អន្តរជាតិ
លោក Duterte នាំស្តេចប្រដាល់ Pacquiao មកកម្ពុជាដែរ រូបភាព៖ Rappler
× លោកប្រធានាធិបតីហ្វីលីពីន Rodrigo Duterte នឹងនាំស្តេចប្រដាល់របស់ហ្វីលីពីន Manny Pacquiao មកទស្សនកិច្ចកម្ពុជាជាផ្លូវការដែរនៅថ្ងៃទី១៣ និង១៤ធ្នូក្នុងសប្តាហ៍ក្រោយនេះ។ នេះបើតាមគណនីហ្វេសប៊ុករបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជារដ្ឋមន្ត្រីទទួលបន្ទុកអមដំណើរប្រតិភូប្រធានាធិបតីហ្វីលីពីន។
លោកប្រធានាធិបតីហ្វីលីពីន Rodrigo Duterte នឹងបំពេញទស្សនកិច្ចផ្លូវរដ្ឋជាលើកដំបូងរយៈពេលពីរថ្ងៃនៅកម្ពុជានៅថ្ងៃទី១៣-១៤ ធ្នូ សប្តាហ៍ក្រោយនេះ។ ដំណើរទស្សនកិច្ចនេះ ធ្វើឡើងតបតាមការអញ្ជើញរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ដែលចុះកាលពីថ្ងៃទី៨ ធ្នូ។
ក្នុងដំណើរទស្សនកិច្ចនេះ លោកប្រធានាធិបតី Rodrigo Duterte នឹងចូលក្រាបបង្គំគាល់ព្រះករុណាព្រះបាទសម្តេចព្រះបរមនាថ នរោត្តម សីហមុនី នៅព្រះបរមរាជវាំង និងជួបពិភាក្សាទ្វេភាគីជាមួយនឹងសម្តេចនាយករដ្ឋមន្ត្រី ហ៊ុន សែន ផងដែរ។ នេះបើយោងតាមសេចក្តីប្រកាសព័ត៌មានដដែល ដែលបន្តទៀតថា ថា្នក់ដឹកនាំទាំងពីរ ក៏នឹងចុះហត្ថលេខាលើអនុស្សារណៈស្តីពីកិច្ចសហប្រតិបត្តិការក្នុងការប្រយុទ្ធប្រឆាំងឧក្រិដ្ឋកម្មឆ្លងដែន និងអនុស្សារណៈស្តីពីកិច្ចសហប្រតិបត្តិការលើវិស័យកីឡាផងដែរ។
សូមជម្រាបផងដែរ លោក រ៉ូឌ្រីហ្គូ ឌើទើតេ បានឡើងកាន់អំណាចជាប្រធានាធិបតីហ្វីលីពីនថ្មីនៅថ្ងៃទី៣០ ខែមិថុនា កន្លងទៅ។ គិតចាប់ពីការឡើងអំណាចមក លោកបានបំពេញទស្សនកិច្ចទៅកាន់បណ្តាប្រទេសមិត្តអាស៊ានដូចជា ឡាវ ឥណ្ឌូនេស៊ី ព្រុយណេ វៀតណាម និង ម៉ាឡេស៊ី ហើយកម្ពុជា គឺជាប្រទេសទីប្រាំមួយហើយ ដែលលោក នឹងត្រូវបំពេញទស្សនកិច្ចនៅក្នុងតំបន់អាស៊ាននោះ។
ទោះបីជា លោកប្រធានាធិបតីហ្វីលីពីន រូបនេះ មិនធ្លាប់បំពេញទស្សនកិច្ចផ្លូវការមកកាន់កម្ពុជាក៏ដោយ លោក ក៏ធា្លប់បានជួបជាមួយនឹងប្រមុខរាជរដ្ឋាភិបាលកម្ពុជាសម្តេច ហ៊ុន សែន ក្នុងពេលកិច្ចប្រជុំកំពូលអាស៊ានដែលប្រព្រឹត្តឡើងក្នុងក្រុងវៀងចន្ទន៍នៃប្រទេសឡាវកន្លងទៅផងដែរ។
ជាងនេះទៅទៀតនោះ សម្តេចនាយករដ្ឋមន្ត្រីកម្ពុជា ក៏ធា្លប់ប្រៀបធៀបភាពស្រដៀងគ្នារបស់សម្តេចជាមួយនឹងលោកប្រធានាធិបតីហ្វីលីពីនរូបនេះ។ ក្នុងពិធីចែកសញ្ញាបត្រដល់និស្សិតសកលវិទ្យាល័យបញ្ញាជាតិនៅវិទ្យាស្ថានជាតិអប់រំនៅថ្ងៃទី១៩ ខែកញ្ញាកន្លងទៅ ប្រមុខរាជរដ្ឋាភិបាលកម្ពុជារូបនេះ បានបញ្ជាក់អំពីអត្តចរិតរបស់សម្តេចដូចលោកប្រធានាធិបតីហ្វីលីពីនយ៉ាងនេះថា៖« ខ្ញុំមិនធ្វើដល់ថ្នាក់ប្រធានាធិបតីហ្វីលីពីននោះទេ។ តែខ្ញុំជាមួយប្រធានាធិបតីហ្វីលីពីនត្រូវគ្នាណាស់។ ខ្ញុំថា យើងចរិតដូចគ្នា»៕
© រក្សាសិទ្ធិដោយ thmeythmey.com