ជាតិ
ស្ត្រីខ្មែរ៧នាក់ត្រូវបានសង្គ្រោះពីការជួញដូរផ្លូវភេទ នៅជប៉ុន
× ស្ត្រីខ្មែរ៧នាក់ ដែលរងគ្រោះពីការជួញដូរផ្លូវភេទនៅក្នុងប្រទេសជប៉ុន ត្រូវបានជួយសង្គ្រោះ ដោយមានការសហការពីស្ថានឯកអគ្គរាជទូតកម្ពុជាប្រចាំប្រទេសជប៉ុន និងអាជ្ញារមានសមត្ថកិច្ចខេត្ត Gunma ប្រទេស ជប៉ុន។
ស្ថានឯកអគ្គរាជទូតកម្ពុជាប្រចាំប្រទេសជប៉ុន សហការជាមួយអាជ្ញារមានសមត្ថកិច្ចខេត្ត Gunma ប្រទេសជប៉ុន បានជួយសង្គ្រោះ និងរៀបចំមាតុភូមិនិវត្តន៍ដល់ស្ត្រីខ្មែរចំនួន៧នាក់ ដែលរងគ្រោះដោយការជួញដូរផ្លូវភេទ ក្រោយពីមានការផ្តល់ព័ត៌មានផ្ទាល់ពីស្ត្រីរងគ្រោះទៅកាន់ទំព័រហ្វេសប៊ុករបស់ស្ថានទូត។
បើតាមសេចក្តីជូនព័ត៌មានរបស់ក្រសួងការបរទេសកម្ពុជា ស្ថានទូតបានអន្តរាគមន៍ជួយស្ត្រីរងគ្រោះទាំង៧នាក់ និងនាំពួកគេទៅស្នាក់នៅស្ថានទូតជាបណ្តោះអាសន្ន ដោយផ្តល់អាហារបរិភោគ សេវាថែទាំសុខភាព និង សម្ភារៈប្រើប្រាស់ចាំបាច់ដទៃទៀតផងដែរ។
ក្រសួងការបរទេសកម្ពុជា ឲ្យដឹងថាស្ត្រីរងគ្រោះទាំង៧នាក់ ត្រូវបានមេខ្យល់បោកបញ្ឆោតនាំទៅដល់ប្រទេសជប៉ុន កាលពីខែវិច្ឆិកា ឆ្នាំ២០១៦ ដោយមានការរៀបចំឯកសារសុំទិដ្ឋាការ និងសំបុត្រយន្តហោះ ពីបុរសជនជាតិជប៉ុនម្នាក់ ដែលជាម្ចាស់ភោជនីយដ្ឋានមួយនៅក្នុងខេត្ត Gunma ។ បុរសនោះ បានសន្យាផ្តល់ការងារធ្វើនៅភោជនីយដ្ឋានរបស់ខ្លួន ដល់ស្ត្រីរងគ្រោះជាមួយនឹងប្រាក់ខែខ្ពស់ តែផ្ទុយទៅវិញ បានគំរាមកំហែង និងបង្ខំឲ្យស្ត្រីរងគ្រោះ បម្រើសេវាផ្លូវភេទដល់ភ្ញៀវនៅភោជនីយដ្ឋានទៅវិញ និងមិនបានផ្តល់ប្រាក់បៀវត្សឡើយ។
ដើម្បីការពារប្រយោជន៍ស្ត្រីរងគ្រោះ ស្ថានទូតក៏បានសហការជាមួយនគរបាលខេត្ត Gunma សាកសួរព័ត៌មានពីស្ត្រីរងគ្រោះ ដើម្បីរៀបចំសំណុំឯកសារបញ្ជូនទៅតុលាការ និងស្វែងរកជនសង្ស័យ និងអ្នកពាក់ព័ន្ធ មកផ្តន្ទាទោសតាមច្បាប់។ ស្វែងរកក្រុមមេធាវីស្ម័គ្រចិត្ត ដើម្បីប្តឹងទៅតុលាការ ជួយទាមទារប្រាក់ខែដែលជនសង្ស័យ សន្យាផ្តល់ឲ្យ និងទាមទារប្រាក់ជំងឺចិត្តជូនស្ត្រីរងគ្រោះ។ ស្ថានទូតកម្ពុជាប្រចាំប្រទេសជប៉ុន បានស្នើសុំឲ្យអង្គការអន្តរជាតិទេសសន្តរប្រវេសន៍ (IOM) ជួយដោះស្រាយសំបុត្រយន្តហោះ ជូនស្ត្រីរងគ្រោះទាំង៧នាក់ និងបន្តគាំពារពួកគេពេលមកត្រឡប់មកដល់កម្ពុជាវិញ។
បើតាមសេចក្តីជូនព័ត៌មានរបស់ក្រសួងការបរទេស ស្ត្រីរងគ្រោះម្នាក់ បានស្នើសុំត្រឡប់មកកម្ពុជាមុន ដោយសារបញ្ហាសុខភាព និងបានមកដល់ព្រលានយន្តហោះអន្តរជាតិភ្នំពេញ កាលពីថ្ងៃទី២៧ ខែធ្នូ ឆ្នាំ២០១៦ ។ ចំណែកស្ត្រីរងគ្រោះ៦នាក់ទៀត នឹងមកដល់កម្ពុជា នៅថ្ងៃ ទី១៩ ខែមករា ឆ្នាំ២០១៧ ក្រោយបញ្ចប់ការសាកសួរពីសំណាក់អាជ្ញាធរខេត្ត Gunma មន្ត្រីអន្តោប្រវេសន៍ ក្រុមមេធាវី និងមន្ត្រីអង្គការIOM៕
Tag:
ស្ត្រីរងគ្រោះ
ជួញដូរផ្លូវភេទ
© រក្សាសិទ្ធិដោយ thmeythmey.com