អន្តរជាតិ
នយោបាយអន្តរជាតិ
លោក Duterte គំរាមចាប់មន្ត្រីពុករលួយបោះទម្លាក់ពីលើឧទ្ធម្ភាគចក្រ ប្រធានាធិបតីហ្វីលីពីន Rodrigo Duterte (រូបភាព GMA Network)
×
បុរសខ្លាំងរបស់ហ្វីលីពីន Rodrigo Duterte ដែលបញ្ជាឲ្យបាញ់ជនសង្ស័យគ្រឿងញៀនមិនរើសមុខ បានគំរាមទម្លាក់មន្ត្រីពុករលួយពីលើឧទ្ធម្ភាគចក្រ បើពួកគេមិនឈប់ប្រព្រឹត្តអំពើនេះទេ។ លោក Duterte ដែលចូលកាន់តំណែងបានកន្លះឆ្នាំក៏សារភាពថា លោកធ្លាប់រុញទម្លាក់អ្នកចាប់ជំរិតមនុស្សម្នាក់ពីលើឧទ្ធម្ភាគចក្រម្ដងដែរ ដូច្នេះលោកនឹងមិនរុញរាទម្លាក់មន្ត្រីពុករលួយឡើយ។
«ខ្ញុំ នឹងចាប់អ្នកដាក់លើឧទ្ធម្ភាគចក្រហើយហោះទៅក្រុងម៉ានីល។ ហើយខ្ញុំនឹងធាក់អ្នកទម្លាក់ពីលើឧទ្ធម្ភាគចក្រតែម្ដង»។ នេះគឺជាសម្ដីព្រមានរបស់ប្រធានាធិបតីហ្វីលីពីន Rodrigo Duterte ចំពោះមន្ត្រីពុករលួយ ខណៈលោកធ្វើដំណើរទៅកាន់តំបន់រងគ្រោះដោយខ្យល់ព្យុះ Nock-Ten ។ លោកអះអាងថា លោកមិនសូញសាញធ្វើដូចនេះឡើយ ព្រោះលោកក៏ធ្លាប់ទម្លាក់អ្នកចាប់ជំរិតពីលើឧទ្ធម្ភាគចក្រដែរ។
បើតាមសារព័ត៌មាន The Philippines Star លោក Duterte ដែលពេលនោះជាអភិបាលក្រុង Davao នៅឡើយ បានរៀបរាប់ថា លោកបានតាមចាប់ឧក្រិដ្ឋជន ដែលបានចាប់ជំរិតជនជាតិចិន និងបានធ្វើបាបជនរងគ្រោះ បើទោះជាពួកគេទទួលបានប្រាក់បង់រំលោះក៏ដោយ។ បន្ទាប់ពីចាប់បាន លោកក៏បញ្ជាឲ្យដឹកឧទ្ធម្ភាគចក្រដឹកពួកគេ ហើយកំណត់កម្ពស់ និងទីតាំងសម្រាប់ទម្លាក់ឧក្រិដ្ឋជន ដើម្បីកុំឲ្យមានចលាចល។
ថ្លែងទៅកាន់អ្នកចូលរួមជាច្រើននាក់នៅឯខេត្ត Camarines Sur នៅថ្ងៃទី២៧ ខែធ្នូ លោក Duterte ក៏បានព្រមានមន្ត្រីពុករលួយទៀតថា យុទ្ធនាការបង្ក្រាបគ្រឿងញៀន នឹងនៅតែជារបៀបវារៈសំខាន់នៃអាណត្តិ ៦ ឆ្នាំរបស់លោក ហើយលោកនឹងចាត់វិធានការប្រយុទ្ធប្រឆាំង ដូចដែលលោកកំពុងធ្វើលើគ្រឿងញៀនដូច្នោះដែរ។ ក្នុងយុទ្ធនាការបង្ក្រាបគ្រឿងញៀននេះ មនុស្សជាច្រើនពាន់នាក់ត្រូវបានសម្លាប់ និងរងការរិះគន់យ៉ាងខ្លាំង។
សូមរម្លឹកផងដែរថា នៅថ្ងៃទី១៤ ធ្នូ លោក Duterte បានសារភាពថា លោកធ្លាប់សម្លាប់ជនសង្ស័យបីនាក់ ដែលពាក់ព័ន្ធការជួញដូរគ្រឿងញៀនដោយផ្ទាល់ នៅពេលដែលលោក ធ្វើជាអភិបាលក្រុង Davao នោះ។ លោក បានសង្កត់ធ្ងន់ថា លោកបានធ្វើដំណើរជុំវិញក្រុង Davao តាមរយៈម៉ូតូ និងឆ្លៀតល្បាតតាមដងផ្លូវ ដោយព្យាយាមស្វែងរកកន្លែងដែលមានបញ្ហា។
ដោយសារការសារភាពនេះហើយ ទើបប្រមុខសិទ្ធិមនុស្សអង្គការសហប្រជាជាតិ បានទទូចឲ្យអាជ្ញាធរ និងតុលាការហ្វីលីពីនចាត់វិធានការលើករណីនេះដើម្បីធានាពីនីតិរដ្ឋ និងច្បាប់អន្តរជាតិ។ ប៉ុន្តែសំណើនេះ ត្រូវបានហ្វីលីពីនមិនអើពើ ហើយលោក Duterte ផ្ទាល់ ក៏បានជះកំហឹងទៅលើប្រមុខសិទ្ធិមនុស្សអង្គការសហប្រជាជាតិដែលមានចេតនាចង់ឲ្យមានការស៊ើបអង្កេតលើលោកពីបទឃាតកម្មនោះ ដោយប្រើពាក្យអសុរោះ ដូចដែលលោកធ្លាប់ប្រើដាក់មេដឹកនាំដទៃទៀត៕
Tag:
ហ្វីលីពីន
Rodrigo Duterte
© រក្សាសិទ្ធិដោយ thmeythmey.com