ជាតិ
អយ្យការខេត្តបន្ទាយមានជ័យ៖ ប៉ូលិសប៉ោយប៉ែតឈ្មោះ ឈាន ពិសិដ្ឋ ពិតជាត្រូវឡានបុក ប្រភពពីហ្វេសប៊ុក
× អយ្យការអមសាលាដំបូងខេត្តបន្ទាយមានជ័យ បានបញ្ជាក់ថា ប៉ូលិសឈ្មោះ ឈាន ពិសិដ្ឋ ពិតជាត្រូវរថយន្តរបស់ ឈ្មោះឌិន ពុទ្ធី បុករហូតដល់សន្លប់ពិតមែន។ ការអះអាងនេះ គឺបន្ទាប់ពីអយ្យការទទួលចាត់ការសំណុំរឿងនេះ ពិនិត្យយ៉ាងម៉ត់ចត់លើភស្តុតាងនានា ដែលស៊ើបអង្កេតដោយមន្ត្រីនគរបាលយុត្តិធម៌។
អយ្យការអមសាលាដំបូងខេត្តបន្ទាយមានជ័យ នៅថ្ងៃទី២៧ ខែធ្នូនេះ បានចេញសេចក្តីថ្លែងការណ៍បញ្ជាក់ ពីករណីប៉ូលិសដួលសន្លប់នៅមុខរថយន្តរបស់ដែលល្បីពេញបណ្តាញសង្គមហ្វេសប៊ុកនៅពេលថ្មីៗនេះ។
ផ្អែកសេចក្តីថ្លែងការណ៍ ឈ្មោះ ឈាន ពិសិដ្ឋ មានមុខងារជានាយរងបុស្តិ៍បុស្តិ៍ច្រកទ្វារព្រំដែនអន្តរជាតិប៉ោយប៉ែត ពិតជាត្រូវរថយន្តរបស់ ឈ្មោះឌិន ពុទ្ធី ជាប្រធានសមាគមន៍សេដ្ឋកិច្ចក្រៅប្រព័ន្ធ បុករហូតដល់សន្លប់ពិតមែន។ សេចក្តីថ្លែងការណ៍របស់អយ្យការអមសាលាដំបូងខេត្តបន្ទាយមានជ័យ សរសេរដូច្នេះថា៖«ជនរងគ្រោះឈាន ពិសិដ្ឋ ពិតជាបានរបួសជើងស្តាំដោយសាររថយន្តបុក រហូតដល់សន្លប់ពិតមែន ហើយមិនមែនជាការធ្វើពុត ដើម្បីទម្លាក់កំហុសលើឈ្មោះ ឌិន ពុទ្ធី ដូចការផ្សព្វផ្សាយនៅលើហ្វេសប៊ុក និងសារព័ត៌មានមួយចំនួននោះទេ»។
ការបញ្ជាក់ដូច្នេះ គឺបន្ទាប់ពីតំណាងអយ្យការដែលទទួលចាត់ការសំណុំរឿងនេះ បានពិនិត្យយ៉ាងម៉ត់ចត់ទៅលើឯកសារជាភស្តុតាងនានា ដែលស៊ើបអង្កេតដោយមន្ត្រីនគរបាលយុត្តិធម៌ ភ្ជាប់ក្នុងសំណុំរឿង មានដូចជាឃ្លីបវីដេអូ ចម្លើយសាក្សីមួយចំនួន ពិសេសរូបភាពដែលបង្ហាញថាជនរងគ្រោះ ឈាន ពិសិដ្ឋ កំពុងដេកដួលនៅចំពីមុខរថយន្តរបស់ឈ្មោះឌិន ពុទ្ធី។ រូបភាពដែលជនរងគ្រោះ ដួលមកផ្នែកខាងឆ្វេងមានភាពស៊ីសង្វាក់ដែលបង្ហាញពីស្នាមរបួសនៅលើភ្លៅខាងស្តាំរបស់ជនរងគ្រោះ និងលិខិតបញ្ជាក់ពីស្ថានភាពជនរងគ្រោះ ពីមន្ទីរពេទ្យសម្រាកព្យាបាល។
តំណាងអយ្យការអមសាលាដំបូងខេត្តបន្ទាយមានជ័យ បានបើកការស៊ើបអង្កេតលើឈ្មោះ ឌិន ពុទ្ធី ពីបទអំពើហិង្សាដោយចេតនាមានស្ថានទម្ងន់ទោស តាមមាត្រា២១៨នៃក្រមព្រហ្មទណ្ឌ និងបញ្ជូនទៅចៅក្រមស៊ើបសួរបន្តនីតិវិធីរួចហើយ។ អយ្យការអមសាលាដំបូងខេត្ត នៅតាមដាន និងជំរុញទៅចៅក្របស៊ើបសួរស្រាវជ្រាវរឿងនេះឲ្យច្បាស់លាស់ ដើម្បីបង្ហាញការពិត និងផ្តល់យុត្តិធម៌ដល់ភាគីទាំងសងខាង។
វីដេអូ និងរូបថត ប៉ូលិស ដួលសន្លប់មុខរថយន្ត បានល្បីល្បាញពេញបណ្តាញសង្គមហ្វេសប៊ុក តាំងពីព្រឹកថ្ងៃទី២២ ខែធ្នូ។ ករណីនេះ កើតឡើងនៅចំណុចស្ពានមិត្តភាពកម្ពុជា ថៃ ក្បែរបុស្តិ៍ច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ។ ទាក់ទងនឹងករណីនេះ លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិ បានលើកឡើងថា ហាក់ដូចជាមានមិនភាពប្រក្រតី និងស្នើឲ្យក្រសួងមហាផ្ទៃ ស៊ើបអង្កេតករណីនេះ ដើម្បីបំបាត់មន្ទិលសង្ស័យរបស់សាធារណជន និងបង្ហាញពីភាពត្រឹមត្រូវសមត្ថកិច្ច៕
© រក្សាសិទ្ធិដោយ thmeythmey.com