កៅអីវគ្គ១/២ផ្តាច់ព្រ័ត្រនៅសល់តែ១សម្រាប់សិង្ហបុរី ឥណ្ឌូនេស៊ី និងហ្វីលីពីនដើម្បីប្រជែងគ្នានៅក្នុងពូល A

កីឡាជាតិ

ជាតិ

កៅអីវគ្គ១/២ផ្តាច់ព្រ័ត្រនៅសល់តែ១សម្រាប់សិង្ហបុរី ឥណ្ឌូនេស៊ី និងហ្វីលីពីនដើម្បីប្រជែងគ្នានៅក្នុងពូល A

25, Nov 2016 , 11:20 am

រូបភាព

គ្រូបង្វឹកថៃ (ឆ្វេង) និងហ្វីលីពីននាអំឡុងពេលនៃសន្និសីទសារព័ត៌មាន

ដោយ:

ការប្រកួតបាល់ទាត់ដណ្តើមពានរង្វាន់ AFF Suzuki Cup 2016 ក្នុងពូល A បានឈានដល់ការប្រកួតថ្ងៃចុងក្រោយហើយ នាល្ងាចថ្ងៃទី២៥ ខែវិច្ឆិកា នេះ ដោយ ក្រុមសិង្ហបុរី ត្រូវតទល់ជាមួយក្រុមឥណ្ឌនេស៊ី ខណៈក្រុមម្ចាស់ផ្ទះហ្វីលីពីន ស្វាគមន៍ក្រុមជើងខ្លាំងថៃ។ សម្រាប់ការប្រកួតថ្ងៃចុងក្រោយនេះដែរទាំងក្រុមសិង្ហបុរី និងឥណ្ឌូនេស៊ីសុទ្ធតែត្រូវការ៣ពិន្ទុដូចគ្នា ដើម្បីរង់ចាំអ៊ុតមើលលទ្ធផលរវាងក្រុមហ្វីលីពីន និងថៃ ក្នុងការបន្តឱកាសទៅវគ្គបន្ត។

នាវេលាម៉ោង៦និង៣០នាទីល្ងាចថ្ងៃទី២៥ ខែវិច្ឆិកា នេះ ក្រុមជម្រើសជាតិសិង្ហបុរីត្រូវតទល់ជាមួយក្រុមជម្រើសជាតិឥណ្ឌូនេស៊ី នៅកីឡដ្ឋាន Ridzal Memorial ប្រទេសហ្វីលីពីន។ ការប្រកួតនេះនឹងក្លាយជាជំនួបមួយដ៏ជក់ចិត្ត ព្រោះក្រុមទាំងពីរសុទ្ធតែត្រូវការឈ្នះដូចគ្នា ដើម្បីបាន៣ពិន្ទុសម្រាប់បង្កើនក្តីសង្ឃឹមក្នុងការឡើងទៅកាន់វគ្គបន្ត នៃពានរង្វាន់ AFF Suzuki Cup 2016 ប្រចាំពូល A។

ប៉ុន្តែក្រុមទាំងពីរត្រូវរង់ចាំស្តាប់លទ្ធផលរវាងក្រុមម្ចាស់ផ្ទះហ្វីលីន និងក្រុមជើងខ្លាំងថៃ ដែលធ្វើឡើងស្របពេលគ្នានៅកីឡដ្ឋាន PHILIPPINES SPORTS នាប្រទេសហ្វីលីពីនដូចគ្នា។ ប្រសិបក្រុមហ្វីលីពីនអាចយកឈ្នះក្រុមជើងខ្លាំងថៃ នោះហ្វីលីពីននឹងមានឱកាសឡើងទៅកាន់វគ្គបន្តជាមួយក្រុមថៃ។

ប៉ុន្តែបើចាញ់ ឬស្មើជាមួយថៃ ក្រុមនេះនឹងអស់ឱកាសក្នុងការឡើងទៅកាន់វគ្គបន្ត ខណៈដែលក្រុមសិង្ហបុរី និងឥណ្ឌូនេស៊ីមានការស៊ុតបញ្ជូលទីគ្នា តែបើក្រុមទាំងពីររក្សាលទ្ធផលស្មើនោះក្រុមម្ចាស់ផ្ទះហ្វីលីពីនអាចនៅមានឱកាសក្នុងឈានទៅកាន់វគ្គបន្តនៃពានរង្វាន់កម្រិតតំបន់មួយនេះ។

គួរបញ្ជាក់ថា ក្រោយឆ្លងកាត់២ប្រកួតដូចគ្នានាពេលកន្លងមក ក្នុងនោះក្រុមជម្រើសជាតិថៃ ឈរដំដាប់លេខ១ដោយមាន៦ពិន្ទុក្រោយឈ្នះទាំងពីរប្រកួត រីឯហ្វីលីពីនឈរលំដាប់ទី២ដោយមាន២ពិន្ទុ បន្ទាប់ពីឆ្លងកាត់ពីរប្រកួតស្មើទាំងពីរ។ ចំណែកសិង្ហបុរី និងឥណ្ឌូនេស៊ីឈរលំដាប់លេខ៣និងលេខ៤ ដោយមាន១ពិន្ទុដូចគ្នា ក្រោយពីរប្រកួតចាញ់ និងស្មើ១ប្រកួតដូចគ្នា៕