ពូទីន មិនបណ្តេញមន្ត្រីទូតអាមេរិកទេ តែសោកស្តាយដែល អូបាម៉ា បញ្ចប់ការងារបែបនេះ

អន្តរជាតិ

នយោបាយអន្តរជាតិ

ពូទីន មិនបណ្តេញមន្ត្រីទូតអាមេរិកទេ តែសោកស្តាយដែល អូបាម៉ា បញ្ចប់ការងារបែបនេះ

30, Dec 2016 , 8:54 pm

រូបភាព

ដោយ: ថ្មីៗ

ប្រធានាធិបតីរុស្ស៊ីបានបញ្ជាក់ថា រុស្ស៊ីមិនបណ្តេញអ្នកការទូតអាមេរិកចេញដើម្បីសងសឹកការបណ្តេញអ្នកការទូតខ្លួនពីអាមេរិកឡើយ។ លោកបានបន្ថែមថា ទំនាក់ទំនងរវាងអាមេរិកនិងរុស្ស៊ីនឹងត្រូវកំណត់ឬអាចស្តារឡើងវិញកម្រិតណា អាស្រ័យលើ គោលនយោបាយការបរទេសរបស់រដ្ឋបាលលោក ដូណាល់ ត្រាំ ប៉ុណ្ណោះ។

ថ្វីបើត្រួវទទួលកាដូឆ្នាំថ្មីជាទណ្ឌកម្មនិងការប្រមាថដោយការបណ្តេញមន្ត្រីទូតខ្លួនមកស្រុកវិញក៏ដោយ លោកប្រធានាធិបតីរុស្ស៊ី វ្ល៉ាឌីមៀ ពូទីន បានព្យាយាមរងាប់អារម្មណ៍និងសម្រេចថាមិនសងសឹកអាមេរិកវិញដោយបណ្តេញមន្ត្រីទូតអាមេរិកឡើយ។ លោកឆ្លៀតចម្អកឲ្យអាមេរិកថា លោកមិនដែរប្រើ«នយោបាយការទូតកំប៉ិកកំប៉ុកដូចរឿងផ្ទះបាយ»ដែលគ្មានទំនួលខុសត្រូវឡើយ។

យោងតាមទីភ្នាក់ងារព័ត៌មាន AFP លោក ពូទីនបានបញ្ជាក់ច្បាស់ថា រុស្ស៊ីមិនយកកំហឹងទល់កំហល់ ហើយបណ្តេញអ្នកការទូតអាមរិក៣៥ នាក់ និងក្រុមគ្រួសារចេញពីរុស្ស៊ីឡើយ ទោះជារដ្ឋមន្ត្រីការបរទេសលោកបានស្នើឲ្យលោកធ្វើបែបនោះក្តី។ លោកបកស្រាយថាលោកមិនចង់បង្កើតបញ្ហាដល់មន្ត្រីការទូតអាមេរិក ព្រោះតែចង់ឈ្នះចាញ់ឡើយ។ ផ្ទុយទៅវិញលោក ឆ្លៀតអញ្ជើញកូនមន្ត្រីទូតអាមេរិកទាំងនោះទៅចូលរួមពិធីបុណ្យឆ្លងឆ្នាំ និងគ្រិស្មាសនៅវិមានក្រេមឡាំងទៀតផង។

យ៉ាងណាក៏ដោយលោក ពូទីន នៅរក្សាសិទ្ធិតបតវិញបើចាំបាច់ ហើយលោកពន្យល់បន្ថែមថា ទំនាក់ទំនងគ្រប់យ៉ាងរវាងអាមេរិកនិងរុស្ស៊ីនឹងត្រូវពឹងពាក់លើគោលនយោបាយរបស់លោក ដូណាល់ ត្រាំ។

«ខណៈដែលយើងរក្សាសិទ្ធិតបត យើងនឹងមិនឈានទៅប្រើប្រាស់នយោបាយការទូតផ្ទះបាយដែលគ្មានទំនួលខុសត្រូវបែបនេះឡើយ។ ហើយរាល់ជំហាននានាក្នុងការស្តារទំនាក់ទំនងរវាងអាមេរិកនិងរុស្ស៊ីនឹងត្រូវធ្វើឡើងផ្អែកតាមគោលនយោបាយរបស់ប្រធានាធិបតី ដូណាល់ ត្រាំ»។ នេះជាការបញ្ជាក់របស់លោក វ្ល៉ាឌីមៀ ពូទីន។

ប្រធានាធិបតីរុស្ស៊ីរូបនេះជឿជាក់ថា គោលនយោបាយដែលមិនគួរស្វាគមន៍របស់រដ្ឋបាលជិតផុតអាណត្តិជាការបង្ករឿងមួយដែលវាមានគោលដៅជាន់ពន្លិចទំនាក់ទំនងរវាងរុស្ស៊ីនិងអាមេរិកតែម្តង។ លោកក៏ចាត់ទុកថា វាជាគោលជំហរមួយដែលផ្ទុយស្រឡះពីការឈានទៅរក្សាប្រយោជន៍រវាងមហាអំណាចទាំងពីរ ហើយលោកសោកស្តាយដែលរដ្ឋបាលលោក បារ៉ាក់ អូបាម៉ា បានបញ្ចប់ការងាររបស់ខ្លួនក្នុងស្ថានភាពដូច្នេះ។

សូមបញ្ជាក់បន្តថា នៅថ្ងៃព្រហស្បតិ៍ទី ២៩ ធ្នូម្សិលមិញ រដ្ឋបាលលោក បារ៉ាក់ អូបាម៉ា បានប្រកាសដាក់ទណ្ឌកម្មបន្ថែមប្រឆាំងរុស្ស៊ីក្នុងនោះមានទាំងបណ្តេញមន្ត្រីទូតរុស្ស៊ីជាង៣០នាក់ចេញពីអាមេរិកនិងបិទមិនឲ្យដំណើរការទីតាំងដែលកម្មសិទ្ធិរុស្ស៊ីពីរកន្លែងថែមទៀតផង។ អាមេរិកអះអាងថាវាជាវិធានការសងសឹករុស្ស៊ីដែលបានលូកលាន់ចូលក្នុងការបោះឆ្នោតអាមេរិកកន្លងមក៕