តែដំណោះស្រាយនេះត្រូវបានរុស្ស៊ីជំទាស់ ដោយសារវាមានគោលដៅប្រឆាំងរុស្ស៊ីនិងដាក់គំនៀបខ្លាំងលើរបបដឹកនាំស៊ីរីជាងភាគីជម្លោះផ្សេងទៀត៕
© រក្សាសិទ្ធិដោយ thmeythmey.com