អន្តរជាតិ
នយោបាយអន្តរជាតិ
ពូទីន ព្រមានអ្នកប៉ងបំផ្លាញសង្គមរុស្ស៊ី ខណៈខួប១០០ឆ្នាំនៃបដិវត្តន៍បុលសេវិកមកដល់
×
មេដឹកនាំរុស្ស៊ីលោក វ្ល៉ាឌីមៀ ពូទីន បានលើកសរសើរពីសាមគ្គីភាពនិងការរួបរួមជាតិនៃសង្គមរុស្ស៊ីកន្លងមក។ ប៉ុន្តែ ស្របពេលដែលខួប ១០០ឆ្នាំ នៃចលនាបដិវត្តប្រឆាំងរបបរាជានិយមរុស្ស៊ីកាន់តែខិតជិតមកដល់ លោកព្រមានរាល់ការប៉ុនប៉ងបង្កើតចលនាប្រឆាំងគុំគួនគ្នា និងសងសឹកគ្នាដែលអាចធ្វើឲ្យសង្គមបែកបាក់ និងធ្វើឲ្យរដ្ឋាភិបាលចុះទន់ខ្សោយដែរ។
ក្នុងពេលថ្លែងសុន្ទរកថាប្រចាំឆ្នាំនៅចំពោះមុខសមាជិកសភារុស្ស៊ីថ្ងៃព្រហស្បតិ៍ លោក វ្ល៉ាឌីមៀ ពូទីន បានផ្ញើសារព្រមានមួយចំពោះរាល់ជនណាដែលមានចេតនាមិនល្អ ចង់បង្កបញ្ហាដែលបណ្តាលឲ្យសង្គមរុស្ស៊ីបែកបាក់គ្នានោះ ខណៈដែលខួប ១០០ឆ្នាំ នៃចលនាបដិវត្តន៍ខែតុលា (Bolshevik) មកដល់នោះ។ លោកសង្កត់ធ្ងន់ថា សង្គមរុស្ស៊ីត្រូវរួបរួមគ្នា ហើយរដ្ឋាភិបាលរុស្ស៊ីត្រូវតែខ្លាំង។
យោងតាមទីភ្នាក់ងាររុស្ស៊ី RT លោក វ្ល៉ាឌីមៀ ពូទីន បានលើកឡើងថា៖«វាជារឿងមិនអាចទទួលយកបានឡើយដែលគេត្រូវទាញយក គំនិតព្យាបាទ, ការបែកបាក់គ្នា និងគំនុំគុំគួន ដែលកើតមានឡើងតាំងពីអតីតកាលមកក្នុងសង្គមសម័យទំនើប ដើម្បីទាញប្រយោជន៍ផ្ទាល់ខ្លួន។ដូចយើងឃើញសោកនាដកម្មដែលកើតឡើងលើគ្រួសាររុស្ស៊ីគ្រប់គ្នាកាលពីអតីកាលនោះ (បដិវត្តន៍)។ ចូរយើងចងចាំវាទុកថា យើងជាសង្គមមួយដែលពោរពេញដោយការសាមគ្គី ហើយយើងជាមនុស្សតែមួយ និងរុស្ស៊ីតែមួយ»។
តាមពិតទៅ នៅឆ្នាំក្រោយ វាជាខួបលើកទី ១០០ នៃចលនាបដិវត្តន៍ខែតុលា «បុលសេវិក» ដែលផ្តួលរលំរបបសក្តិភូមិនៅឆ្នាំ ១៩១៧ នោះ។ ដូច្នេះហើយ សាររបស់លោក វ្ល៉ាឌីមៀ ពូទីន វាជាក្រើនរំលឹកប្រជាជនរុស្ស៊ីទូទៅផលប៉ះពាល់ដែលអាចកើតមានឡើងបើប្រវត្តិសាស្ត្រជូរចត់នេះកើតឡើងវិញនោះ។
យ៉ាងណាលោក ពូទីន ក៏បានឆ្លៀតឱកាសលើកសរសើរផងដែរពីស្មារតីជាតិនិយម ការឯកភាព និងសាមគ្គីភាពគ្នារវាងប្រជាជនរុស្ស៊ីគ្រប់ស្រទាប់វណ្ណៈនោះ។ ហើយលោកលើកឡើងពីជ័យជម្នះក្នុងការបោះឆ្នោតកន្លងមករបស់គណបក្សរួបរួមរុស្ស៊ីជាឧទាហរណ៍ផងដែរ ហើយវាឆ្លុះបញ្ចាំងថាប្រជាជនរុស្ស៊ីពេញចិត្តការអភវិឌ្ឍនិងរួបរួមគ្នាខ្ពស់។បន្ថែមពីនេះលោក ក៏បានសន្យាបន្តជួយជ្រោមជ្រែងគណបក្សរបស់លោកក្នុងការប្រយុទ្ធប្រឆាំងអំពើពុលរលួយនិងសកម្មភាពអសកម្មផ្សេងទៀតនៅក្នុងប្រទេសដើម្បីប្រយោជន៍សង្គមទាំងមូល។
បន្ថែមពីនេះ ក្នុងពេលផ្តល់សុន្ទរកថានេះ លោកឆ្លៀតឱកាសលើកឡើងពីការប្រឹងប្រែងរបស់រដ្ឋាភិបាលរុស្ស៊ីក្នុងការដោះស្រាយបញ្ហាសេដ្ឋកិច្ចបច្ចុប្បន្នផងដែរ។ លោក ពូទីន ពន្យល់ថា សេដ្ឋកិច្ចរុស្ស៊ីកំពុងស្ទុះងើបឡើងវិញផុតពីវិបត្តិនៅពេលបច្ចុប្បន្នេះ ដែលវាជាសញ្ញាវិជ្ជមានសម្រាប់ប្រជាជនរុស្ស៊ីផងដែរ។
សេដ្ឋកិច្ចរុស្ស៊ីរងគ្រោះខ្លាំងចាប់តាំងពីពេលប្រទេសនេះឈ្លានពាននិងក្រសោបយកទឹកដី Crimea នៅដើមឆ្នាំ ២០១៤។នេះក៏ដោយសារលោកខាងលិចដាក់ទណ្ឌកម្មសេដ្ឋកិច្ចប្រឆាំងរុស្ស៊ីជាបន្តបន្ទាប់ច្រើនជំហាននោះ៕
Tag:
វ្ល៉ាឌីមៀ ពូទីន
បដិវត្តន៍បុលសេវិក
© រក្សាសិទ្ធិដោយ thmeythmey.com