ជើងឯកចំបាប់អាស៊ីអាគ្នេយ៍៖ កម្ពុជាឈ្នះមេដាយមាស៣ ប្រាក់១០ និងសំរឹទ្ធ១៧

កីឡាជាតិ

ជាតិ

ជើងឯកចំបាប់អាស៊ីអាគ្នេយ៍៖ កម្ពុជាឈ្នះមេដាយមាស៣ ប្រាក់១០ និងសំរឹទ្ធ១៧

08, Dec 2016 , 10:56 am

រូបភាព

ដោយ:

ការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ឆ្នាំ២០១៦ បានបញ្ចប់កាលពីល្ងាចថ្ងៃទី៧ ខែធ្នូ ម្សិលមិញ ដោយម្ចាស់ផ្ទះកម្ពុជា បានឈ្នះមេដាយមាស៣ ប្រាក់១០ និងសំរឹទ្ធ១៧ ខណៈវៀតណាមប្រមូលយកមេដាយមាសទាំងអស់ក្នុងចំណោមវិញ្ញាសាចំនួន១៥ដែលពួកគេបានប្រកួតប្រជែង។

ក្រោយពីធ្វើការប្រកួតអស់រយៈពេល២ថ្ងៃចាប់ពីថ្ងៃទី៦ដល់ទី៧ ខែធ្នូ នៅលើទីលានមជ្ឈមណ្ឌលកីឡាតេក្វាន់ដូប៊ូយ៉ុងខ្មែរក្នុងពហុកីឡដ្ឋានជាតិ កម្ពុជាទទួលបានមេដាយសរុបចំនួន៣០ក្នុងនោះមាស៣ ប្រាក់១០ និងសំរឹទ្ធ១៧ ពីព្រឹត្តិការណ៍ការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ឆ្នាំ២០១៦ ដែលកម្ពុជាធ្វើជាម្ចាស់ផ្ទះ។

មេដាយមាសទាំង៣របស់កម្ពុជាដណ្តើមបានដោយកីឡាករ ឌន សៅ, យិន បូណា និងកីឡាករ ឈឿន ឈាង ក្នុងនោះ ឌន សៅ ឈ្នះលើប្រភេទទម្ងន់៩៧គីឡូក្រាម រីឯ យិន បូណា ឈ្នះលើទម្ងន់៥៧គីឡូក្រាម ចំណែកកីឡាករ ឈឿន ឈាង ឈ្នះលើប្រភេទទម្ងន់៥៣គីឡូក្រាម។

ការឈ្នះមេដាយមាស៣ ប្រាក់១០ និងសំរឹទ្ធ១៧ បានធ្វើឲ្យកម្ពុជាឈរចំណាត់ថ្នាក់លេខ២ក្នុងព្រឹត្តិការណ៍ការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ឆ្នាំ២០១៦ក្នុងចំណោម៦ប្រទេសចូលរួម។ ចំណែកវៀតណាមឈរចំណាត់ថ្នាក់លេខ១ ក្រោយឈ្នះមេដាយមាសចំនួន១៥ ខណៈថៃ ជាប់ចំណាត់ថ្នាក់លេខ៣ ដោយទទួលបានមេដាយប្រាក់៤ និងសំរឹទ្ធ៤។

ដោយឡែក ម៉ាឡេស៊ីទទួលបានមេដាយសរុបចំនួន៥ ក្នុងនោះមេដាយប្រាក់២ និងសំរឹទ្ធ៣ រីឯឡាវ ទទួលបានមេដាយប្រាក់១ និងសំរឹទ្ធ៤ ចំណែកប្រទេសសិង្ហបុរី ទទួលបានមេដាយប្រាក់១ និងសំរឹទ្ធ១៕