អន្តរជាតិ
នយោបាយអន្តរជាតិ
ឥណ្ឌា នឹងវ៉ាដាច់អតីតម្ចាស់អាណានិគមអង់គ្លេសដោយក្លាយមហាអំណាចសេដ្ឋកិច្ចទី៦
×![]()
អ្នកវិភាគសេដ្ឋកិច្ចបានវាយតម្លៃថាឥណ្ឌានឹងដណ្តើមតំណែងអង់គ្លេសជាប្រទេសដែលមានសេដ្ឋកិច្ចធំបំផុតលំដាប់លេខ ៦លើពិភពលោកនៅឆ្នាំ ២០២០ខាងមុខ។ ជារឿងអាម៉ាសមួយដែលសម្រាប់អង់គ្លេសដែលធ្លាប់ជាអតីតម្ចាស់អាណានិគមឥណ្ឌា បែរត្រូវឥណ្ឌាវ៉ាដាច់រឿងសេដ្ឋកិច្ចទៅវិញ។ ប៉ុន្តែ វាជារឿងសមហេតុផល ព្រោះវាជាផ្នែកមួយដែលបង្ហាញពីផលអវិជ្ជមានដែលបណ្តាលមកពីការចង់ដើរចេញពីសហភាពអឺរ៉ុបរបស់អង់គ្លេសនោះ។ 
របាយការណ៍ទស្សនាវដ្តី Forbes បានវាយតម្លៃថា មហាយក្សអាស៊ីខាងត្បូងឥណ្ឌានឹងជំនួសតំណែងអង់គ្លេសដោយក្លាយជាមហាអំណាចសេដ្ឋកិច្ចទី៦របស់ពិភពលោកជាលើកដំបូងបំផុតក្នុងរយៈពេលជាង ១០០ឆ្នាំ ។ វាជាព័ត៌មានល្អមួយសម្រាប់ឥណ្ឌា ហើយរដ្ឋមន្ត្រីក្រសួងមហាផ្ទៃឥណ្ឌាចាត់ទុកវាជាការលោតផ្លោះមួយដ៏គួរឲ្យកត់សម្គាល់របស់ឥណ្ឌា។ នេះបានន័យថាថា ឥណ្ឌានឹងក្លាយជាមហាអំណាចសេដ្ឋកិច្ចមួយឈរពីក្រោយអាមេរិក,ចិន, ជប៉ុន,អាល្លឺម៉ង់ និងបារាំង។
តាមពិតទៅ ការឈានឆ្ពោះទៅដណ្តើមតំណែងអង់គ្លេសជាមហាអំណាចសេដ្ឋកិច្ចលេខរៀងទី ៦នេះ កើតឡើងដោយសារការរីកលូតលាស់រហ័សនៃសេដ្ឋកិច្ចឥណ្ឌាក្នុងរយៈពេល ២៥ឆ្នាំចុងក្រោយនេះ។ កាលពីខែកុម្ភៈឥណ្ឌាវ៉ាដាច់ចិន ដោយក្លាយជាប្រទេសដែលមានកំណើនសេដ្ឋកិច្ចខ្ពស់ដាច់គេលើលោក។
ហើយយោងតាមទស្សនាវដ្តី Forbes សេដ្ឋកិច្ចឥណ្ឌានឹងបន្តលូតលាស់ក្នុងកម្រិ ៦ ទៅ ៨ភាគរយក្នុងមួយឆ្នាំរាប់ចាប់ពីឆ្នាំក្រោយ ប៉ុន្តែមូលនិធិរូបីយវត្ថុអន្តរជាតិបានព្យាករណ៍ថា សេដ្ឋកិច្ចឥណ្ឌាឆ្នាំ ២០១៧ អាចស្ថិតនៅកម្រិត ៧,៦ភាគរយ។
ចាប់ពីឆ្នាំ ២០១៤ រដ្ឋាភិបាលថ្មីរបស់លោក នារិន្ទ្រា ម៉ូឌី (Narendra Modi) ព្យាយាមកំណែទម្រង់ទីផ្សារ ដែលវាជាកម្លាំងចលករមួយសំខាន់មួយដែលជួយជំរុញឲ្យសេដ្ឋកិច្ចឥណ្ឌាលូតលាស់បានល្អនិងរហ័សនោះ។
ចំណែកអង់គ្លេសឯណោះវិញ ប្រឈមបញ្ហាច្រើនក្នុងរយៈពេលចុងក្រោយ ចាប់ពីពេលប្រជាជនអង់គ្លេសបោះឆ្នោតប្រជាមតិចាកចេញពីសហភាពអឺរ៉ុបកាលពីខែមិថុនាកន្លងមកនេះ។ តម្លៃលុយផោនរបស់អង់គ្លេសធ្លាក់ថ្លៃ ២០ភាគរយ រាប់ចាប់ពីប្រជាមតិ(Brexit) ហើយបើក្រឡេកមើលកំណើនសេដ្ឋកិច្ចប្រចាំឆ្នាំវិញនោះ អង់គ្លេសស្គាល់កំណើនច្រើនបំផុតចន្លោះពី ១ទៅ២ភាគរយប៉ុណ្ណោះ។
ហើយគេព្យាករណ៍ផងដែរថា កំណើនសេដ្ឋកិច្ចក្នុងកម្រិតទាបនេះនឹងបន្តទៅរហូតដល់ ឆ្នាំ ២០២០ ដែលនេះគេមិនទាន់ទាំងរាប់ពីផលអវិជ្ជមានផ្សេងទៀតដែលអង់គ្លេសនឹងប្រឈមក្រោយការចាកចេញពីសហភាពអឺរ៉ុបជាផ្លូវការនៅពេលខាងមុខ៕
Tag:
ឥណ្ឌា
អង់គ្លេស
នារិន្ទ្រា ម៉ូឌី
© រក្សាសិទ្ធិដោយ thmeythmey.com
