អន្តរជាតិ
នយោបាយអន្តរជាតិ
ឥណ្ឌានិងឥណ្ឌូណេស៊ីពង្រឹងប្រតិបត្តិការប្រឆាំងភេរវកម្មនិងរក្សាសន្តិសុខសមុទ្រ
×
ឥណ្ឌូណេស៊ីនិងឥណ្ឌាឯកភាពគ្នាក្នុងការពង្រឹងនិងពង្រីកកិច្ចសហប្រតិបត្តិការសន្តិសុខសមុទ្រនិងយោធាដើម្បីប្រយុទ្ធប្រឆាំងភេរវកម្មនិងបទឧក្រិដ្ឋឆ្លងដែនជាដើម។ ការឯកភាពគ្នានេះធ្វើឡើងស្របពេលដែលប្រធានាធិបតីឥណ្ឌូណេស៊ី Joko Widodo បំពេញទស្សនកិច្ចនៅប្រទេសឥណ្ឌាជាលើកដំបូង។
លោក Joko Widodo បានចាប់ផ្តើមដំណើរទស្សនកិច្ចផ្លូវរដ្ឋរបស់លោកទៅកាន់ប្រទេសឥណ្ឌាកាលពីថ្ងៃទី១២ ខែធ្នូ។ លោកបានជួបពិភាក្សាជាមួយនាយករដ្ឋមន្ត្រីឥណ្ឌាលោក នារិន្ទ្រា ម៉ូឌី ហើយមេដឹកនាំទាំងពីរបានឯកភាពគ្នាពង្រឹងនិងពង្រីកកិច្ចសហប្រតិបត្តិការសន្តិសុខផ្លូវសមុទ្រ និងឈានទៅប្រយុទ្ធប្រឆាំងភេរវកម្មជាដើមផងដែរ។
យោងតាមទីភ្នាក់ងារព័ត៌មាន Reuters លោក នារិន្ទ្រា ម៉ូឌី បានថ្លែងចំពោះមុខអ្នកសារព័ត៌មានថា ឥណ្ឌានិងឥណ្ឌូណេស៊ីប្តេជ្ញាពង្រឹងកិច្ចសហប្រតិបត្តិការមួយពេញលេញដែលកំណត់យកបញ្ហសន្តិសុខនិងការពារជាតិជារឿងអាទិភាព។ ជាពិសេសការរក្សាសុវត្ថិភាពនិងសន្តិសុខផ្លូវសមុទ្រតែម្តង។
ក្រោយជំនួបទ្វេភាគីនោះដែរ លោក Joko Widodo និងលោក នារិន្ទ្រាម៉ូឌី បានចេញសេចក្តីថ្លែងការណ៍រួមគ្នាមួយដោយសេចក្តីថ្លែងការណ៍នោះថ្កោលទោសចលនាភេរវកម្មសកល និងអំពាវនាវឲ្យបណ្តាសមាជិកអង្គការសហប្រជាតិទាំងអស់ចូលរួមអនុវត្តដំណោះស្រាយក្រុមប្រឹក្សាសន្តិសុខដើម្បីកម្ចាត់ក្រុមភេរវជនអន្តរជាតិ។
ដោយឡែក សេចក្តីថ្លែងការណ៍រួមរវាងប្រធានាធិបតីឥណ្ឌូណេស៊ីនិងនាយករដ្ឋមន្ត្រីឥណ្ឌា ក៏បានផ្តោតលើបញ្ហាជម្លោះសមុទ្រចិនខាងត្បូងផងដែរ ដោយគូភាគីបានសង្កត់ធ្ងន់ថា ជម្លោះសមុទ្រចិនខាងត្បូងត្រូវតែដោះស្រាយដោយសន្តិវិធី។ ហើយវាជាសារមួយសម្រាប់ក្រុងប៉េកាំងផងដែរ។
ប្រទេសឥណ្ឌានិងឥណ្ឌូណេស៊ីត្រូវបានគេស្គាល់ថាជាប្រទេសដែលមានសេដ្ឋកិច្ចរីកលូតលាស់រហ័សបំផុតមួយ។ ដូច្នេះហើយ ក្រៅពីរឹតចំណងទំនាក់ទំនងផ្នែកសន្តិសុខ ភាគីទាំងពីរក៏យកចិត្តទុកដាក់លើការពង្រឹងកិច្ចសហប្រតិបត្តិការសេដ្ឋកិច្ចដែរក្នុងនោះផ្តោតពាណិជ្ជប្រេង ឧស្ម័ន ក៏ដូចជាថាមពលករកើតឡើងវិញ, សុខាភិបាល និងព័ត៌មានវិទ្យាជាដើមដែរ។
បន្ថែមពីនេះ អនុស្សារណៈចំនួន២ដែលពាក់ព័ន្ធការពង្រឹងកិច្ចសហប្រតិបត្តិការផ្នែកកីឡា និងយុវជន ត្រូវបានចុះហត្ថលេខាដោយមេដឹកនាំទាំងពីរក្នុងដំណើរទស្សនកិច្ចផ្លូវរដ្ឋនេះដែរ៕
Tag:
Joko Widodo
នារិន្ទ្រា ម៉ូឌី
© រក្សាសិទ្ធិដោយ thmeythmey.com