សភាកូរ៉េបោះឆ្នោតដកហូតតំណែងលោកស្រី ប៉ាក ហ្គឺនហេ

អន្តរជាតិ

នយោបាយអន្តរជាតិ

សភាកូរ៉េបោះឆ្នោតដកហូតតំណែងលោកស្រី ប៉ាក ហ្គឺនហេ

09, Dec 2016 , 2:33 pm

រូបភាព

ដោយ: សៅ ផលនិស្ស័យ (Sao Phal Niseiy)

ចុងក្រោយសភាកូរ៉េខាងត្បូងបានសម្រេចបោះឆ្នោតដកហូតតំណែងលោកស្រី ប៉ាក ហ្គឺនហេ (Park Geun-hye) ជាផ្លូវការដោយសារជាប់ពាក់ព័ន្ធបទល្មើសពុករលួយ។ តុលាការធម្មនុញ្ញនឹងសម្រេចចុងក្រោយថាត្រូវទទួលយកការសម្រេចនេះនិងបញ្ចប់តំណែងលោកស្រីឬអត់។ លោកស្រីក្លាយជាប្រធានាធិបតីដំបូងចាប់ពីឆ្នាំ ២០០៤ដែលត្រូវគេដកហូតអំណាចបែបនេះ។

សភាកូរ៉េខាងត្បូងបានសម្រេចបោះឆ្នោតដកហូតតំណែងលោកស្រីប្រធានាធិបតីដែលរួបរឹតដោយរឿងអាស្រូវ ប៉ាក ហ្គឺនហេ ជាផ្លូវការនៅថ្ងៃសុក្រទី ៩ ខែធ្នូនេះ។ លោកស្រី ប៉ាក ក្លាយជាប្រធានាធិបតីជាប់ឆ្នោតដំបូងចាប់ពីឆ្នាំ ២០០៤ដែលត្រូវគេដកហូតតំណែងដោយការបោះឆ្នោតក្នុងសភាបែបនេះ។

យោងតាមទីភ្នាក់ងារព័ត៌មាន Reuters សភាបោះឆ្នោតដកហូតតំណែងលោកស្រី ប៉ាក ហ្គឺនហេ ដោយសារលោកស្រីរងការចោទប្រកាន់ពីបទរំលោភអំណាច និងពុករលួយ ហើយអំណាចនិងតំណែងលោកស្រីនឹងត្រូវគេព្យួរបណ្តោះអាសន្នសិន។ ក្រោយការបោះឆ្នោតនេះ តុលាការធម្មនុញ្ញនឹងសម្រេចចុងក្រោយថា ត្រូវទទួលយកញត្តិរបស់សភានេះនិងបណ្តេញលោកស្រីជាផ្លូវការ ឬក៏បដិសេធការសម្រេចរបស់សភានេះ។ តុលាការមានរយៈពេល៦ខែដើម្បីដំណើរការនីតិវិធីរបស់ខ្លួន។

តាមពិតទៅ ការបោះឆ្នោតនេះធ្វើឡើង ក្រោយ គណបក្សប្រឆាំងចំនួនបីដែលមានអាសនៈក្នុងសភាបានដាក់សេចក្តីស្នើច្បាប់មួយទៅសភា ដើម្បីដកហូតតំណែងប្រធានាធិបតី។ សេចក្តីស្នើច្បាប់នោះត្រូវបានចុះហត្ថលេខាដោយសមាជិកសភា ១៧១ លើ ៣០០ នាក់ ហើយគេក៏ចោទប្រកាន់ថាលោកស្រី ប៉ាក បានរំលោភអំណាច រំលោភរដ្ឋធម្មនុញ្ញនិងច្បាប់ព្រហ្មទណ្ឌដោយសារតែគាត់ពាក់ព័ន្ធរឿងអាស្រូវប្រើប្រាស់ឥទ្ធិពលនយោបាយរបស់ខ្លួនដើម្បីទាញយកផលប្រយោជន៍ ហើយគេរំពឹងថាលោកស្រីនឹងក្លាយប្រធានាធិបតីដែលឡើងកាន់តំណែងតាមការបោះឆ្នោតដំបូងបំផុតដែលត្រូវគេដកហូតតំណែង។

ហើយ ការបោះឆ្នោតនេះក៏ធ្វើឡើងក្រោយពេលដែលចលនាបាតុកម្មប្រឆាំងលោកស្រីកើតមានឡើងយ៉ាងផុសផុលអស់ច្រើនសប្តាហ៍ ។ ពួកគេទាមទារឲ្យលោកស្រីចុះចេញពីតំណែង ដោយពួកគេមិនស្តាប់ការបកស្រាយនិងសុំអភ័យទោសរបស់លោកស្រី ប៉ាក ឡើយ។

សូមបញ្ជាក់ថា ប្រធានាធិបតី ប៉ាក ហ្គឺនហេ រងសម្ពាធកាន់តែខ្លាំងពីប្រជាពលរដ្ឋកូរ៉េ ក្រោយរដ្ឋអាជ្ញារកឃើញថា លោកស្រីមានឈ្មោះក្នុងរឿងអាស្រូវពុករលួយ ដែលជាប់ពាក់ព័ន្ធនឹងមនុស្សជំនិតលោកស្រីជាច្រើនរូបដូចជា លោកស្រី Choi Soon-sil និងអតីតទីប្រឹក្សាជាច្រើនរូបទៀត។ លទ្ធផលស៊ើបអង្កេតកន្លងមកបានបង្ហាញថា លោកស្រី Choi និងអតីតទីប្រឹក្សាពីរនាក់ទៀត ត្រូវជាប់ចោទពីបទរំលោភអំណាច បង្ខិតបង្ខំ និងធ្វើឲ្យលេចធ្លាយឯកសារសម្ងាត់ជាដើម៕