អន្តរជាតិ
នយោបាយអន្តរជាតិ
ចិនកំពុងក្រពុលមុខ ដោយប្រធានាធិបតីតៃវ៉ាន់នឹងចូលទឹកដីអាមេរិកខែក្រោយ
× ក្រសួងការបរទេសតៃវ៉ាន់បានអះអាងថា ប្រធានាធិបតីតៃវ៉ាន់លោកស្រី Tsai Ing-wen នឹងឆ្លងកាត់សហរដ្ឋអាមេរិកនៅខែក្រោយមុនលោកស្រីបន្តដំណើរទៅកាន់អាមេរិកឡាទីន។ ចិនកំពុងឃ្លាំមើលដោយចិត្តខឹងសម្បារ ហើយចិនក៏បារម្ភផងដែរថាតៃវ៉ាន់កំពុងស្វះស្វែងរកការប្រកាសឯករាជ្យជាផ្លូវការ ក្នុងពេលលោកដូណាល់ ត្រាំ ដឹកនាំអាមរិក។
ដូចការគ្រោងទុក លោកស្រី ប្រធានាធិបតី Tsai Ing-wen នឹងចូលទឹកដី អាមេរិក មុនលោកស្រីបន្តដំណោះទៅទស្សនកិច្ចប្រទេសនៅតំបន់អាមេរិកឡាទីននោះ។ ការបើកទ្វារទទួលឲ្យមេដឹកនាំតៃវ៉ាន់ចូលសហរដ្ឋអាមេរិកនេះកំពុងធ្វើឲ្យចិនក្តៅក្រហាយខ្លាំង។
យោងតាមទីភ្នាក់ងារព័ត៌មាន Reuters ក្រសួងការបរទេសតៃវ៉ាន់បានបញ្ជាក់ថា ការចូលសំចតនៅសហរដ្ឋអាមេរិករបស់លោកស្រីប្រធានាធិបតីតៃវ៉ាន់នឹងចាប់ផ្តើមនៅខែក្រោយនេះ។ ហើយព័ត៌មានលម្អិតពាក់ព័ន្ធការចូលឆ្លងចូលទឹកដីអាមេរិកនេះ នឹងត្រូវបញ្ចេញជាសាធារណនៅចុងសប្តាហ៍នេះ។
តាមពិតទៅ លោកស្រីប្រធានាធិបតីតៃវ៉ាន់ Tsai Ing-wen នឹងអញ្ជើញទៅទស្សនកិច្ចនៅប្រទេសបីមានដូចជានីការ៉ាហ្គា,ក្វាតេម៉ាឡា និងអែលសាល់វ៉ាឌ័រ ហើយលោកស្រីត្រូវចុះសំចតនៅទីក្រុងញូវយ៉ក។
កាលពីដើមខែធ្នូនេះ ក្រសួងការបរទេសចិនបានទទូចសុំឲ្យក្រុងវ៉ាស៊ីនតោនបិទមិនឲ្យលោកស្រី ប្រធានាធិបតីតៃវាន់ចូលទឹកដីអាមេរិក។ ប៉ុន្តែអាជ្ញាធរអាមេរិកបានអះអាងថា ការចូលសំចតនៃយន្តហោះរបស់លោកស្រីប្រធានាធិបតីតៃវ៉ាន់នឹងនៅតែបន្តស្របតាមការអនុវត្តក្នុងទំនាក់ទំនងយូរអង្វែងរបស់អាមេរិកដែលវាស្របតាមទំនាក់ទំនងដែលមិនផ្លូវការរបស់អាមេរិកនិងតៃវ៉ាន់នោះ។
អ្វីដែលរឹតតែធ្ងន់ធ្ងរជាងនេះទៀតគឺ លោកដូណាល់ ត្រាំ បានប្រកាសថា លោកនឹងជួបជាមួយប្រធានាធិបតីតៃវ៉ាន់ទល់មុខគ្នាពេលលោកស្រីចុះចតនៅក្រុងញូវយ៉កទៀតផង។ វាជាសកម្មភាពមួយដែលនឹងអាចបង្កផលប៉ះពាល់ខ្លាំងដល់ទំនាក់ទំនងរវាងចិននិងតៃវ៉ាន់ជាក់ជាមិនខាន។
មហាយក្សចិនដែលឈ្នះសង្គ្រាមជាមួយតៃវ៉ាន់ឆ្នាំ ១៩៤៩នោះ មានមន្ទិលសង្ស័យខ្លាំងថា រដ្ឋាភិបាលតៃវ៉ាន់នឹងចាប់ផ្តើមស្វះស្វែងរកការប្រកាសឯករាជ្យនៅពេលខាងមុខ ខណៈដែលរដ្ឋបាលថ្មីអាមេរិករបស់លោក ដូណាល់ ត្រាំ មានទំនោរគាំទ្រកោះតៃវ៉ាន់នេះទៀត។
តាមពិតទៅសហរដ្ឋអាមេរិកបានផ្លាស់ប្តូរទំនាក់ទំនងការទូតដោយឈប់ទទួលស្គាល់តៃវ៉ាន់ ដោយងាកមករកចិនវិញឆ្នាំ ១៩៧៩ ហើយអាមេរិកបានសន្យាទទួលស្គាល់គោលនយោបាយចិនតែមួយដោយចាត់ទុកតៃវ៉ាន់ជាផ្នែកមួយរបស់ចិនផងដែរ។
ដោយឡែក ក្រោយជាប់ឆ្នោត លោក ដូណាល់ ត្រាំ បានជជែកជាមួយលោកស្រី Tsai Ing-wen តាមទូរសព្ទកន្លងមករហូតបង្កការក្តៅក្រហាយខ្លាំងដល់ក្រុងប៉េកាំង ហើយ អ្វីដែលរឹតតែធ្ងន់ធ្ងរជាងនេះទៀតគឺ លោកដូណាល់ ត្រាំ បានប្រកាសថា លោកនឹងជួបជាមួយប្រធានាធិបតីតៃវ៉ាន់ទល់មុខគ្នាពេលលោកស្រីចុះចតនៅក្រុងញូវយ៉កទៀតផង។ ប៉ុន្តែមិនទាន់មានការបញ្ជាក់ច្បាស់ថា លោកនឹងជួបប្រធានាធិបតីតៃវ៉ាន់ពិតឬយ៉ាងណានោះឡើយ៕
Tag:
តៃវ៉ាន់
Tsai Ing-wen
ដូណាល់ ត្រាំ
© រក្សាសិទ្ធិដោយ thmeythmey.com