ជាតិ
សេដ្ឋកិច្ច
AFD ផ្ដល់កម្ចីសម្បទាន៣០លានអឺរ៉ូ បង្កើនសមត្ថភាពផលិតទឹកស្អាតនៅភ្នំពេញ
×
ភ្នំពេញ៖ ទីភ្នាក់ងារបារាំងដើម្បីការអភិវឌ្ឍ (AFD) បានផ្ដល់កម្ចីសម្បទានចំនួន ៣០លានអឺរ៉ូ (ប្រមាណជាង៣១លានដុល្លារ) ដល់រដ្ឋាភិបាលកម្ពុជា សម្រាប់គម្រោងបង្កើនសមត្ថភាពរោងចក្រផលិតទឹកស្អាតចំការមន និងប្រព័ន្ធចែកចាយទឹករបស់រដ្ឋាករទឹកស្វយ័តក្រុងភ្នំពេញ។
កិច្ចព្រមព្រៀងឥណទានសម្បទាននេះ ត្រូវបានធ្វើឡើងរវាងក្រសួងសេដ្ឋកិច្ច និងហិរញ្ញវត្ថុ និង ទីភ្នាក់ងារ AFD នៅថ្ងៃទី២៦ខែធ្នូ នៅទីស្ដីការក្រសួង។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត ដែលត្រូវបានដកស្រង់សំដីដោយទីភ្នាក់ងារសារព័ត៌មានកម្ពុជា AKP បានឲ្យដឹងថា តាមរយៈគម្រោងនេះ រោងចក្រផលិតទឹកស្អាតចំការមន របស់រដ្ឋាករទឹកស្វយ័តក្រុងភ្នំពេញ អាចនឹងបង្កើនសមត្ថភាពផ្គត់ផ្គង់ទឹកស្អាតឲ្យដល់ ៥២ ០០០ម៉ែត្រគូបក្នុងមួយថ្ងៃ ដែលបច្ចុប្បន្នអាចផលិតបាន ១៤ ០០០ម៉ែត្រគូបក្នុងមួយថ្ងៃ។
លោក វង្សី វិស្សុត បន្ថែមថា កម្ចីសម្បទាននេះមានសារសំខាន់ណាស់ ស្របតាមគោលនយោបាយរបស់រដ្ឋាភិបាល ក្នុងការប្រើប្រាស់ធនធានកម្ចីដៃគូអភិវឌ្ឍន៍សម្រាប់វិនិយោគលើវិស័យអាទិភាព ចំនួនបួន គឺ ផ្លូវ ទឹក ភ្លើង និងធនធានមនុស្ស៕
© រក្សាសិទ្ធិដោយ thmeythmey.com