អន្តរជាតិ
នយោបាយអន្តរជាតិ
មេដឹកនាំផ្តាច់ការ Mugabe ឈរឈ្មោះជាថ្មីឆ្នាំ ២០១៨ និងរិះគន់អ្នកចង់ប្រជែងតំណែងលោក
× មេដឹកនាំផ្តាច់ការស៊ីមបាវ៉េលោក Robert Mugabe នឹងឈរឈ្មោះជាថ្មីទៀតសម្រាប់ការបោះឆ្នោតឆ្នាំ ២០១៨។ គណបក្សកាន់អំណាចប្រកាសបែបនេះ ក្រោយដឹកនាំវ័យជរាម្នាក់នេះព្រលះសមាជិកបក្សណាដែលចង់ជំនួសកៅអីលោកថែមទៀតក្នុងពេលផ្តល់សុន្ទរកថាទៅកាន់គណកម្មការអចិន្ត្រៃយ៍បក្ស ZANU-PF។
គណបក្សកាន់អំណាច ZANU-PF បានប្រកាសនៅថ្ងៃព្រហស្បតិ៍ទី ១៥ធ្នូនេះថា មេដឹកនាំកាន់តំណែងយូរជាងគេបំផុតមួយនៅអាហ្វ្រិក ឬនិយាយឲ្យខ្លីថាប្រធានាធិបតីមួយជីវិតរបស់ប្រទេសស៊ីមបាវ៉េ លោក Robert Mugabe នឹងឈរឈ្មោះជាថ្មីនៅឆ្នាំ ២០១៨ខាងមុខ។
យោងតាមទីភ្នាក់ងារព័ត៌មាន Reuters លេខាធិការទទួលបន្ទុករដ្ឋបាលគណបក្សកាន់អំណាច ZANU-PF លោក Ignatius Chombo បានបញ្ជាក់ថា៖«សមាជិកបក្សត្រៀមគាំទ្របេក្ខភាពរបស់លោក Mugabe ហើយ។ លោកនឹងទទួលបានការគាំទ្រជាផ្លូវការនៅចុងសប្តាហ៍ក្នុងសមាជបក្សប្រឆាំឆ្នាំ»។
លោកបានបន្ថែមថា សមាជិកគណបក្សកាន់អំណាចគាំទ្រលោក Mugabe មានវ័យ ៩២ ឆ្នាំ ព្រោះលោកបានដឹកនាំប្រទេសបានល្អ អាចបង្រួបង្រួមជាតិ និងប្រឹងប្រែងជម្នះបញ្ហាសេដ្ឋកិច្ចដែលស៊ីមបាវ៉េប្រឈមកន្លងមក។
លោក Mugabe ត្រូវបានគេចាត់ទុកថាជាមេដឹកនាំផ្តាច់ការក្រាញអំណាចនៅស៊ីមបាវ៉េ។ បច្ចុប្បន្ននេះលោកឈានចូលវ័យ ៩២ ឆ្នាំហើយ ហើយលោកបានដឹកនាំប្រទេសតាំងពីឆ្នាំ ១៩៨០ តាមការបោះឆ្នោតក្រោយការទទួលបានឯករាជ្យពីអង់គ្លេសនិងបញ្ចប់ជម្លោះជាតិសាសន៍ក្នុងប្រទេសជាផ្លូវការ។ គេមិនរំពឹងថា មេដឹកនាំជរាមួយនេះនឹងផ្ទេរអំណាចឆាប់ៗឡើយ ទោះស្ថានភាពសុខភាពរបស់លោកកាន់តែខ្សោយ ខួរក្បាលកាន់តែស្ទក់ និងមិនអាចបំពេញការងារដូចធម្មតាបានក៏ដោយ។
កន្លងមកលោក Mugabe ធ្លាប់ប្រកាសថា លោកនឹងដឹកនាំប្រទេសរហូតដល់លោកស្លាប់ តែក្រោយមកលោកអធិប្បាយថា លោកនឹងចូលនិវត្តបើសិនជាគណបក្សប្រាប់លោកឲ្យធ្វើបែបនេះ។
តាមការមើលឃើញជាក់ស្តែង យុទ្ធសាស្ត្រដែលលោក Mugabe ប្រើប្រាស់គឺ បំប៉ោងនិងបំភ្លៃស្ថានការណ៍នយោបាយ ដើម្បីឲ្យខ្លួនឯងអាចកាន់អំណាចមួយជីវិត ហើយធ្វើឲ្យប្រជាជនភ័យព្រួយ បើសិនជាអស់ពីលោកនោះ។
ត្រឡប់មកវិញ មុនមានការប្រកាសពីការឈរឈ្មោះជាថ្មីសម្រាប់ការបោះឆ្នោតនៅឆ្នាំ ២០១៨លោក Mugabe បានថ្លែងសុន្ទរកថាទៅកាន់គណៈកម្មាធិការកណ្តាបក្សកាន់អំណាច ZANU-PF ថ្ងៃពុធទី ១៤ ខែធ្នូម្សិលមិញនេះដែរ។ អ្វីដែលគួរឲ្យកត់សម្គាល់ថា លោកបានឆ្លៀតឱកាសរិះគន់សមាជិកបក្សឯទៀតដែលមានមហិច្ឆតាចង់ប្រជែងតំណែងលោកនោះ។លោកបញ្ជាក់ថា ការមានមហិច្ឆតាជារឿងមួយ តែការមានមហិច្ឆតាធំធេងពេកមិនចេះគិតនោះជារឿងគួរឲ្យខ្មាសអៀនជាទីបំផុត។
Tag:
Robert Mugabe
ស៊ីមបាវ៉េ
© រក្សាសិទ្ធិដោយ thmeythmey.com