COVID-19
អន្តរជាតិ
កំពង់ផែក្រុងតាលៀនរបស់ចិន។ រូបថត Xinhua
×![]()
ដោយ: ធៀន ភារិន្ទ
មូលនិធិរូបិយវត្ថុអន្តរជាតិ (IMF) នៅថ្ងៃទី២៦ ខែមករា បានប៉ាន់ប្រមាណថា សេដ្ឋកិច្ចសកល នឹងងើប៥,៥ភាគរយ នៅក្នុងឆ្នាំ២០២១ បន្ទាប់ពីរងគ្រោះដោយសារការអុកឡុករបស់កូវីដ-១៩ ។ ការកើនឡើងនៃសេដ្ឋកិច្ចសកលនេះ ដោយសារតែកម្មវិធីចាក់វ៉ាក់សាំង ដែលបណ្តាលឱ្យរដ្ឋជាច្រើនបន្ធូរបន្ថយការរឹតត្បិតនៅក្នុងប្រទេស និងការបិទតំបន់ជាដើម។ 
ក្នុងឆ្នាំ២០២០ កូវីដ-១៩ បានរាលដាលទៅគ្រប់កន្លែងនៃពិភពលោក ស្របប្រទេសជាច្រើន បានបិទតំបន់ ទីក្រុង អនុវត្តវិធានរឹតត្បិត បម្រាមគោចរ ផ្អាកដំណើរការរបស់អាជីវកម្ម ឬក្រុមហ៊ុន ដើម្បីប្រយុទ្ធជាមួយជំងឺឆ្លងសកលមួយនេះ។ ដោយសារតែវិធានការទប់ស្កាត់របស់រដ្ឋាភិបាលនីមួយៗនៅជុំវិញពិភពលោក សេដ្ឋកិច្ចសកលថយចុះ៣,៥ភាគរយនៅក្នុងឆ្នាំ២០២០។ ចំនួននេះ គឺថយចុះខ្លាំងបំផុត បើគិតចាប់តាំងពីសង្គ្រាមលោកលើកទីពីរមក។
យ៉ាងណាមិញ IMF បានប៉ាន់ប្រមាណថា នៅក្នុងឆ្នាំ២០២១ សេដ្ឋកិច្ចសកល នឹងងើបឡើងវិញ ដោយកើនរហូតដល់ទៅ ៥,៥ភាគរយឯណោះ។ នៅក្នុងខែតុលា ឆ្នាំ២០២០ IMF បានវាយតម្លៃថា សេដ្ឋកិច្ចសកល នឹងកើនត្រឹមតែ ៥,២ ភាគរយប៉ុណ្ណោះ។
នៅក្នុងរបាយការណ៍ដែលចេញផ្សាយនៅថ្ងៃទី២៦ ខែមករានេះ IMF បានរំពឹងថា ក្នុងចំណោមប្រទេសទាំងអស់ ឥណ្ឌា នឹងហក់ឡើងខ្ពស់ជាងគេ ដោយមានសេដ្ឋកិច្ចប្រទេសនេះនឹងកើន១១,៥ ភាគរយ បន្ទាប់ពីថយចុះ៨ភាគរយ នៅក្នុងឆ្នាំ២០២០។ ចំណែកចិនវិញ នឹងមានកំណើនសេដ្ឋកិច្ច ៨,១ភាគរយ ខណៈកំណើនសេដ្ឋកិច្ចនៅក្នុងឆ្នាំ២០២០ មានចំនួន២,៣ភាគរយ។ រីឯជប៉ុន មានកំណើនសេដ្ឋកិច្ច ៣,១ភាគរយ។
ដោយឡែកអាមេរិកឯណោះវិញ សេដ្ឋកិច្ចមហាអំណាចមួយនេះ នឹងកើនចំនួន ៥,១ភាគរយ ខណៈសេដ្ឋកិច្ចប្រទេសអឺរ៉ុបជារួមនឹងកើន ៤,២ភាគរយ។ សេដ្ឋកិច្ចបារាំងកើន៥,៥ភាគរយ, អាល្លឺម៉ង់មាន ៣,៥ភាគរយ, អ៊ីតាលីមាន៣ភាគរយ និងអេស្ប៉ាញមាន៥,៩ភាគរយ។ ចក្រភពអង់គ្លេស នឹងមានកំណើនសេដ្ឋកិច្ច ៤ភាគរយ បន្ទាប់ពីកំណើនសេដ្ឋកិច្ចថយចុះ ១០ភាគរយ នៅក្នុងឆ្នាំ២០២០។
ក្រៅពីសេដ្ឋកិច្ចរបស់ពិភពលោក ទំហំពាណិជ្ជកម្មរបស់ពិភពលោក ក៏ងើបឡើងផងដែរ។ នៅក្នុងឆ្នាំ២០២០ ពាណិជ្ជកម្មពិភពលោកធ្លាក់ជាង៩ភាគរយ តែនឹងកើន៨,១ភាគរយវិញនៅក្នុងឆ្នាំ២០២១។ ក្នុងនោះ ពាណិជ្ជកម្មរបស់ក្រុមប្រទេសអភិវឌ្ឍកើន៧,៥ភាគរយ និងពាណិជ្ជកម្មរបស់ក្រុមប្រទេសកំពុងអភិវឌ្ឍកើនចំនួន៩,២ភាគរយ។
កំណើនសេដ្ឋកិច្ចទាំងនេះ កើនឡើងដោយសារតែវ៉ាក់សាំងកូវីដ-១៩ ការបន្ធូរបន្ថយការរឹតត្បិតនៅក្នុងប្រទេស និងការលើកទឹកចិត្តឱ្យសកម្មភាពសេដ្ឋកិច្ចជាច្រើនត្រលប់មកសភាពធម្មតាវិញ។ ជាមួយគ្នានេះ ជំនួយសង្គ្រោះសេដ្ឋកិច្ចរបស់រដ្ឋាភិបាល ក៏ជាផ្នែកមួយនៃកំណើនសេដ្ឋកិច្ចផងដែរ។
សូមបញ្ជាក់ថា បើទោះបីជាប៉ាន់ប្រមាណថាសេដ្ឋកិច្ចពិភពលោកនឹងកើនឡើងក្នុងឆ្នាំ២០២១ ក៏ដោយ មូលនិធិរូបិយវត្ថុអន្តរជាតិ បានព្រមានថា ពិភពលោក នៅតែប្រឈមនឹងភាពមិនប្រកដប្រជាដដែល ដោយសារទម្រង់ថ្មីនៃកូវីដ-១៩ ដែលអាចធ្វើឱ្យមានការកើនឡើងករណីឆ្លងជាថ្មី, ការចែកចាយវ៉ាក់សាំង និងបញ្ហាផ្សេងទៀតជាដើម៕
Tag:
IMF
កូវីដ-១៩
© រក្សាសិទ្ធិដោយ thmeythmey.com
