អន្តរជាតិ
នយោបាយអន្តរជាតិ
ទស្សនាវដ្តី Time៖ លោក ដូណាល់ ត្រាំ ជា «ប្រធានាធិបតីនៃរដ្ឋបែកខ្ញែកអាមេរិក»
×
ប្រធានាធិបតីទើបជាប់ឆ្នោតលោក ដូណាល់ ត្រាំ ទស្សនាវដ្តី Time ជ្រើសរើសជនល្បីប្រចាំឆ្នាំរបស់ខ្លួននៅថ្ងៃពុធទី៧ ធ្នូនេះ។ ភ្ជាប់ជាមួយរូបភាព ទស្សនាវដ្តី Time ដាក់ថា លោក ដូណាល់ ត្រាំ ជាប្រធានាធិបតីនៃ រដ្ឋបែកខ្ញែកគ្នាអាមេរិក (Divided States of America)។
ប្រធានាធិបតីទើបជាប់ឆ្នោតអាមេរិកលោក ដូណាល់ ត្រាំ បានក្លាយជាឥស្សរជននយោបាយមួយរូបដែលចូលរួមជាមួយលោក បារ៉ាក់ អូបាម៉ា , ស្តាលីន និងហ៊ីត្លែរ និងជនល្បីៗផ្សេងដែលមានរូបភាពលើក្របទស្សនាវដ្តី Time ។
គេឃើញរូបភាពលោក ដូណាល់ ត្រាំ កំពុងអង្គុយលើកៅអី ស្ថិតនៅលើក្របទស្សនាវដ្តី Time ដោយខាងក្រោមគេសរសេរថា «ដូណាល់ ត្រាំ ប្រធានាធិបតីរដ្ឋបែកខ្ញែកគ្នានៃអាមេរិក (Divided States of America)។
ទាក់ទងការកំណត់យកលោកជាមនុស្សប្រចាំឆ្នាំ លោក ដូណាល់ ត្រាំ បានប្រាប់បញ្ជាក់ថា មានរូបភាពនៅលើក្របទស្សនាវដ្តី Time ក្នុងនាមជាមនុស្សល្បីប្រចាំឆ្នាំនោះជាកិត្តិយសធំបំផុតរបស់លោក។ លោកបន្ថែមផងដែលថា លោកមិនមែនជាអ្នកដែលធ្វើឲ្យសង្គមអាមេរិកបែកខ្ញែកគ្នាជាបំណែកនោះទេ តែលោកទទួលស្គាល់ថា ការបែកខ្ញែកគ្នាកើតមានឡើងមែនក្នុងសង្គមអាមេរិកបច្ចុប្បន្ន។
«ពេលដែលអ្នកហៅខ្ញុំថាជាមេដឹកនាំនៃរដ្ឋបែកខ្ញែកគ្នានៃអាមេរិក ខ្ញុំមិនបានធ្វើឲ្យរឿងបែបនេះកើតឡើងទេ។ រដ្ឋទាំងនោះបែកខ្ញុំគ្នាជាចំណែកឥឡូវនេះ។ ការហែកហួរគ្នាកើតឡើងខ្លាំងណាស់។យើងនឹងបង្រួបបង្រួមពួកគេឡើងវិញ»។ នេះជាការលើកឡើងរបស់លោក ដូណាល់ ត្រាំ ក្នុងបទសម្ភាសន៍ជាមួយលោក Matt Lauer។
ដោយឡែក ការីនិពន្ធទស្សនាវដ្តី Time បានបញ្ជាក់ច្បាស់ថា រៀងរាល់ឆ្នាំខ្លួនត្រូវជ្រើសរើសមនុស្សដែលមានឥទ្ធិពលបំផុតលើផ្នែកសារព័ត៌មាន និងពិភពលោកទាំងមូលហើយពួកគេអាចជាមេដឹកនាំដែលធ្វើឲ្យរឿងកាន់តែប្រសើរឬកាន់តែអាក្រក់។
សម្រាប់ឆ្នាំ ២០១៦ លោក ដូណាល់ ត្រាំ សក្តិសមនឹងត្រូវគេជ្រើសរើសជាងគេ ដោយសារលោកធ្វើឲ្យរឿងចម្រូងចម្រាស់ជាច្រើនកើតឡើង។ លោកអាចរម្លឹកប្រជាជនអាមេរិកថា នយោបាយប្រជាភិថុតកេងចំណេញលើក្តីអស់សង្ឃឹម ហើយ សម្តីពិតមានឥទ្ធិពលខ្លាំងនៅពេលដែលវាមានការជឿជាក់លើអ្នកដែលនិយាយពាក្យពិតនោះ។ ហើយលោកបង្កើតវប្បធម៌នយោបាយមួយសម្រាប់ថ្ងៃស្អែកដោយបំផ្លាញចោទវប្បធម៌នយោបាយម្សិលមិញ។ តាមពិតទៅវាជាលើកទី ១០ ហើយដែលដូណាល់ ត្រាំ មានរូបភាពនៅលើទស្សនាវដ្តីនេះ ហើយរូបភាពដំបូងបំផុតរបស់លោកចុះផ្សាយនៅឆ្នាំ ១៩៨៩។
សូមបញ្ជាក់ថា កាលពីឆ្នាំ ២០១៥ លោក បារ៉ាក់ អូបាម៉ា ប្រធានាធិបតីជិតផុតអាណត្តិ និងលោកស្រី អធិការបតីអាល្លឺម៉ង់ អែនជេឡា មឺហ្កែល ក៏ស្ថិតនៅក្នុងចំណោមឥស្សរជននយោបាយរបស់ទស្សនាវដ្តី Time នេះ៕
© រក្សាសិទ្ធិដោយ thmeythmey.com