ជាតិ
កម្ពុជា-ចិន រួមគ្នារៀបចំកិច្ចប្រជុំរដ្ឋមន្ត្រីការបរទេសមេគង្គ-ឡានឆាង លើកទីពីរ នៅសៀមរាប
×![]()
ភ្នំពេញ៖ កម្ពុជា និងចិន នឹងក្លាយជាសហប្រធានរួមគ្នារៀបចំកិច្ចប្រជុំរដ្ឋមន្ត្រីការបរទេសមេគង្គឡានឆាង លើកទីពីរ រយៈពេលពីរថ្ងៃ នៅថ្ងៃទី ២២ និង ២៣ ខែធ្នូ ឆ្នាំ២០១៦ នេះ ក្នុងខេត្តសៀមរាប។ នេះបើតាមលោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការ អន្តរជាតិ។
កម្ពុជា និងចិន កំពុងត្រៀមខ្លួនរៀបចំកិច្ចប្រជុំរដ្ឋមន្ត្រីការបរទេស នៃកិច្ចសហប្រតិបត្តិការមេគង្គ-ឡានឆាង (Mekong-Lancang) ក្នុងឆ្នាំ ២០១៦នេះ។ លោក ជុំ សុន្ទរី បានថ្លែងប្រាប់ ក្រុមអ្នកសារព័ត៌មានក្រោយជំនួបពិភាក្សាការងាររវាងលោក ប្រាក់ សុខុន រដ្ឋមន្ត្រីការបរទេស កម្ពុជា និងលោក Xiong Bo អគ្គរដ្ឋទូតចិនថ្មីប្រចាំនៅកម្ពុជា នៅក្រសួងការបរទេសកម្ពុជានៅថ្ងៃទី១០ ខែវិច្ឆិកានេះ។
«ភាគីទាំងពីរបានពិភាក្សាគ្នាពីការរៀបចំកិច្ចប្រជុំគណៈកម្មការអន្តររដ្ឋាភិបាល សម្រាប់កិច្ចសហប្រតិបត្តិការកម្ពុជា ចិន ដែលនឹងត្រូវប្រារព្ធក្នុងកម្ពុជា នាពេលខាងមុខ និងការត្រៀមរៀបចំកិច្ចប្រជុំលើកពីរ ថ្នាក់រដ្ឋមន្ត្រីការបរទេស របស់មេគង្គ ឡានឆាង ដែលនឹងរៀបចំនៅថ្ងៃទី២២ និង២៣ ខែធ្នូ ឆ្នាំ ២០១៦ នៅសៀមរាប»។ នេះជាការបញ្ជាក់របស់លោក ជុំ សុន្ទរី ដែលមានវត្តមាន ក្នុងជំនួបការងារភាគីទាំងពីរជិតមួយម៉ោងនោះ។
យ៉ាងណា អ្នកនាំពាក្យរូបនេះ ពុំអាចបញ្ជាក់ពីរបៀបវារៈដែលភាគីកម្ពុជា ចិន និងប្រទេសសមាជិកទន្លេមេគង្គបួនទៀត រួមមាន ឡាវ មីយ៉ាន់ម៉ា ថៃ និងវៀតណាម គ្រោងនឹងពិភាក្សាគ្នានៅឡើយ។
គួបញ្ជាក់ថា កិច្ចសហប្រតិបត្តិការមេគង្គ-ឡានឆាង ត្រូវបានផ្ដួចផ្ដើមគំនិតដោយនាយករដ្ឋមន្ត្រីចិន លោក លី គជាំង (Li Keqiang) ក្នុងកិច្ចប្រជុំថ្នាក់ដឹកនាំកំពូលអាស៊ាន-ចិនលើកទី១៧ នៅប្រទេសមីយ៉ាន់ម៉ា កាលពីខែវិច្ឆិកា ឆ្នាំ២០១៤។
គួរជម្រាបផងដែរ កិច្ចប្រជុំរដ្ឋមន្ត្រីការបរទេសមេគង្គ-ឡានឆាង (Mekong-Lancang) លើកទី១ បានប្រព្រឹត្តឡើងរយៈពេល៣ថ្ងៃ កាលពីខែវិច្ឆិកា ឆ្នាំ២០១៥កន្លងទៅនេះ ក្នុងប្រទេសចិន ។កិច្ចប្រជុំនោះ បានផ្តោតលើការបង្កើតរចនាសម្ពន្ធ សហប្រតិបត្តិការមេគង្គ-ឡានឆាង។ រចនាសម្ពន្ធនោះ រួមមាន ការផ្លាស់ប្ដូរយោបល់លើការគ្រប់គ្រងធនធានទឹក សុខភាពសាធារណៈ វិទ្យាសាស្ត្រ បច្ចេកវិទ្យា វប្បធម៌ និងពិនិត្យលើក្របខណ្ឌសហប្រតិបត្តិការសេដ្ឋកិច្ចនៃមហាអនុតំបន់ទន្លេមេគង្គ និងការអភិវឌ្ឍអាស៊ានអាងទន្លេមេគង្គ៕
Tag:
កម្ពុជា
ចិន
មេគង្គ
ឡានឆាង
© រក្សាសិទ្ធិដោយ thmeythmey.com
