ជាតិ
សម្តេច ហ៊ុន សែន កំណត់ការចេះប្រើស្មាតហ្វូនជាលក្ខខណ្ឌថ្មីសម្រាប់តែងតាំងមន្ត្រី
× ជាមួយថ្មីម្តងទៀតសម្តេចនាយករដ្ឋមន្ត្រី ហ៊ុន សែន បានប្រាប់មន្ត្រីរបស់ខ្លួនឲ្យធ្វើអក្ខរកម្មព័ត៌មានវិទ្យា ជាពិសេសគឺត្រូវចេះប្រើប្រាស់ Smartphone តែម្តង។ ការចេះប្រើស្មាតហ្វូននេះ ជាលក្ខខណ្ឌថ្មីមួយទៀត ដែលសម្តេចនាយករដ្ឋមន្ត្រី ហ៊ុន សែន កំណត់មុនតែងតាំងមន្ត្រី។
ការចេះប្រើស្មាតហ្វូន គឺធ្វើឲ្យមន្ត្រីធ្វើការលឿន។ នេះជាគុណសម្បត្តិរបស់ស្មាតហ្វូន ដែលសម្តេច ហ៊ុន សែន អនុវត្តនូវរបៀបធ្វើការជាមួយមន្ត្រីរបស់សម្តេចឲ្យបានទាន់សភាពការណ៍។ ដូច្នេះហើយ ការចេះប្រើស្មាតហ្វូន ក៏ជាលក្ខខណ្ឌ ដែលប្រមុខដឹកនាំគណបក្សប្រជាជនកម្ពុជា កំណត់សម្រាប់តែងតាំងមន្ត្រីផងដែរ។ «ខ្ញុំដាក់ចេញនូវនយោបាយមួយថា មុននឹងតែងតាំងត្រូវសួរថា អ្នកឯងចេះអាហ្នឹង(Smartphone) អត់? បើមិនចេះទេ ឲ្យរៀនឲ្យចេះសិនមុនតែងតាំង»។ សម្តេច ហ៊ុន សែន បញ្ជាក់ដូច្នេះ នៅថ្ងៃទី ១៥ ខែធ្នូ ក្នុងពិធីសម្ពោធដាក់ឱ្យប្រើប្រាស់អគារថ្មីរបស់ក្រសួងប្រៃសណីយ៍ និងទូរគមនាគមន៍ហើយ សម្តេចក៏បន្តពន្យល់ពីគុណវិបត្តិមន្ត្រីដែលមិនចេះប្រើស្មាតហ្វូន ធ្វើការងារយឺតយ៉ាងនេះថា៖«គេធ្វើការតែពីរនាទី ឯងធ្វើការដល់ទៅពីរថ្ងៃ»។
សូមស្តាប់ប្រសាសន៍របស់សម្តេច ហ៊ុន សែន៖
ជាញឹកញាប់សម្តេច ហ៊ុន សែន តែងតែប្រកាសថា រដ្ឋាភិបាលរបស់សម្តេចបច្ចុប្បន្ន គឺជារដ្ឋាភិបាលអេឡិចត្រូនិកដែលហៅតាមភាសាអង់គ្លេសថា E-government។ E-government ពីព្រោះ សម្តេចផ្ទាល់មាន Page Facebook ដែលអាចឆ្លើយឆ្លងជាមួយពលរដ្ឋដោយផ្ទាល់។ មិនត្រឹមតែប៉ុណ្ណោះ នាយករដ្ឋមន្ត្រីចាស់វស្សារូបនេះ ក៏ធ្លាប់ឲ្យមន្ត្រីតាមដានហ្វេសប៊ុករបស់សម្តេច ជាពិសេសតាមដាននូវរាល់កង្វល់របស់ប្រជាជនដែលបាន Comment នៅលើហ្វេសប៊ុកខ្លួន ហើយត្រូវចាត់វិធានការដោះស្រាយ។
សម្តេច ហ៊ុន សែន ក៏តែងនិយាយស្ទើរមិនលុះពេលអំពីការតាមដានព័ត៌មានជាច្រើនតាមទូរសព្ទស្មាតហ្វូន។ ពេលខ្លះសម្តេច មើលទូរសព្ទក្នុងពេលប្រជុំក៏មានដែរ។ តែប្រមុខរដ្ឋាភិបាលរូបនេះ ថ្លែងការពារថា នៅពេលដែលខ្លួនមើលទូរសព្ទ គឺមើលតែព័ត៌មាន មិនមែនលេងតែហ្វេសប៊ុក ដូចអ្នកប្រើប្រាស់បណ្តាញសង្គមហ្វេសប៊ុកខ្លះរិះគន់សម្តេចកន្លងមកឡើយ៕
© រក្សាសិទ្ធិដោយ thmeythmey.com