COVID-19
អន្តរជាតិ
COVAX អាចនឹងផ្តល់វ៉ាក់សាំង១៥០លានដូសក្នុងត្រីមាសទី១ ឆ្នាំ២០២១ ច្រវាក់ផលិតកម្មវ៉ាក់សាំងកូវីដ-១៩ ។ រូបថត Xinhua
× យន្តការ COVAX ដែលបង្កើតឡើងដើម្បីផ្តល់វ៉ាក់សាំងដល់ក្រីក្រ បញ្ជាក់ថា ខ្លួនមានសមត្ថភាពក្នុងការផ្តល់វ៉ាក់សាំងចំនួន១៤៥ ទៅ១៥០លានដូសក្នុងរយៈពេលបីខែដើមឆ្នាំ២០២១។ ការអះអាងពីលទ្ធភាពក្នុងការផ្តល់វ៉ាក់សាំងនេះ ជាជំហានដំបូងនៃផែនការក្នុងការទិញវ៉ាក់សាំងឲ្យបានចំនួន២ពាន់លានដូស។
យន្តការ COVAX ត្រូវបានបង្កើតឡើងដើម្បីចែកចាយវ៉ាក់សាំងដោយសមធម៌ជុំវិញពិភពលោក និងត្រូវបានដឹកនាំរួមគ្នាដោយសម្ព័ន្ធវ៉ាក់សាំង GAVI អង្គការសុខភាពពិភពលោក(WHO) និង CEP I។ យន្តការនេះមានបំណងផ្តល់វ៉ាក់សាំង៥០០លានដូសនៅពាក់កណ្តាលឆ្នាំ២០២១ និង១,៥០០លានដូសបន្ថែមទៀតនៅចុងឆ្នាំ២០២១។
ថ្លែងក្នុងវេទិកាសេដ្ឋកិច្ចពិភពលោក (WEF) លោកវេជ្ជបណ្ឌិត Seth Berkley ប្រធានសម្ព័ន្ធវ៉ាក់សាំងGAVI និយាយថា COVAX មានលទ្ធភាពក្នុងការធានាវ៉ាក់សាំងចំនួន១៥០លានដូស ដោយសារតែយន្តការនេះបានចរចាទិញវ៉ាក់សាំងបន្តពីប្រទេសអភិវឌ្ឍដែលបានកក់វ៉ាក់សាំងហួសពីចំនួនដែលខ្លួនត្រូវការ។
«ច្បាស់ណាស់ពេលនេះ ពិភពលោកស្លន់ស្លោរឿងវ៉ាក់សាំង ហើយប្រទេសជាច្រើនចង់បានវ៉ាក់សាំង»។ នេះជាការថ្លែងរបស់លោក Berkley នៅថ្ងៃទី២៦ មករា ដែលបន្តថា យន្តការ COVAX នឹងធ្វើគ្រប់បែបយ៉ាងដើម្បីឈានទៅមុខ។ ប្រធាន GAVI រូបនេះ បន្ថែមថា ខ្លួនរង់ចាំការអនុញ្ញាតឲ្យប្រើប្រាស់នូវវ៉ាក់សាំងច្រើនប្រភេទផ្សេងទៀតពី WHO ដើម្បីចែកចាយវ៉ាក់សាំងឲ្យបានទូលំទូលាយ។ នៅថ្ងៃទី៣១ ធ្នូ ឆ្នាំ២០២០ WHO បានផ្តល់ការប្រើប្រាស់ជាបន្ទាន់ដល់វ៉ាក់សាំង Pfizer/BioNTech។
បើតាមលោក Berkley ស្របពេលទទួលបានវ៉ាក់សាំងពីប្រទេសដែលមានវ៉ាក់សាំងលើសចំនួនត្រូវការក្តី COVAX ក៏មានលទ្ធភាពក្នុងការទិញ ឬបញ្ជាទុកមុនដើម្បីទទួលបានវ៉ាក់សាំងផ្ទាល់ខ្លួនផងដែរ។ លោកកត់សម្គាល់ថា ប្រទេសមានចំណូលខ្ពស់បានកក់វ៉ាក់សាំងដែលទទួលបានការអនុញ្ញាតចំនួន៨០០លានដូស ដែលចំនួនលើសពីការត្រូវការ និងកក់វ៉ាក់សាំង១,៤ពាន់លានដូសទៀត ទាំងមិនទាន់ទទួលបានការអនុញ្ញាតឲ្យប្រើប្រាស់ក្ដី។ នេះយោងតាមសារព័ត៌មានThe Straits Times។
ឆ្លៀតឱកាសនោះ លោកក៏រំឭកផងដែរថា រឿងសំខាន់បំផុតសម្រាប់វ៉ាក់សាំងគឺរយៈពេលដែលវ៉ាក់សាំងអាចប្រើប្រាស់បាន ការប្រើប្រាស់នៅទីតាំងផ្សេងៗគ្នានៃពិភពលោក ការដឹកជញ្ជូនពីអ្នកផលិតទៅអ្នកទទួល និងការរក្សាទុកនៅកន្លែងដែលមានសីតុណ្ហភាពដ៏ត្រជាក់មួយ។
ទាក់ទងរឿងវ៉ាក់សាំង គេមិនអាចរំលងការដឹកជញ្ជូនឡើយ។ លោក Dorothea von Boxberg ប្រធានផ្នែកបុគ្គលិកដឹកទំនិញនៃក្រុមហ៊ុនអាកាសចរណ៍ Lufthansa និយាយថា ក្រៅពីវ៉ាក់សាំង គេក៏ត្រូវការការដឹកជញ្ជូនសម្ភារបន្ថែមដូចជាសឺរ៉ាំង និងឧបករណ៍ដើម្បីរក្សាវ៉ាក់សាំងក្នុងសីតុណ្ហភាពត្រជាក់ជាដើម៕
© រក្សាសិទ្ធិដោយ thmeythmey.com