ក្រសួងសាធារណការគ្រោងរៀបចំការដឹកជញ្ជូនតាមផ្លូវទឹក ដើម្បីកាត់បន្ថយស្ទះចរាចរណ៍នៅភ្នំពេញ

ជាតិ

សង្គមជាតិ

ក្រសួងសាធារណការគ្រោងរៀបចំការដឹកជញ្ជូនតាមផ្លូវទឹក ដើម្បីកាត់បន្ថយស្ទះចរាចរណ៍នៅភ្នំពេញ

28, Dec 2016 , 9:32 pm

រូបភាព

ដោយ:

ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានលើកឡើងពីផែនការរៀបចំប្រព័ន្ធដឹកជញ្ជូនតាមផ្លូវទឹកនៅរាជធានីភ្នំពេញ និងផ្នែកខ្លះនៃខេត្តកណ្ដាល ដើម្បីកាត់បន្ថយចរាចរណ៍តាមផ្លូវគោក។ លោកឲ្យដឹងថា គម្រោងនេះកំពុងស្ថិតនៅក្នុងការសិក្សារបស់កំពង់ផែស្វយ័តភ្នំពេញ និងដៃគូឯកជន។

ថ្លែងក្នុងសន្និបាតបូកសរុបការងារឆ្នាំ២០១៦ និងទិសដៅឆ្នាំ២០១៧ របស់ក្រសួងសាធារណការ និងដឹកជញ្ជូន នៅថ្ងៃទី២៨ខែធ្នូ លោក ស៊ុន ចាន់ថុល មានប្រសាសន៍ថា ជំហានដំបូង ក្រសួងនឹងរៀបចំឲ្យមានការដឹកជញ្ជូនអ្នកដំណើរតាមផ្លូវទឹក ដែលលោកសង្ឃឹមថា គម្រោងនេះនឹងលេចចេញជារូបរាងនៅឆ្នាំ២០១៧ ។ ការដឹកជញ្ជូននេះ អាចចេញពីទីតាំងនៃសង្កាត់ព្រែកភ្នៅ មកម្ដុំផ្សារចាស់ បន្តដល់ក្រុងតាខ្មៅនៃខេត្តកណ្ដាល កៀនស្វាយ និងស្រុកស្អាង។

លោក ស៊ុន ចាន់ថុល បន្ថែមថា ជំហានបន្តបន្ទាប់ ក្រសួងនឹងជំរុញការកសាងកំពង់ផែទឹកសាបបន្ថែមទៀតនៅភ្នំពេញ ដើម្បីសម្រួលការដឹកជញ្ជូនកសិផលពីបណ្ដាខេត្ត។

លោក ស៊ុន ចាន់ថុល មិនទាន់អាចបញ្ជាក់បានពីទំហំទឹកប្រាក់វិនិយោគលើគម្រោងនេះបាននោះទេ ដោយលោកអះអាងថា គម្រោងនេះកំពុងស្ថិតក្នុងការសិក្សានៅឡើយ។

សូមស្ដាប់ប្រសាសន៍ លោក ស៊ុន ចាន់ថុល ខាងក្រោមនេះ៖