តុលាការ កាត់ទោសលោក ហុង សុខហួរ ឲ្យជាប់ពន្ធនាគារ៧ឆ្នាំ

ជាតិ

តុលាការ កាត់ទោសលោក ហុង សុខហួរ ឲ្យជាប់ពន្ធនាគារ៧ឆ្នាំ

07, Nov 2016 , 3:09 pm

រូបភាព

ដោយ: ម៉ៅ សុផា

ភ្នំពេញ៖ លោក ហុង សុខហួរ សមាជិកព្រឹទ្ធសភាពីគណបក្ស សម រង្ស៊ី ត្រូវបានសាលាដំបូងរាជធានីភ្នំពេញ កាត់ទោសឲ្យជាប់ពន្ធនាគាររយៈពេល៧ឆ្នាំ នៅថ្ងៃទី៧ ខែវិច្ឆិកា ឆ្នាំ២០១៦នេះ។ តែតុលាការ មិនតម្រូវឲ្យលោក ហុង សុខហួរ បង់ប្រាក់ចូលរដ្ឋនោះទេ។ បើតាមការចោទប្រកាន់ពីតុលាការ បទល្មើសរបស់លោក ហុង សុខហួរ ជាប់ពាក់ព័ន្ធនឹងបញ្ហាព្រំដែនកម្ពុជា-វៀតណាម។

ក្រុមមេធាវីរបស់លោក ហុង សុខហួរ សោកស្តាយយ៉ាងខ្លាំង ដែលសាលាដំបូងរាជធានីភ្នំពេញ សម្រេចឲ្យកូនក្តីរបស់ពួកគេ មានទោសកំហុសបែបនេះ។ ក្រុមមេធាវី ចាត់ទុកសាលក្រមរបស់សាលាដំបូងរាជធានីភ្នំពេញ ថាអយុត្តិធម៌សម្រាប់លោក ហុង សុខហួរ។

លោកជូង ជូងី មេធាវីមួយរូបរបស់លោក ហុង សុខហួរ អះអាងថា ក្រុមមេធាវី អាចនឹងបន្តដាក់បណ្តឹងទៅសាលាឧទ្ធរណ៍ ដើម្បីប្រឆាំងនឹងសាលក្រមរបស់សាលាដំបូងរាជធានីភ្នំពេញ។ ប៉ុន្តែ ក្រុមមេធាវី ត្រូវការពេលវេលាមួយរយៈសិន ដើម្បីពិភាក្សាជាមួយលោក ហុង សុខហួរ មុននឹងសម្រេចថាដាក់បណ្តឹងទៅកាន់សាលាឧទ្ធរណ៍ ឬយ៉ាងណា។ នេះជាការបន្ថែមរបស់លោក ជូង ជូងីដដែល។

សូមរម្លឹកថា លោក ហុង សុខហួរ ត្រូវបានឃុំខ្លួន កាលពីខែសីហា ឆ្នាំ២០១៥ មកម្ល៉េះ បន្ទាប់ពីលោក បង្ហោះឯកសារមួយច្បាប់ដែលពាក់ធព័ន្ធនឹងបញ្ហាព្រំដែនកម្ពុជា-វៀតណាម នៅក្នុងបណ្តាញសង្គមហ្វេសប៊ុក។ ដោសារតែការបង្ហោះឯកសារនោះឯង តុលាការ ក៏បានចោទលោក ហុង សុខហួរ ពីបទ« «ក្លែងឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់ឲ្យប្រព្រឹត្តបទឧក្រិដ្ឋ»៕