ជាតិ
អង្គការភ្លែន បន្តផ្ដល់អគារសិក្សាដល់សាលារៀននៅខេត្តរតនគិរី ដើម្បីជួយទប់ស្កាត់សិស្សបោះបង់ការសិក្សានៅតំបន់ដាច់ស្រយាល
× រតនគិរី៖ អង្គការភ្លែនអន្តរជាតិកម្ពុជា (Plan International) នៅថ្ងៃទី១២ខែធ្នូ បានសម្ពោធអគារសិក្សាមួយខ្នងមាន ៦បន្ទប់ និងអគារបណ្ណាល័យ១ខ្នងមាន ២បន្ទប់ នៅសាលាបឋមសិក្សាលុងឃុង ខេត្តរតនគិរី ដែលជាផ្នែកមួយនៃគម្រោងជួយលើកកម្ពស់ការអប់រំនៅតំបន់ជនបទដាច់ស្រយាល។
សាលាបឋមសិក្សាលុងឃុង ស្ថិតនៅភូមិលុងឃុង ឃុំលុងឃុង ស្រុកបរកែវ ខេត្តរតនគិរី។ សាលារៀននេះ ត្រូវបានបង្កើតឡើងនៅឆ្នាំ ២០០០ និងបានទទួលសិស្សចូលរៀន ដែលសិស្សភាគច្រើនគឺជាជនជាតិដើមភាគតិចទំពួន។ សាលារៀនជនបទក្នុងតំបន់ភ្នំមួយនេះ ជួបបញ្ហាខ្វះខាតបន្ទប់សិក្សាជាខ្លាំង ដោយសារតែចំនួនសិស្សបានកើនជាតពីរដងក្នុងរយៈពេលពីរឆ្នាំ។ នៅក្នុងសិក្សាឆ្នាំ ២០១៥-២០១៦ សាលាមួយនេះមានសិស្សកំពុងសិក្សាចំនួន ៤១០ ក្នុងនោះសិស្សស្រីមាន ២០៦នាក់ បើធៀបនឹងពីរឆ្នាំមុន គឺនៅក្នុងឆ្នាំសិក្សា២០១៣-២០១៤ ចំនួនសិស្សមានតែ ១៩៨ ដែលសិស្សស្រីមាន ១៤៥នាក់។
អង្គការភ្លែនបានជួយបំពេញភាពខ្វះខាតរបស់សាលារៀនមួយនេះ។ អង្គការភ្លែន និងអង្គការដៃគូរបស់ខ្លួន បានជួយកសាងអគារសិក្សា១ខ្នង, បណ្ណាល័យ១ខ្នង, បង្គន់អនាម័យ១ខ្នង និងអណ្ដូងទឹកស្អាតចំនួន១ ដែលចំណាយថវិកាសរុបជាង ១០ម៉ឺនដុល្លារ។
លោក ផែន ប៊ុនធឿន ប្រធានប្រតិបត្តិកម្មវិធីរបស់អង្គការភ្លែនប្រចាំខេត្តរតនគិរី បានថ្លែងប្រាប់សារព័ត៌មានថ្មីៗថា ការផ្ដល់អគារសិក្សាដល់សហគមន៍នៅទីនោះ នឹងជួយជំរុញសិស្សឲ្យរៀនបញ្ចប់ថ្នាក់បឋមសិក្សា និងបន្តការសិក្សាទៅកម្រិតអនុវិទ្យាល័យ។ លោកលើកឡើងយ៉ាងដូច្នេះថា៖«បើយើងមិនសាងសង់អគារសិក្សាឲ្យទេ សិស្សអាចបោះបង់ការសិក្សា ព្រោះថាខ្វះបន្ទប់រៀន សិស្សត្រូវទៅរៀនឆ្ងាយដល់ទីរួមស្រុក ដូចនេះពួកគាត់នឹងបោះបង់ចោល»។
អង្គការភ្លែនបានជួយលើកម្ពស់ការអប់រំនៅខេត្តរតនគិរី ចាប់តាំងពីឆ្នាំ២០១១ ដោយអង្គការផ្ដោតសំខាន់លើការអប់រំកុមារតូច។ មកទល់ពេលនេះ អង្គការភ្លែនបានប្រគល់អគារសិក្សាដែលសាងសង់រួច និងកំពុងសាងសង់ចំនួន ៤២អគារ ក្នុងនោះអគារថ្មរមាន៦អគារ និងឈើ ៣៦អគារ ដល់សហគមន៍នៅខេត្តរតនគិរី ដែលទទួលសិស្សឲ្យចូលរៀនរាប់ពាន់នាក់។ បើតាម លោក ប៊ុនធឿន ក្រៅពីអគារសិក្សា អង្គការភ្លែនបានជួយផ្នែកសម្ភាររៀន និងបង្រៀន, ការពង្រឹងសមត្ថភាពគ្រូ, អណ្ដូងទឹកស្អាត និងការណែនាំដល់ឳពុកម្ដាយសិស្សអំពីអាហាររូបត្ថមរបស់កុមារជាដើម។ លោក ផែន ប៊ុនធឿន អះអាងថា គម្រោងទាំងនេះ នឹងជួយលើកកម្ពស់ការអប់រំរបស់សិស្សនៅខេត្តមួយនេះបានច្រើន ពិសេសជួយទប់ស្កាត់ការបោះបង់ការសិក្សារបស់សិស្សថ្នាក់បឋមសិក្សា។
អត្រាបោះបង់ការសិក្សានៅកម្រិតបឋមសិក្សានៅខេត្តរតនគិរីមានចំនួន ១៥ភាគរយ ក្នុងនោះស្រីមាន ១៣ភាគរយ។ នេះបើតាម លោកស្រី ចាន់ ខាំឃឿ ប្រធានមន្ទីរអប់រំ យុវជននិងកីឡាខេត្តរតនគិរី។ លោកស្រីឲ្យដឹងថា ការបោះបង់ការសិក្សានៅទីនោះ គឺបណ្ដាលពីកត្តាវប្បធម៌របស់ជនជាតិភាគតិច ដែលឆាប់ឲ្យយុវតីរៀបអាពាហ៍ពិពាហ៍ និងការរស់នៅឆ្ងាយពីសាលារៀន ព្រមទាំងរកការងារធ្វើរបស់សិស្សដែលមានវ័យអាចធ្វើការបាន៕
Tag:
អប់រំ
រតនគិរី
បរកែវ
អង្គការ Plan International
© រក្សាសិទ្ធិដោយ thmeythmey.com