ជាតិ
សង្គមជាតិ
ក្រសួងមហាផ្ទៃ ថា លោក ឌិន ពុទ្ធី រោទិ៍ម៉ាស៊ីនរថយន្ត បើកបុកលោក ឈាន ពិសិដ្ឋ រូបពីហ្វេសប៊ុក
× ភ្នំពេញ៖ ក្រោយពីពិនិត្យលើករណីប៉ូលិសជួបគ្រោះថ្នាក់ចរាចរណ៍ ដែលត្រូវបានបង្ហោះលើបណ្ដាញសង្គមរួចមក ក្រសួងមហាផ្ទៃ បានវាយតម្លៃករណីនេះថា ម្ចាស់រថយន្តលោក ឌិន ពុទ្ធី មានចេតនាបើករថយន្តបុកលោក ឈាន ពិសិដ្ឋ មន្ត្រីប៉ូលិសនាយរងប៉ុស្តិ៍រៀបចំសណ្ដាប់ធ្នាប់នៅប៉ោយប៉ែត ។
សេចក្ដីប្រកាសព័ត៌មានក្រសួងមហាផ្ទៃ បានលើកតឹកតាងនៃការស៊ើបអង្កេតមកថា ខណៈលោក ឈាន ពិសិដ្ឋ បានឃាត់យកម៉ូតូរបស់លោក អ៊ឹង ឃាន ដែលបានចតទុកចោលគ្មានសណ្ដាប់ធ្នាប់ និងអប់រំម្ចាស់ម៉ូតូនោះ ស្រាប់តែលោក ឌិន ពុទ្ធី បានបើករថយន្តមកតវ៉ា និងអន្តរាគមន៍ជួយម្ចាស់ម៉ូតូឌុបរូបនេះតែម្ដង ។ ភ្លាមៗនោះលោក ឌិន ពុទ្ធី ក៏បានទាញដៃលោក អ៊ឹង ឃាន ចូលក្នុងរថយន្តខ្លួន ប៉ុន្តែត្រូវបានលោក ឈាន ពិសិដ្ឋ ឈររាំងពីមុខរថយន្ត ដើម្បីហៅលោក អ៊ឹង ឃាន ឲ្យចុះពីរថយន្តមកធ្វើកិច្ចសន្យាពាក់ព័ន្ធនឹងករណីចតម៉ូតូ ដែលធ្វើឲ្យប៉ះពាល់ដល់សណ្ដាប់ធ្នាប់សាធារណៈនេះ ហើយក៏មានឧបទ្ទវហេតុកើតឡើង ដែលបង្កដោយលោក ឌិន ពុទ្ធី តែម្ដង។
សេចក្ដីប្រកាសព័ត៌មាន ចុះថ្ងៃទី២៩ ធ្នូនេះ បានបន្ថែមថា៖«ឃើញសកម្មភាពលោក ឌិន ពុទ្ធី បែបនេះ លោកវរសេនីយ៍ត្រី ឈាន ពិសិដ្ឋ បានដើរទៅឈរពីមុខឡានរបស់លោក ឌិន ពុទ្ធី និងបានហៅលោក អ៊ឹង ឃាន ជាម្ចាស់ម៉ូតូឲ្យចេញពីឡាន ដើម្បីធ្វើកិច្ចសន្យាស្រាប់តែលោក ឌិន ពុទ្ធី រោទិ៍ម៉ាស៊ីនឡាន រួចបើកបុកលោកវរសេនីយ៍ត្រី ឈាន ពិសិដ្ឋ ធ្វើឲ្យដួលបោកក្បាលទៅនឹងថ្នល់សន្លប់បាត់ស្មារតី»។
ពាក់ព័ន្ធនឹងករណីខាងលើនេះអយ្យការអម សាលាដំបូងខេត្តបន្ទាយមានជ័យ បានបើកការស៊ើបអង្កេតលើឈ្មោះ ឌិន ពុទ្ធី ពីបទអំពើហិង្សាដោយចេតនាមានស្ថានទម្ងន់ទោស តាមមាត្រា២១៨នៃក្រមព្រហ្មទណ្ឌ និងបញ្ជូនទៅចៅក្រមស៊ើបសួរបន្តនីតិវិធីរួចហើយ។ អយ្យការអមសាលាដំបូងខេត្ត នៅតាមដាន និងជំរុញទៅចៅក្របស៊ើបសួរស្រាវជ្រាវរឿងនេះឲ្យច្បាស់លាស់ ដើម្បីបង្ហាញការពិត និងផ្តល់យុត្តិធម៌ដល់ភាគីទាំងសងខាង។
ជុំវិញការចោទប្រកាន់នេះ ក៏មានក្រុមអ្នករត់ម៉ូតូឌុប និងសមាជិក សមាគមន៍សេដ្ឋកិច្ចក្រៅប្រព័ន្ធជាច្រើននាក់ បានតវ៉ាទាមទាឲ្យទម្លាក់បទចោទខាងលើនេះ និងស្នើឲ្យដោះលែងលោក ឌិន ពុទ្ធី ប្រធានសមា គមន៍សេដ្ឋកិច្ចក្រៅប្រព័ន្ធនេះផងដែរ នៅព្រឹកថ្ងៃទី២៩ ធ្នូនេះ។
វីដេអូ និងរូបថត ប៉ូលិស ដួលសន្លប់មុខរថយន្ត បានល្បីល្បាញពេញបណ្តាញសង្គមហ្វេសប៊ុក តាំងពីព្រឹកថ្ងៃទី២២ ខែធ្នូ។ ករណីនេះ កើតឡើងនៅចំណុចស្ពានមិត្តភាពកម្ពុជា ថៃ ក្បែរបុស្តិ៍ច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ។ ក្រោយគ្រោះថ្នាក់ចរាចរណ៍នេះមន្ត្រីប៉ូលីសឈ្មោះ ឈាន ពិសិដ្ឋ ក៏បានបញ្ជូនទៅមន្ទីពេទ្យ ដោយមានស្នាមជាំជាប់ភ្លៅ និងដាក់រណបបំពងករ ហើយក៏មានលិខិតបញ្ជាក់វេជ្ជបញ្ជាពីគ្រូពេទ្យផងដែរ។ តែយ៉ាងណាតំណាងរាស្ត្រគណបក្សសង្គ្រោះជាតិ លោក អេង ឆៃអ៊ាង ដែលបានស្នើឲ្យក្រសួងមហាផ្ទៃ ស៊ើបអង្កេតភាពមិនប្រក្រតីនៃករណីនេះ បានបង្ហោះរូបភាពមន្ត្រីប៉ូលីសខាងលើ ដោយអមជាមួយសំណេរលើហ្វេសប៊ុកខ្លួនយ៉ាងដូច្នេះថា៖« រឿងបែបនេះ គេសម្តែងនៅលើឆាកនៃរោងល្ខោន គេមិនសម្តែងនៅផ្លូវថ្នល់ទេ»៕
Tag:
ក្រសួងមហាផ្ទៃ
ឌិន ពុទ្ធី
ប៉ូលីស
© រក្សាសិទ្ធិដោយ thmeythmey.com