អន្តរជាតិ
នយោបាយអន្តរជាតិ
សេណេហ្កាល់ត្រៀមទ័ពទម្លាក់មេដឹកនាំផ្តាច់ការហ្កំប៊ី Jammeh បើនៅបន្តក្រាញអំណាច
×![]()
មន្ត្រីជាន់ខ្ពស់ក្រុមសហគមន៍សេដ្ឋកិច្ចប្រទេសអាហ្វ្រិកខាងលិច (ECOWAS) បានអះអាងថា សេណាហ្កាល់នឹងដឹកនាំកងទ័ពអាហ្វ្រិកចូលអន្តរាគមន៍ទម្លាក់ប្រធានាធិបតី ហ្កំប៊ីដែលចាញ់ឆ្នោត លោក Yahya Jammeh បើសិនមេដឹកនាំម្នាក់នេះបន្តក្រាញអំណាច។ ឱសានវាតសម្រាប់ Jammeh ក្នុងការប្រគល់អំណាចគឺថ្ងៃ ១៩ មករាឆ្នាំក្រោយ។
ប្រធានគណៈកម្មការសហគមន៍សេដ្ឋកិច្ចអាហ្វ្រិកខាងលិច Marcel Alain de Souza បានអះអាងថាប្រាប់អ្នកសារព័ត៌មានថា កងទ័ពសេណេហ្កាល់ ត្រៀមខ្លួនចូលអន្តរាគមន៍ក្នុងទឹកដី ហ្កំប៊ីដើម្បីទម្លាក់ប្រធានាធិបតីចាញ់ឆ្នោត Yahya Jammeh បើសិនជាការចរចារបស់អាហ្វ្រិកខាងលិចជាមួយប្រធានធិបតីរូបហ្កំប៊ី ពាក់ព័ន្ធរឿងផ្ទេរអំណាចបរាជ័យនោះ។
សារព័ត៌មានអង់គ្លេស BBC បានស្រង់សម្តីមន្ត្រីជាន់ខ្ពស់ខាងលើដូច្នេះថា៖«កងទ័ពស្ថិតក្នុងស្ថានភាពប្រុងជើងការ ហើយពួកគេនឹងត្រូវបញ្ជូនទៅអន្តរាគមន៍នៅហ្កំប៊ីក្នុងករណីដែលក្រុមសន្ធានការីដែលដឹកនាំដោយប្រធានាធិបតីនីហ្សេរីយ៉ាលោក Muhammadu Buhari បរាជ័យក្នុងការជំរុញឲ្យលោក Jammeh ចុះចេញពីតំណែង»។
លោកបន្តពន្យល់ថា វាមិនមែនមានន័យថា សហគមន៍សេដ្ឋកិច្ចអាហ្វ្រិកខាងលិចមិនទុកច្រកឲ្យ លោក Jammeh ដើរឡើយ។ ប៉ុន្តែអាហ្វ្រិកខាងលិចចង់បញ្ជាក់ថា បើសិនជាលោក Jammeh ស្រលាញ់ប្រជាជនមែន លោកគួរចរចារកផ្លូវដើរនិងផ្ទេរអំណាចដោយថ្លៃថ្នូរ។
«ជាធម្មតាទេ បើសិនជាការផ្ទេរអំណាចដោយសន្តិវិធីមិនកើតឡើង វិធានការចុងក្រោយនិងតឹងរ៉ឹងបំផុតមួយនឹងត្រូវប្រើប្រាស់»។ នេះជាការបញ្ជាក់បន្ថែមរបស់លោក de Souza ។
ជារួម មេដឹកនាំផ្តាច់ការ Jammeh ដែលកាន់តំណែង ២២ឆ្នាំមកហើយនោះមានពេលវេលាដល់ត្រឹមថ្ងៃ ១៩ មករា ដើម្បីរៀបចំផ្ទេរអំណាចឲ្យប្រធានាធិបតីទើបជាប់ឆ្នោតលោក Adama Barrow។ បើនៅតែមានះទៀត កងទ័ពអាហ្វ្រិកខាងលិចនឹងទៅទម្លាក់លោក Jammeh ដល់វិមានប្រធានាធិបតី ហើយលទ្ធផលដែលលោកអាចទទួលបានវានឹងអាក្រក់ជាដើរចេញដោយខ្លួនឯង។
កាលពីសប្តាហ៍មុន មេដឹកនាំអាហ្វ្រិកខាងលិច បានចេញសេចក្តីថ្លែងការណ៍មួយ ដើម្បីដាក់សម្ពាធជាថ្មីលើមេដឹកនាំផ្តាច់ការក្រាញអំណាចហ្កំប៊ីលោក Yahya Jammeh ដែលបដិសេធលទ្ធផលបោះឆ្នោតនោះ។ សេចក្តីថ្លែងការណ៍នោះបញ្ជាក់ថា រដ្ឋអាហ្វ្រិកខាងលិចនឹងការពារប្រធានាធិបតីថ្មីលោក Adama Barrow ក៏ដូចជាទៅចូលរួមពិធីស្បថចូលកាន់តំណែងនៅដើមឆ្នាំក្រោយផងដែរ។
សេចក្តីថ្លែងការណ៍នេះត្រូវបានគេដាក់ចេញ ក្នុងកិច្ចប្រជុំកំពូលសហគមន៍សេដ្ឋកិច្ចប្រទេសអាហ្វ្រិកខាងលិច នៅរដ្ឋធានី Abuja នៃប្រទេសនីហ្សរីយ៉ា ដែលកិច្ចប្រជុំនេះមានប្រធានាធិបតីមកពីប្រទេសចំនួន ១១ តែលោក Jammeh មិនទៅចូលរួមប្រជុំឡើយ។
សូមបញ្ជាក់ លោក Jammedh ជាមេដឹកនាំផ្តាច់ការដែលកាន់តំណែងអស់ពេល ២២ឆ្នាំមកហើយ។ លោកបានចាញ់ឆ្នោតកាលពីថ្ងៃ ១ខែធ្នូកន្លងទៅ។ ក្រោយដឹងលទ្ធផល លោកបានចេញមុខទទួលស្គាល់បរាជ័យរបស់ខ្លួននៅតាមវិទ្យុរដ្ឋ ដោយលោកអះអាងថា លោកទទួលយកការសម្រេចចិត្តរបស់ប្រជាជនហ្កំប៊ីដែលចង់ឲ្យលោកចាកចេញពីតំណែង។ លោកបញ្ជាក់ថា លោកមិនតវ៉ារឿងលទ្ធផលទេ ហើយលោកនឹងចាកចេញទៅរស់នៅចម្ការសាងជីវភាពថ្មីវិញ ក្រោយផ្ទេរអំណាចខែមករាខាងមុខនេះ។ ប៉ុន្តែមួយសប្តាហ៍ក្រោយមក មេដឹកនាំរូបនេះបានក្រឡាស់សម្តីភ្លាមដោយលុបចោលលទ្ធផលបោះឆ្នោត និងទាមទារបោះឆ្នោតជាថ្មី៕
Tag:
Yayah Jammeh
Adama Barrow
Mohammed Ibn Chambas
UN
© រក្សាសិទ្ធិដោយ thmeythmey.com
