គ្រិស្តសាសនិកដែលរស់នៅទីក្រុង Aleppo បានប្រារព្ធបុណ្យគ្រិស្មាស (Christmas) ជាលើកដំបូងបំផុតក្នុងរយៈពេល៥ឆ្នាំរាប់ចាប់ពីពេលដែលសង្គ្រាមផ្ទុះឡើង ដោយពួកគេសង្ឃឹមថា សន្តិភាពនឹងត្រឡប់មកវិញ។ ការរៀបចំនេះកើតឡើងក្រោយ ពេលដែលទាហានរដ្ឋាភិបាលរដ្ឋាភិបាលដណ្តើមកាន់កាប់ទីក្រុងនេះបានទាំងស្រុងពីក្រុមឧទ្ទាមកាលពីសប្តាហ៍មុន។
វាជារឿងរីករាយមួយសម្រាប់ប្រជាជនស៊ីរីនៅក្រុង Aleppo ដែលពួកគេអាចរៀបចំបុណ្យ Christmas បានជាលើកដំបូងបំផុតក្នុងរយៈពេល ៥ឆ្នាំមកនេះ។ វាបញ្ជាក់ឲ្យឃើញថា ស្ថានភាពស្ងប់ស្ងាត់ ហើយការប្រយុទ្ធគ្នាក៏លែងមានទៀតដែរនោះ។
យោងតាមទីភ្នាក់ងារព័ត៌មាន Reuters ប្រជាជនស៊ីរីនៅទីក្រុង Aleppo ដែលភាគច្រើនជាគ្រិស្តបរិស័ទបានរៀបចំបុណ្យសាសនានេះ ហើយពួកគេជួបជុំគ្រួសារនិងមានតុបតែងដើមឈើ Christmas ដើមសាទរពិធីបុណ្យនេះផង។
ការរៀបចំពិធីបុណ្យសាសនានេះធ្វើឡើង ក្រោយពេលដែលទាហានរដ្ឋាភិបាលកាន់កាប់ក្រុង Aleppo បានទាំងស្រុងពីក្រុមឧទ្ទាមកាលពីសប្តាហ៍មុននោះ ក្រោយមានការអនុវត្តកិច្ចព្រមព្រៀងជម្លៀសប្រជាជនចេញពីភាគខាងកើតក្រុង Aleppo។
នៅវិហារ St. Elias ដែលមានទីតាំងនៅក្រុង Aleppo ក្រុមបុព្វជិតសាសនាគ្រិស្តបានបួងសួងសុំសន្តិភាព នៅក្នុងពិធីបុណ្យនេះដែរ ហើយប្រជាជនរាប់រយអ្នកបានចូលរួមបួងសួងដែរ ក្នុងនោះមានទាំងមន្ត្រីរុស្ស៊ីថែមទៀត។
ប្រជាជនស៊ីរីទាំងនោះបង្ហាញក្តីរីករាយ ហើយខ្លះអះអាងថាសន្តិភាពបានត្រឡប់មកហើយ ដោយក្រុមទាហានរដ្ឋាភិបាលបានដណ្តើមកាន់កាប់ទីក្រុង Aleppoបានទាំងស្រុងពីក្រុមឧទ្ទាមកាលពីសប្តាហ៍មុនថែមទៀត។
ប្រធានសហគមន៍គ្រិស្តសាសនិក George Bakhash បានថ្លែងថា៖« បរិយាកាសនៃពិធីបុណ្យនេះគឺអស្ចារ្យណាស់។ វាជាថ្ងៃកំណើតរបស់ព្រះយេស៊ូ ហើយវាក៏ជាថ្ងៃកំណើតថ្មីរបស់ក្រុង Aleppo ដែរ»។ មេសហគមន៍រូបនេះក៏បានអះអាងផងដែរថា នៅពេលនេះប្រជាជននៅក្រុង Aleppo អាចគោរពប្រណិប័តន៍សាសនាបានដោយសេរី ហើយគ្មានភ័យព្រួយពីគ្រាប់មីស៊ីល ឬការបាញ់ផ្លោងពីទីតាំងក្រុមឧទ្ទាមកាន់កាប់អ្វីទៀតឡើយ។
តាមពិតទៅ ប្រជាជនស៊ីរីដែលជាគ្រិស្តសាសនិកភាគច្រើនជាអ្នកគាំទ្ររបបដឹកនាំលោក បាសា អាល់អាសាដ (Bashar al-Assad) ក្នុងសង្គ្រាមស៊ីវិលនេះ ដោយសារពួកគេមើលឃើញថា អាសាដ ជាប្រជាជនម៉ូស្លីមមកពីនិកាយស៊ីអ៊ីតដែលជាក្រុមភាគតិចនៅក្នុងប្រទេសស៊ីរី។ ហើយពួកគេមើលឃើញថា អាសាដជាអ្នកការពារប្រជាជាភាគតិច ប្រឆាំងនឹងក្រុមឧទ្ទាមដែលមកពីសហគមន៍ម៉ូស្លីមនិកាយស៊ូនីដែលជាក្រុមភាគច្រើននោះ។
សូមបញ្ជាក់បន្តិចថា សង្គ្រាមស៊ីវិលស៊ីរីផ្ទុះឡើងនៅខែមីនាឆ្នាំ ២០១១ ក្រោយរដ្ឋាភិបាលបង្ក្រាបចលនាប្រឆាំងរដ្ឋាភិបាល។ សង្គ្រាមនេះបានអូសបន្លាយមកដល់បច្ចុប្បន្នដោយប្រែក្លាយពីសង្គ្រាមស៊ីវិលទៅជាសង្គ្រាមដែលលូកលាន់ដោយមហាអំណាចអាមេរិកនិងរុស្ស៊ីទៅវិញ។ អ្វីដែលគួរឲ្យកត់សម្គាល់ប៉ុន្មានឆ្នាំមកនេះ សង្គ្រាមនេះបានឆក់យកជីវិតមនុស្សអស់ជាង ៣សែននាក់ ហើយ។
យ៉ាងណាមិញ ជ័យជម្នះរបស់លោក បាសា អាល់អាសាដ ដោយដណ្តើមបានទីក្រុង Aleppo ទាំងស្រុងកន្លងមក មិនមែនជាអ្វីដែលលោកខាងលិចចង់បាន ហើយវាក៏មិនអាចបញ្ជាក់ថា សង្គ្រាមនេះនឹងចប់ឆាប់ៗដែរ។ គេរង់ចាំមើលដំណោះស្រាយនយោបាយដែលនឹងអាចត្រូវគេបង្កើតឡើងនៅពេលខាងមុខផង។ បេសកជនពិសេសអង្គការសហប្រជាជាតិលោក Staffan de Mistura បានអះអាងថា ថ្វីបើការប៉ុនប៉ងបង្កើតដំណោះស្រាយបញ្ចប់សង្គ្រាមស៊ីរីបរាជ័យច្រើនដងកន្លងមកក៏ដោយ លោករំពឹងថា ដំណើរការចរចាគ្នាថ្មីមួយទៀតនឹងត្រូវបង្កើតឡើងនៅខែកុម្ភៈឆ្នាំក្រោយនៅក្រុងហ្សឺណែវ៕