ជាតិ
នយោបាយជាតិ
CNRP ថា រកឃើញជនជាតិវៀតណាមជាង ៥ ពាន់នាក់ បានចុះឈ្មោះបោះឆ្នោត លោកស្រី ម៉េង សុភារី ប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្គ្រោះជាតិ។ រូបថត រឿន ភារុន
× ភ្នំពេញ៖ មន្ត្រីគណបក្សសង្គ្រោះជាតិ បានបញ្ជាក់ថា គណបក្សបានរកឃើញ ជនជាតិវៀតណាមជាង ៥ ពាន់នាក់ បានចុះឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់កន្លងទៅ។ មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត ឆ្លើយតបថា គ.ជ.ប បើកសិទ្ធិឲ្យគណបក្សនយោបាយ ប្តឹងតវ៉ានៅពេលដែលបញ្ជីឈ្មោះបោះឆ្នោតដំបូង ដែលនឹងចេញផ្សាយនៅថ្ងៃទី ៣ ខែមករា ឆ្នាំ ២០១៧ ។
លោកស្រី ម៉េង សុភារី ប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្គ្រោះជាតិ បាននិយាយថា គណបក្សសង្គ្រោះជាតិ បានរកឃើញជនជាតិវៀតណាមប្រមាណ ៥ពាន់នាក់ បានចុះឈ្មោះក្នុងអំឡុងពេលយុទ្ធនាការចុះឈ្មោះបោះឆ្នោតឃុំ-សង្កាត់ ពីខែកញ្ញា ដល់ចុងខែតុលា កន្លងទៅ ។ លោកស្រីបានពន្យល់ប្រាប់ក្រុមអ្នកសារព័ត៌មាន នៅថ្ងៃទី២៨ ខែធ្នូ នៅទីស្នាក់ការ គ.ជ.ប ថា ក្នុងចំណោមអ្នកទាំង ៥ ពាន់នាក់នោះ មានឈ្មោះជាង ៣ពាន់នាក់ នៅរាជធានីភ្នំពេញ និងជិត ៩ រយនាក់នៅក្នុងខេត្តស្វាយរៀង ព្រមទាំងប្រមាណ ១ ពាន់នាក់ទៀត រកឃើញនៅក្នុងខេត្តចំនួន ២៣ ផ្សេងទៀត ។ លោកស្រីបញ្ជាក់ថា ជនជាតិវៀតណាម ដែលគណបក្សខ្លួនរកឃើញនោះ សុទ្ធតែមានអត្តសញ្ញាណបណ្ណសញ្ជាតិខ្មែរ។
មន្ត្រីជាន់ខ្ពស់ប្រឆាំងរូបនេះ បានប្រាប់ភស្តុតាងដែលបក្សខ្លួនចោទថា អ្នកទាំង ៥ ពាន់នាក់នោះ ជាជនជាតិវៀតណាម ដោយសារការនិយាយសំនៀងភាសាខ្មែរមិនច្បាស់ និងផ្អែកលើការរាយការណ៍របស់សកម្មជនបក្សនៅតាមមូលដ្ឋាន ទូទាំងប្រទេស។ មន្ត្រីបក្សប្រឆាំងរូបនេះ បានចោទសួរថា តើជនជាតិ វៀតណាមទាំងនោះ មានអត្តសញ្ញាណបណ្ណខ្មែរ ដោយការប្រកាសសញ្ជាតូបនីយកម្ម តាមរយៈព្រះរាជក្រឹត្យស្របច្បាប់ឬទេ? ទន្ទឹមនឹងនេះ លោកស្រីបញ្ជាក់ថា គណបក្សសង្គ្រោះជាតិ នឹងតវ៉ាលុបឈ្មោះពួកគេចេញពីបញ្ជីឈ្មោះបោះឆ្នោត នាពេលខាងមុខ។
ពាក់ព័ន្ធនឹងបញ្ហានេះ លោក ទេព នីថា អគ្គលេខាធិការគ.ជ.ប បានឆ្លើយតបនឹងអ្នកសារព័ត៌មានថា គ.ជ.ប បានពិនិត្យ និងចុះ ឈ្មោះអ្នកមានអត្តញ្ញាណបណ្ណសញ្ជាតិខ្មែរ ក្នុងបញ្ជីបោះឆ្នោតត្រឹមត្រូវ។ តែចំពោះបញ្ហាជំទាស់នានា លោក នីថា ដែលចូលរួមកិច្ចប្រជុំស្តីពី ការត្រៀមបិទផ្សាយបញ្ជីបោះឆ្នោត ដំបូង និងបញ្ជីឈ្មោះអ្នកដែលត្រូវលុបចេញពីបញ្ជីបោះឆ្នោត បាននិយាយនៅថ្ងៃទី២៨ ខែធ្នូនេះ ថា គ.ជ.ប នឹងផ្តល់ឱកាសឲ្យគណបក្សនយោបាយ និងអ្នកចុះឈ្មោះបោះឆ្នោត ប្តឹងតវ៉ាជំទាស់ នឹងបញ្ជីឈ្មោះបោះឆ្នោតដំបូង។ ជាមួយគ្នានេះដែរ លោកបន្ថែមថា បញ្ជីឈ្មោះបោះឆ្នោតដំបូង នឹងបិទផ្សាយដំបូង ពីថ្ងៃទី៣ ដល់១៤ មករា ខាងមុខ ដើម្បីឲ្យពួកគេត្រួតពិនិត្យឈ្មោះតាមឃុំ-សង្កាត់រៀងខ្លួនៗ ហើយបើបញ្ជីឈ្មោះបោះឆ្នោតមិនត្រឹមត្រូវ អាចដាក់ពាក្យប្តឹងមក គ.ជ.ប ឲ្យកែតម្រូវបាន។
សូមបញ្ជាក់ថា ក្រោយបញ្ចប់ការចុះឈ្មោះបោះឆ្នោតថ្មី មានប្រជាពលរដ្ឋខ្មែរ ចំនួន ៧,៨៧៣,១៩៤ ស្មើនឹង៨១ភាគរយ បានទៅចុះឈ្មោះបោះឆ្នោត ក្នុងចំណោមប្រជាពលរដ្ឋដែលមានអាយុគ្រប់បោះឆ្នោតចំនួន ៩,៦៦៤,២១៦ លាននាក់។ ចំនួនដែលចុះឈ្មោះបានក្នុងបញ្ជីថ្មីនេះ ថយចុះជិត ២លាននាក់ ធៀបទៅនឹង ៩លាន ២ សែននាក់ដែល គ.ជ.ប បានចុះឈ្មោះសម្រាប់ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ កាលពីឆ្នាំ២០១២ ៕
Tag:
ម៉េង សុភារី
បោះឆ្នោត
គជប
វៀតណាម
© រក្សាសិទ្ធិដោយ thmeythmey.com