ចិន គាំទ្រក្រុមប្រឹក្សាសន្តិសុខអង្គការសហប្រជាជាតិក្នុងការចេញចំណាត់ការថ្មីប្រឆាំងកូរ៉េខាងជើង

អន្តរជាតិ

ចិន គាំទ្រក្រុមប្រឹក្សាសន្តិសុខអង្គការសហប្រជាជាតិក្នុងការចេញចំណាត់ការថ្មីប្រឆាំងកូរ៉េខាងជើង

25, Nov 2016 , 9:59 pm

រូបភាព

អ្នកនាំពាក្យក្រសួងការបរទេសចិន

ដោយ: ថ្មីៗ

រដ្ឋាភិបាលក្រុងប៉េកាំង គាំទ្រក្រុមប្រឹក្សាសន្តិសុខអង្គការសហប្រជាជាតិក្នុងការចាត់វិធានការបន្ថែមទៀតដើម្បីឆ្លើយតបទៅនឹងសកម្មភាពចុងក្រោយរបស់កូរ៉េខាងជើងក្នុងការបាញ់សាកល្បងនុយក្លេអ៊ែរលើកទីប្រាំដែលបានបំពានទៅនឹងបម្រាមរបស់ក្រុមប្រឹក្សាសន្តិសុខជាបន្តបន្ទាប់នោះ។

«ចិន ជំទាស់ដាច់ខាតទៅនឹងការសាកល្បងនុយក្លេអ៊ែររបស់កូរ៉េខាងជើង។ ដើម្បីធានាឲ្យបានពីការគ្មានអាវុធនុយក្លេអ៊ែរនៅឧបទ្វីបកូរ៉េ ទប់ស្កាត់ការរីកសាយភាយនុយក្លេអ៊ែរ សុវត្ថិភាព សន្តិភាព និងស្ថិរភាពអាស៊ីបែកឥសាន្ត ត្រូវដោះស្រាយបញ្ហាដោយសន្តិវិធីតាមរយៈកិច្ចសន្ទនា និងការពិគ្រោះយោបល់ ដែលនេះហើយគឺជាជំហរមិនប្រែប្រួលរបស់ចិន»។ នេះគឺសេចក្តីថ្លែងការណ៍របស់លោក Geng Shuang អ្នកនាំពាក្យក្រសួងការបរទេសចិនទៅកាន់អ្នកសារព័ត៌មានក្នុងសន្និសីទសារព័ត៌មានប្រចាំថ្ងៃទី២៤ ខែវិច្ឆិកា។

សេចក្តីថ្លែងការណ៍របស់មន្ត្រីការបរទេសរូបនេះ គឺដើម្បីឆ្លើយតបទៅនឹងសំណួររបស់អ្នកសារព័ត៌មាន ដែលបានសួរថាតើ ចិន គិតបែបណា ចំពោះការពន្យារពេលរបស់រុស្ស៊ីក្នុងនីតិវីធីព្រាងសេចក្តីសម្រេចថ្មីប្រឆាំងនឹងកូរ៉េខាងជើង ខណៈ ចិន និងអាមេរិក បានព្រមព្រៀងគ្នារួចទៅហើយក្នុងការចាប់ផ្តើមនីតិវិធីថ្មីនោះ។

អ្នកនាំពាក្យរូបនោះ បានអះអាងថា ចិន ត្រៀមខ្លួនសម្រាប់ចំណាត់ការថ្មីរបស់ក្រុមប្រឹក្សាសន្តិសុខ ដើម្បីប្រឆាំងទៅនឹងការបាញ់សាកល្បងនុយក្លេអ៊ែរលើកទី៥របស់កូរ៉េខាងជើង ខណៈ សមាជិករបស់ក្រុមប្រឹក្សា ក៏កំពុងតែ ពិគ្រោះយោបល់គ្នាទៅវិញទៅមកអំពីសេចក្តីព្រាងនៃសេចក្តីសម្រេចប្រឆាំងទៅនឹងកូរ៉េខាងជើងនោះ។

សូមជម្រាបផងដែរ កាលពីដើមឆ្នាំ២០១៦នេះ ក្រុមប្រឹក្សាសន្តិសុខអង្គការសហប្រជាជាតិ បានអនុម័តជាឯកច្ឆន្ទលើទណ្ឌកម្មថ្មីប្រឆាំងទៅនឹងកូរ៉េខាងជើងក្នុងការសាកល្បងអាវុធនុយក្លេអ៊ែរ។ យ៉ាងណាក៏ដោយ ទណ្ឌកម្មនេះ ហាក់ដូចជាមិនមានប្រសិទ្ធភាពអ្វីឡើយ ដ្បិតកូរ៉េខាងជើង នៅតែបន្តសាកល្បងទាំងការបាញ់មីស៊ីល និងអាវុធនុយក្លេអ៊ែរ រហូតទៅដល់៥លើកត្រឹមខែកញ្ញាកន្លងទៅ ដែលកូរ៉េខាងត្បូង បានចាត់ទុកថា អាវុធនុយក្លេអ៊ែរនោះថា បានឈានដល់ដំណាក់កាលចុងក្រោយហើយនោះ៕