ឯ.ឧ សម រង្ស៊ី នៅតែជាប្រធានមតិភាគតិច ឯ.ឧ កឹម សុខា ជាថ្នាក់ដឹកនាំ CNRP នៅរដ្ឋសភា

ជាតិ

នយោបាយជាតិ

ឯ.ឧ សម រង្ស៊ី នៅតែជាប្រធានមតិភាគតិច ឯ.ឧ កឹម សុខា ជាថ្នាក់ដឹកនាំ CNRP នៅរដ្ឋសភា

05, Dec 2016 , 11:33 pm

រូបភាព

ឯ.ឧ សម រង្ស៊ី កាលដើរតួនាទីជាប្រធានក្រុមតំណាងរាស្ត្រ CNRP ចរចាជាមួួយ CPP ដែលដឹកនាំដោយសម្តេច ស ខេង

ដោយ: ថ្មីៗ

តាមរយៈបណ្តាញសង្គម Twitter ឯកឧត្តម សម រង្ស៊ី បានអះអាងថា ឯកឧត្តម នៅតែមានតួនាទីជាប្រធានក្រុមមតិភាគតិចនៅរដ្ឋសភា និងជាដៃគូសន្ទនារបស់សម្តេចនាយករដ្ឋមន្ត្រី ហ៊ុន សែន ខណៈឯកឧត្តម កឹម សុខា ក្នុងនាមជាប្រធានស្តីទី នឹងក្លាយជាប្រធានក្រុមតំណាងរាស្ត្រគណបក្សសង្គ្រោះជាតិប្រចាំរដ្ឋសភា ដែលមានសម្តេចឧបនាយករដ្ឋមន្ត្រី ស ខេង ជាដៃគូ។

ការបញ្ជាក់របស់ប្រធានគណបក្សប្រឆាំងដែលកំពុងស្ថិតនៅក្រៅប្រទេស បន្ទាប់ពីគណៈកម្មការអចិន្ត្រៃយ៍គណបក្សបានសម្រេចស្នើររដ្ឋសភា ដើម្បីដាក់បេក្ខភាពឯកឧត្តម កឹម សុខា ជាប្រធានក្រុមតំណាងរាស្ត្រគណបក្សសង្គ្រោះជាតិប្រចាំរដ្ឋសភា ដោយមានលោក យឹម សុវណ្ណ ជាអនុប្រធាន និងលោក យ៉ែម យ៉ែម បុញ្ញឫទ្ធិ ជាសមាជិក។ សម្រាប់តួនាទី ភាគីគណបក្សសង្គ្រោះជាតិ មានដៃគូសន្ទនាពីគណបក្សប្រជាជនកម្ពុជា ដែលដឹកនាំដោយសម្តេច ស ខេង ដោយមានលោក គាត ឈន់ ជាអនុប្រធាន និងលោកស្រី ម៉ែន សំអន ជាសមាជិក។

ដោយឡែក ឯកឧត្តម សម រង្ស៊ី បានអះអាងថា ខ្លួននៅតែជាប្រធានក្រុមតំណាងរាស្ត្រភាគតិចរដ្ឋសភា។ បើតាមជំពូកទី១២ថ្មី ប្រការ៤៨ថ្មី (បី) ប្រធានក្រុមមតិភាគតិច ជាគូសន្ទនាជាមួយនឹងប្រមុខរាជរដ្ឋាភិបាលទាក់ទងនឹងបញ្ហាប្រទេសជាតិ ហើយប្រធានក្រុមមតិភាគតិច មានឋានៈស្មើនាយករដ្ឋមន្ត្រី៕

As CNRP acting president, Kem Sokha becomes president of CNRP National Assembly members. His CPP counterpart is Sar Kheng. #SamRainsy 2/2 — Rainsy Sam (@RainsySam) December 5, 2016