ជាតិ
ស្អែក តុលាការកំពូល នឹងជម្រះរឿងក្តីរបស់ឯកឧត្តម កឹម សុខា
× ភ្នំពេញ៖ នៅថ្ងៃទី២៨ ខែតុលា ឆ្នាំ២០១៦ តុលាការកំពូល នឹងបើកសវនាការ លើបណ្តឹងសាទុក្ខរបស់ឯកឧត្តម កឹម សុខា។ បណ្តឹងសាទុក្ខនេះ គឺដើម្បីជំទាស់នឹងតុលាការជាន់ទាប ដែលក្រុមមេធាវី អះអាងថា ធ្វើខុសនីតិវិធី ក្នុងការចាត់វិធានការលើឯកឧត្តម កឹម សុខា កន្លងមក។
ការបើកសវនាការនៅថ្ងៃស្អែក គឺធ្វើឡើងតាមសំណើរបស់ក្រុមមេធាវី របស់ឯកឧត្តម កឹម សុខា អនុប្រធានគណបក្សសង្គ្រោះជាតិ។ នេះបើតាមលោក សំ សុគង់ មេធាវីមួយរូបរបស់ឯកឧត្តម កឹម សុខា ដែលបានប្រាប់សារព័ត៌មានថ្មីៗ។
លោក សំ សុគង់ បានបញ្ជាក់ថា ការបន្តប្តឹងទៅតុលាការកំពូល គឺដើម្បីប្រឆាំងនឹងសាលដីការបស់សាលាឧទ្ធរណ៍។ លោកបន្ថែមថា កន្លងមក សាលាឧទ្ធរណ៍ បានចេញសាលដីកា ដោយចាត់ទុកចំណាត់ការរបស់សាលាដំបូងរាជធានីភ្នំពេញ ថាសមស្របទៅតាមនីតិវីធី។
មុខនឹងឈានដល់តុលាការកំពូល ក្រុមមេធាវី បានប្តឹងទៅសាលាឧទ្ធរណ៍ ដើម្បីស្នើឲ្យទាត់ចោលនីតិវិធីរបស់សាលាដំបូងរាជធានីភ្នំពេញ។ ដោយសារតែសាលាឧទ្ធរណ៍ មិនបានធ្វើតាមសំណើរបស់ខ្លួន ក្រុមមេធាវី ក៏បន្តប្តឹងទៅតុលាការកំពូលតែម្តង។
យ៉ាងណាក៏ដោយ ឯកឧត្តម កឹម សុខា ត្រូវបានសាលាដំបូងរាជធានីភ្នំពេញ កាត់ទោសរួចទៅហើយ ដោយឲ្យអនុប្រធានបក្សប្រឆាំងរូបនេះ ជាប់ពន្ធនាគាររយៈពេល៥ខែ និងពិន័យជាប្រាក់ចំនួន៨សែនរៀល ពីបទ «បដិសេធក្នុងការចូលខ្លួន» ដែលតុលាការចាត់ទុកថាជាបទល្មើសជាក់ស្តែង។
បន្ទាប់មក ក្រុមមេធាវី ក៏ត្រឡប់ដាក់បណ្តឹងទៅកាន់សាលាឧទ្ធរណ៍ម្តងទៀត ដើម្បីជំទាស់នឹងសាលក្រមរបស់សាលាដំបូងរាជធានីភ្នំពេញ ដែលកាត់ទោសឯកឧត្តម កឹម សុខា បែបនេះ។ ក្រុមមេធាវី យល់ថា វា ជារឿងអយុត្តិធម៌ ដែលតុលាការ សម្រេចឲ្យឯកឧត្តម កឹម សុខា មានទោសកំហុស៕
© រក្សាសិទ្ធិដោយ thmeythmey.com